அண்ணாதுரை, சானியாவுக்கு கெளரவ டாக்டர் பட்டம்

சென்னை: சந்திராயன் திட்ட இயக்குநர் டாக்டர் மயில்சாமி அண்ணாதுரை மற்றும் டென்னிஸ் இளம் புயல் சானியா மிர்ஸா ஆகியோருக்கு சென்னை டாக்டர் எம்.ஜி.ஆர். பல்கலைக்கழகம் நாளை கெளரவ டாக்டர் பட்டத்தை வழங்குகிறது.

சென்னையை அடுத்த மதுரவாயலில் டாக்டர் எம்.ஜி.ஆர். கல்வி மற்றும் ஆராய்ச்சி பல்கலைக்கழகம் உள்ளது. பல்கலைக்கழகத்தின் வேந்தர் ஏ.சி.சண்முகம் செய்தியாளர்களிடம் இத்தகவலைத் தெரிவித்தார்.

இதுகுறித்து அவர் கூறுகையில், பல்கலைக்கழகத்தின் 17-வது பட்டமளிப்பு விழா நாளை மாலை 4 மணிக்கு வேலப்பன் சாவடியில் உள்ள ஏ.சி.எஸ். மருத்துவக்கல்லூரியில் நடைபெற உள்ளது.

விழாவில் நிலவுக்கு சந்திரயான்-1 விண்கலத்தை வெற்றிகரமாக அனுப்பிய பெங்களூரில் உள்ள இந்திய விண்வெளி ஆராய்ச்சி மைய செயற்கை கோள் மையத்தை சேர்ந்த சந்திரயான்-1 திட்ட இயக்குனர் மயில்சாமி அண்ணாதுரைக்கு அவரது சேவையை பாராட்டி கவுரவ டாக்டர் பட்டம் (டாக்டர் ஆப் சயின்ஸ்) வழங்கப்படுகிறது.

இந்திய டென்னிஸ் விளையாட்டு வீராங்கணை சானியா மிர்சா பல்வேறு டென்னிஸ் போட்டிகளில் வெற்றி பெற்று இந்தியாவுக்கு புகழ் குவித்து வருகிறார். அவரை பாராட்டி அவருக்கும் கவுரவ டாக்டர் பட்டம் (டாக்டர் ஆப் லெட்டர்ஸ்) வழங்கப்படுகிறது.

இஸ்ரோ முன்னாள் தலைவரும் விஞ்ஞானியுமான கஸ்தூரிரங்கன் எம்.பி. கலந்து கொண்டு கவுரவ டாக்டர் பட்டங்களை வழங்குகிறார். மேலும் மாணவ-மாணவிகளுக்கும் பட்டங்களை வழங்குகிறார்.

மொத்தம் 1439 மாணவ-மாணவியர் பி.டெக்., பி.எஸ்சி., பி.பி.டி உள்ளிட்ட இளங்கலை பட்டங்களையும், 615 பேர் எம்.டெக்., எம்.பி.டி. முதலிய முதுகலை பட்டங்களையும் பெறுகிறார்கள்.

சென்னையில் உள்ள அமெரிக்க தூதரக அதிகாரி ஆண்ட்ரூ டி.சிம்கின் சிறப்பு அழைப்பாளராக கலந்து கொள்கிறார் என்றார் சண்முகம்.