தண்ணி காட்டும் தங்க மார்க்கெட்.. கிறிஸ்துமஸுக்கு 1/2 பவுனாவது வாங்கலாமா! பொருளாதார புலிகள் கணிப்பு!

சென்னை: இந்தியாவில் தங்கத்தின் விலை சமீபத்தில் வரலாறு காணாத உச்சத்தை அதாவது சவரனுக்கு 1 லட்சம் என்ற விலை எட்டிய பின்னர், தற்போது சிறிதளவு சரிவை சந்தித்துள்ளது. இதனால், கிறிஸ்துமஸ் பண்டிகைக்கு முன் தங்க விலை மீண்டும் உயருமா, அல்லது இன்னும் குறையுமா என்ற கேள்வி முதலீட்டாளர்கள் மற்றும் பொதுமக்கள் மத்தியில் அதிகமாக எழுந்துள்ளது.

கடந்த வார இறுதி வர்த்தக நாட்களில், அமெரிக்க டாலருக்கு எதிராக இந்திய ரூபாய் மதிப்பு வலுவடைந்ததைத் தொடர்ந்து, தங்க சந்தையில் விற்பனை சற்றே அழுத்தத்தை சந்தித்தது.

இதன் விளைவாக, எம்சிஎக்ஸ் (MCX) சந்தையில் 10 கிராம் தங்கத்தின் விலை ரூ.1,35,199 என்ற சாதனை உச்சத்திலிருந்து சரிந்து, ரூ.1,34,206 என்ற நிலைக்கு வந்தது. தொடர்ந்து வாரத்தின் கடைசி மூன்று வர்த்தக நாட்களில் சுமார் ரூ.1,000 அளவுக்கு தங்க விலை குறைந்துள்ளது.

தங்கம்

உலக சந்தையிலும் தங்கம் பெரிதாக ஏற்ற இறக்கமின்றி குறுகிய வரம்புக்குள் வர்த்தகம் செய்து வருகிறது. காமெக்ஸ் (COMEX) சந்தையில் தங்கம் அவுன்ஸ் ஒன்றுக்கு சுமார் 4,330 டாலர் அளவில் நிலைத்திருக்கிறது. ஆனால், இந்திய சந்தையில் ரூபாய் மதிப்பு உயர்ந்ததால், தங்கத்தின் மேலேறும் வேகம் கட்டுப்படுத்தப்பட்டுள்ளது. இதனால், எம்சிஎக்ஸ் தங்க விலை ரூ.1,33,800 - ரூ.1,34,000 வரம்பில் அழுத்தத்தை சந்தித்ததாக சந்தை நிபுணர்கள் தெரிவிக்கின்றனர்.

இந்திய ரூபாய் வலிமை

தங்கம் மற்றும் வெள்ளி விலை குறைவதற்கு முக்கிய காரணம் இந்திய ரூபாய் வலிமை அடைந்ததே என பொருளாதார வல்லுநர்கள் கூறுகின்றனர். சமீபத்தில், அமெரிக்க டாலருக்கு எதிராக ரூபாய் 91.07 என்ற வரலாற்றிலேயே குறைந்த நிலையை எட்டிய பின்னர், தற்போது மீண்டும் வலுவடைந்து 89.59 என்ற நிலைக்கு வந்துள்ளது. தொடர்ந்து மூன்று நாட்கள் ரூபாய் மதிப்பு உயர்ந்ததே தங்க விலைக்கு எதிர்மறையான தாக்கத்தை ஏற்படுத்தியுள்ளது.

