எம்ஜிஆர் படத்தை பயன்படுத்துவதா?-கேப்டனுக்கு ராமராஜன் கண்டனம்

மார்த்தாண்டம்:

முன்னாள் தமிழக முதல்வர் எம்ஜிஆரின் படத்தை பயன்படுத்தும் உரிமை அதிமுகவினரை தவிர எவருக்கும் கிடையாது என்று நடிகர் ராமராஜன் கூறியுள்ளார்.

திசையன்விளையில் நடந்த அதிமுக பொதுக்கூட்டத்தில் பேசியதாவது,

படித்து பட்டம் பெறாத என்னை நாடாளுமன்ற உறுப்பினராக்கியவர் ஜெலலிதா அவர்கள். அவர் தொலைநோக்கு திட்டத்தை செயல்படுத்தினார். ஆனால் கருணாநிதி தொலைகாட்சி திட்டத்தை செயல்படுத்தி வருகிறார்.

நடிகர்கள் புதுப்படத்துக்கு தான் பூஜை போடுவார்கள். ஆனால் இப்போதெல்லாம் புதுக்கட்சிக்கு பூஜை போட ஆரம்பித்து விட்டார்கள். விஜயகாந்த் தனது கட்சி விளம்பரங்களில் எல்லாம் எம்ஜிஆர் படத்தை பயன்படுத்துகிறார்.

அவர் திரையுலகிற்கு வந்த காலத்தில் இருந்து எந்த படத்திலாவது எம்ஜிஆர் படத்தையோ அல்லது பெயரையோ பயன்படுத்தியது இல்லை. ஆனால் அரசியல் நடத்த மட்டும் எம்ஜிஆர் படத்தையும், பெயரையும் உபயோகிக்கிறார்.

எம்ஜிஆர் பெயரையும், படத்தையும் பயன்படுத்தும் உரிமை அதிமுகவினருக்கு மட்டும் தான் உள்ளது. வேறு எவருக்கும் கிடையாது என்றார் ராமராஜன்.