ஓசி டிவி கேட்ட அமைச்சரின் மனைவி!

விருதுநகர்: அரசின் இலவச கலர் டிவிக்கு ஆசைப்பட்ட தனது மனைவியை அமைச்சரே காட்டிக் கொடுத்தார்!

விருதுநகரில் குத்துச்சண்டை வளர்ச்சி மைய அடிக்கல் நாட்டு விழா நடைபெற்றது. இதில் சுகாதாரத்துறை அமைச்சர் சாத்துர் ராமச்சந்திரன் கலந்து கொண்டார். அப்போது அவர் பேசுகையில்,

இலவச கலர் டிவி, இலவச காஸ் அடுப்பு கிடைக்குமா என மக்கள் பலர் கவலைப்படுகின்றனர். அவர்களுக்கு அந்த கவலையே தேவையில்லை. காரணம் தமிழகத்தில் ரேஷன் கார்டு உள்ள அனைவருக்கும் இலவச கலர் டிவி கிடைக்கும்.

என் வீட்டில் ஒன்றுக்கு, நான்கைந்து கலர் டிவிக்கள் உள்ளது. இருந்தாலும் என் மனைவி என்னிடம் மாமா, ஓசியாக தானே கலர் டிவி கிடைக்குது. நமக்கும் கூட ஒரு கலர் டிவி வாங்கிட்டு வாங்க என்றார்.

பெரிய முதலாளிகள் தவிர அனைவருக்கும் இலவச கலர் டிவி கிடைக்கும் என்றார்.