எங்களுக்கு தலைமை காங். அல்ல, திமுகதான்-கார்த்திக்கு வி.சிறுத்தைகள் பதிலடி

சிதம்பரம்: நாங்கள் இடம் பெற்றிருப்பது திமுக தலைமையிலான கூட்டணியில்தான். மாறாக கார்த்தி சிதம்பரம் கூறுவது போல காங்கிரஸ் தலைமையிலான கூட்டணியில் அல்ல என்று கூறியுள்ளது விடுதலைச் சிறுத்தைகள்.

திருமாவளவன் எம்.பி. பதவியை ராஜினாமா செய்ய க் கோரிக்கை விடுத்த அகில இந்திய காங்கிரஸ் கட்சி உறுப்பினர் கார்த்தி ப.சிதம்பரத்திற்கு விடுதலை சிறுத்தைகள் கட்சி பதிலடி தந்துள்ளது.

இது குறித்து விடுதலை சிறுத்தைகள் கட்சியின் அனைத்து ஆசிரியர் கூட்டமைப்பு மாநில இணை செயலாளர் காவியச்செல்வன் வெளியிட்டுள்ள அறிகை...

தமிழகத்தில் விடுதலை சிறுத்தைகள் கட்சி தி.மு.க. தலைமையுடன் கூட்டணி வைத்துள்ளது. காங்கிரஸ் கட்சி தலைமையிலான கூட்டணியில் நாங்கள் இல்லை. இதை புரிந்து கொள்ளாமல் கார்த்தி சிதம்பரம் பேசியுள்ளார். இந்த செயல் சிறு பிள்ளைத்தனமானது.

தமிழகத்தில் விடுதலை சிறுத்தைகள் கட்சியின் பெரும்பாலான வாக்குகளைப் பெற்றுத்தான் காங்கிரஸ் கட்சியினர் எம்.பி.க்காளக உள்ளனர்.

சிதம்பரம் பாராளுமன்ற தொகுதியில் திருமாவளவன் தி.மு.க. , விடுதலை சிறுத்தைகள் செல்வாக்கினாலும் வெற்றி பெற்றார்.

திருமாவளவன் சிதம்பரம் பாராளுமன்ற தொகுதியில் கடந்த 2004 - ம் ஆண்டு நடந்த தேர்தலில் தனித்து போட்டியிட்டு 2,55,773 வாக்குகள் பெற்று 2 - ம் இடத்தை பெற்றார்.

ஆனால் கடந்த 1998 ம் தேர்தலில் காங்கிரஸ் கட்சி சிதம்பரம் தொகுதியில் தனித்து போட்டியிட்டு வெறும் 43,214 வாக்குகள் பெற்று படுதோல்வி அடைந்தது . இதை கார்த்திக் சிதம்பரம் உணர்ந்து பொறுப்போடு பேசவேண்டும் என்று கூறியுள்ளார் காவியச் செல்வன்.