மழை நாளிரவு...

அந்த மழை நள்ளிரவு
உனக்கு ஞாபகமிருக்கிறதா?
ஆமெனில்-எத்தனைமுறை
அதை அசைபோட்டிருக்கிறாய்?
யாரிடமாவது பகிர்ந்ததுண்டா?

கடுமிடியும் காரிருளும்
எலும்பு துளைக்கும் குளிரும்
தரை பெயர்க்கும் மழையும்
மழைக்கம்பிகளை சடசடவென
இசைத்துப்போகும் காற்றும்....
அமானுஷ்ய ரகஸ்யங்களை
பறவைகள் மர இலைகளோடு பகிர்ந்துபோன-நமக்குள் மட்டும்
எந்த சலனைத்தையும் ஏற்படுத்தாத
அந்த மழை நள்ளிரவு ஞாபகமிருக்கிறதா?

நீ ஜன்னல் கம்பி வழியாய்-இருளில்
தெரியா உருவங்களை பார்த்திருந்தாய்-அல்லது
ஏதோ யோசித்தபடியிருந்தாய்

நான் அவ்வப்போது
வானம் கிழிக்கும் வெண்கோடுகளையும்
மனம் நிறைய மழைக்குளிரையும்-நம்
வாழ்க்கையில் வந்துபோன விடையறியா
புதிர்களையும் நினைவுகளில் சேகரித்துக் கொண்டேன்...

செவுற்றுக் கோழிகளும் தவளைகளும்
அலறிக்கொண்டிருந்த
அந்த மழை நள்ளிரவு ஞாபகமிருக்கிறதா?

நீதான் இடியென மௌனம் கிழித்தாய்-என்
காலடி பூமி மழைநீரில் கரைவதாய் பட்டதெனக்கு
போகலாமென்றாய்...

நமக்கு மட்டும் சிலையில் பெய்த மழையாயிருந்த
அம்மழைநாளிரவு ஞாபகமிருக்கிறதா?

உனக்கு எல்லாம் தெரிந்திருக்கிறது
நீதான் அழைத்துப் போனாய்
மூன்று மணி நேரமிருக்கலாம்-கூடவோ?
நீ உன் கன்னித்ன்மையை மீட்டிருந்தாய்.

ரத்தமும் சதையுமாய் ஏதையோ
எடுத்துப் போனார்கள் - நாமும்
பிள்ளைக்கறி ருசிப்பதாய் பட்டதெனக்கு
நீ போகலாமென்றாய்..
நான் மழையில் நின்றேன்...
அழுதேன்....

நீ நடந்துபோய்க்கொண்டிருந்தாய்...
விடிவெள்ளி முளைக்கும் அக்காலையிலும்
மழை நீடித்தது-நான் வீடுவந்து
உறங்கிப் போனேன்

இன்றும் மழை என் வீட்டு பால்கனி ரோஜாவை அடித்தபடி
எந்த மழையும் ரஸிக்கமுடியா நான்
என் குழந்தையோடு பார்த்திருந்தேன்...

வடுவாய் வலித்திருக்கும்
அம்மழை நாளிரவு ஞாபகமிருக்கிறதா?
ஆமெனில் யாரோடும் பகிர்ந்ததுண்டா?...

-ரிஷிசேது