ஸ்பாம் மெயில்கள் அனுப்புவதில் ஆசியாவில் இந்தியா நம்பர் ஒன்!

பெங்களுரு: ஆசியாவிலேயே தேவையற்ற இமெயில் (ஸ்பாம்) அனுப்புவதில் இந்தியாதான் முதலிடம் வகிப்பதாக டிரென்ட் மைக்ரோ நிறுவனம் நடத்திய ஆய்வில் தெரிய வந்துள்ளது. உலக அளவில் இந்தியாவுக்கு இதில் ஏழாவது இடமாம்!

இந்த ஆய்விலிருந்து கிடைத்த தகவல்கள் பின்வருமாறு:

அதிக தேவையற்ற இமெயில் அனுப்புவதில் முதலாவதாக உள்ளது, ரஷ்ய கூட்டமைப்பு நாடுகள்தான். உலகின் ஸ்பாம் மெயிலில் ரஷ்யாவின் பங்கு 11% அடுத்து அமெரிக்காவில் 9.36% இந்தியாவில் 4.26% தேவையற்ற இமெயில்கள் அனுப்பப்படுகின்றன.

உலகின் வளர்ச்சி அடைந்த 10 நாடுகளில் மட்டும் 57.4% தேவையற்ற மெயில் உருவாக்கப்படுகின்றன. 6.65 கோடி ஸ்பாம் மெயில்கள் இந்தியாவிலிருந்து மட்டும் அனுப்பப்படுகின்றன.

பிரேசில், ரஷ்யா, சீனா, இந்தியா ஆகிய நாடுகளில் மட்டுமே உலகின் 20% ஸ்பாம் மெயில்கள் உருவாகின்றனவாம். இதில் ஆசிய கண்டத்தில் மட்டும் 16.57%.

இப்படி வெட்டி மெயில்கள் அனுப்பி மக்களை ஏமாற்றும் நேரத்தை உருப்படியாகச் செலவழித்தால் நியாயமான முறையிலேயே நல்ல லாபம் பார்க்கலாம் என நிபுணர்கள் கருத்து தெரிவித்துள்ளனர்.

'பாமரத்தனமாக' கூட இருக்கலாம். ஆனால் 'ஸ்பாமரத்தனமாக' இருப்பதால் யாருக்கு என்ன லாபம்?