செல்போன்-மருந்துகள் விலை குறையும்; தங்கம் உயரும்

டெல்லி: மத்திய பட்ஜெட்டின் எதிரொலியாக உயிர் காக்கும் மருந்துகள், செல்போன்கள், எல்சிடி டிவிக்கள், பெரிய கார்கள், காலணிகள், பெட்ரோலால் இயங்கும் லாரிகள் விலைகள் குறையவுள்ளன.

அதே நேரத்தில் தங்கம், செட் டாப் பாக்ஸ்கள் ஆகியவற்றின் விலைகள் உயரவுள்ளன.

நிதியமைச்சர் பிரணாப் முகர்ஜி இன்று தாக்கல் செய்த பட்ஜெட்டில் கூறப்பட்டுள்ளதாவது:

தொலைக்காட்சிகளுக்கான செட் டாப் பாக்ஸ்கள் மீது 5 சதவீத சுங்க வரி விதிக்கப்படுகிறது. இதனால் இவற்றின் விலை அதிகரிக்கும்.

அதே நேரத்தில் எல்.சி.டி. தொலைக்காட்சி மீதான சுங்க வரி 10 சதவீதத்திலிருந்து 5 சதவீதமாகக் குறைக்கப்படுகிறது. இதனால் அவற்றின் விலைகள் குறையவுள்ளன.

மொபைல் போன்களின் உதிரிப் பாகங்கள் மீதான 4 சதவீத வரி ரத்து செய்யப்படுகிறது. இதனால் செல்போன்களின் விலையும் குறையவுள்ளது.

தோல் பொருட்கள், ஜவுளி, காலணிகள் மீதான சுங்க வரியும் குறைக்கப்படுவதால் அவற்றின் விலையும் குறையும்.

உயிர் காக்கும் மருந்துகள் மீதான 10 சதவீத இறக்குமதி வரி 5 சதவீதமாகக் குறைக்கப்படுகிறது. அதே போல இருதய அறுவை சிகிச்சைக்குப் பயன்படும் செயற்கை இருதய வால்வுகள் உள்ளிட்டவை மீதான வரியும் 7.5 சதவீதத்திலிருந்து 5 சதவீதமாகக் குறைக்கப்படுகிறது.

பயோ டீசல் மீதான சுங்க வரி 7.5 சதவீதத்திலிருந்து 2.5 சதவீதமாகக் குறைக்கப்படுகிறது.

தங்கக் கட்டிகள், தங்க நாணயங்கள் மீதான வரி 10 கிராமுக்கு ரூ. 100 என்று இருப்பது ரூ. 200 ஆக உயர்த்தப்படும். அதே போல மற்ற வகையிலான தங்கம் மீதான வரி 10 கிராமுக்கு ரூ. 250 என்று இருப்பது ரூ. 500 ஆக உயர்த்தப்படுகிறது. இதனால் தங்கத்தின் விலை தாறுமாறாக உயரும் என்று தெரிகிறது.

2000 சிசி என்ஜின்களைக் கொண்ட பெரிய கார்கள், வாகனங்கள் மீதான கலால் வரி ரூ. 20,000லிருந்து ரூ. 15,000 ஆகக் குறைக்கப்படுகிறது.

பெட்ரோலால் இயங்கும் லாரிகள் மீதான சுங்க வரி 20 சதவீதத்திலிருந்து 8 சதவீதமாகக் குறைக்கப்படுகிறது. அதே போல பெட்ரோலால் இயங்கும் லாரிகள், வாகனங்களின் சேஸிஸ்கள் மீதான வரியும் 20 சதவீதம் பிளஸ் ரூ.10,000லிருந்து 8 சதவீதம் பிளஸ் ரூ. 10,000 ஆகக் குறையும்.