தங்க விலை சரிவு

மேலும், ஜப்பான் மத்திய வங்கி வட்டி விகிதங்களை உயர்த்திய முடிவும், உலக சந்தைகளில் டாலருக்கு அழுத்தத்தை உருவாக்கியுள்ளது. இதனால், சமீப காலமாக உயர்ந்திருந்த தங்கம் மற்றும் வெள்ளி விலைகளில் லாபம் பார்க்கும் நோக்கில் முதலீட்டாளர்கள் விற்பனை செய்துள்ளனர். இருப்பினும், தங்கம் மற்றும் வெள்ளியின் நீண்டகால போக்கு இன்னும் சாதகமாகவே உள்ளது என்று சந்தை வல்லுநர்கள் கருத்து தெரிவிக்கின்றனர்.

எம்சிஎக்ஸ் தங்க விலை

எம்சிஎக்ஸ் தங்க விலை ரூ.1,32,000க்கு மேல் நிலைத்திருக்கும் வரை, பெரிய சரிவுகள் வாங்கும் வாய்ப்பாக பார்க்கலாம் என நிபுணர்கள் அறிவுறுத்துகின்றனர். அதேபோல், எம்சிஎக்ஸ் வெள்ளி விலை ரூ.2,03,000 கிலோக்கு மேல் இருக்கும் வரை, அதன் ஏற்றப் போக்கு தொடரும் என மதிப்பிடப்படுகிறது.

ரூபாய் டாலர் மதிப்பு

தொழில்நுட்ப ரீதியாக பார்க்கும்போது, காமெக்ஸ் தங்கம் அவுன்ஸ் ஒன்றுக்கு 4,300 - 4,330 டாலர் ஆதரவு மட்டத்துக்கு மேல் நிலைத்துள்ளது. இந்த மட்டத்தை தக்கவைத்தால், மீண்டும் 4,400 டாலர் மற்றும் அதன் பின் 4,500 டாலர் வரை உயர வாய்ப்பு இருப்பதாக கூறப்படுகிறது. உலக அரசியல் குழப்பங்கள், மத்திய வங்கிகளின் தங்க வாங்குதல், பாதுகாப்பான முதலீடு என்ற மனநிலை ஆகியவை தங்க விலைக்கு ஆதரவாக உள்ளன.

இந்திய சந்தை

இந்திய சந்தையில், எம்சிஎக்ஸ் தங்கம் கடந்த ஒரு வாரமாக ரூ.1,33,400 முதல் ரூ.1,35,300 வரையிலான வரம்பில் சுழன்று வருகிறது. ரூ.1,34,500 - ரூ.1,35,000 அளவை தெளிவாக கடந்து சென்றால், அடுத்த கட்டமாக ரூ.1,37,000 முதல் ரூ.1,40,000 வரை செல்லும் வாய்ப்பு இருப்பதாக சந்தை வல்லுநர்கள் கணிக்கின்றனர்.

வெள்ளி விலை

வெள்ளி விலையும் தற்போது உச்ச நிலைகளுக்கு அருகிலேயே வர்த்தகம் செய்து வருகிறது. காமெக்ஸ் சந்தையில் அவுன்ஸ் ஒன்றுக்கு 67 டாலருக்கு மேல் இருந்தாலும், நீண்டகாலத்தில் 70 முதல் 75 டாலர் வரை உயர வாய்ப்பு இருப்பதாக கூறப்படுகிறது. மொத்தத்தில், கிறிஸ்துமஸ் பண்டிகைக்கு முன் தங்க விலை சிறிய ஏற்ற இறக்கங்களை சந்தித்தாலும், நீண்டகாலத்தில் அதன் போக்கு இன்னும் நேர்மறையாகவே இருப்பதாக சந்தை நிபுணர்கள் தெரிவிக்கின்றனர். பொதுமக்களும் முதலீட்டாளர்களும் அவசர முடிவுகளை எடுக்காமல், சந்தை நிலவரத்தை கவனித்து முடிவெடுக்க வேண்டும் என்பதே நிபுணர்களின் ஆலோசனையாக உள்ளது.

English summary

After touching a historic high of nearly ₹1 lakh per sovereign, gold prices in India have seen a mild correction due to rupee strength. Investors are closely watching whether gold will rise again ahead of Christmas amid global market cues.