ஸ்டேட் வங்கியின் நிகர லாபம் ரூ. 2,478 கோடி

மும்பை: நாட்டின் மிகப் பெரிய வங்கியான ஸ்டேட் பேங்க் ஆஃப் இந்தியா (எஸ்பிஐ) மூன்றாவது காலாண்டில் ரூ.2,478 கோடியை நிகர லாபமாக ஈட்டியுள்ளது. இது, சென்ற நிதி ஆண்டின் இதே காலாண்டை விட 37 சதவீதம் (ரூ.1,809 கோடி) அதிகமாகும்.

இதே காலாண்டுகளில் இவ்வங்கியின் செயல்பாட்டு லாபம் 22.5 சதவீதம் அதிகரித்து, அதாவது ரூ.3,660 கோடியிலிருந்து ரூ.4,482 கோடியாக வளர்ச்சி கண்டுள்ளது. வங்கியின் நிகர வட்டி வருவாய் 35 சதவீதம் அதிகரித்து ரூ.4,256 கோடியிலிருந்து ரூ.5,758 கோடியாக உயர்ந்துள்ளது.

வங்கியின் மொத்த வருவாய் 38 சதவீதம் வளர்ச்சியடைந்துள்ளது. இது ரூ.21,255 கோடியாக அதிகரித்துள்ளது.

பாரத ஸ்டேட் வங்கியின் நிகர வட்டி வரம்பு 3.01 சதவீதத்திலிருந்து 3.15 சதவீதமாக உயர்ந்துள்ளது. வங்கி வழங்கிய கடன்கள் 28.5 சதவீதம் அதிகரித்து ரூ.5,03,829 கோடியாகவும், திரட்டிய டெபாசிட் 36 சதவீதம் உயர்ந்து ரூ.6,92,922 கோடியாகவும் அதிகரித்துள்ளன.

வங்கி வழங்கிய மொத்த கடன்களில் மொத்த வாராக்கடன் 2.82 சதவீதத்திலிருந்து 2.61 சதவீதமாகவும், நிகர வாராக்கடன் 1.44 சதவீதத்திலிருந்து 1.36 சதவீதமாகவும் குறைந்துள்ளது.