மொகல் தோட்டத்தில் பூத்துக்குலுங்கும் வண்ண மலர்கள்... பொதுமக்கள் பார்வைக்கு திறப்பு

டெல்லி: வண்ண மலர்கள் பூத்துக்குலுங்கும் ஜனாதிபதி மாளிகையில் உள்ள மொகல் கார்டனை பொதுமக்கள் பார்வைக்காக பிரணாப் முகர்ஜி இன்று திறந்து வைத்தார். இந்த தோட்டத்தில் மார்ச் 17ம் தேதி வரை பார்வையாளர்கள் அனுமதிக்கப்படுவார்கள்.

மொகல் தோட்டத்தில் மூலிகைளும், கண்ணைக் கவரும் வண்ண மலர்களும் பூத்துக்குலுங்குகின்றன. இந்த தோட்டத்தில் காலை நேரத்தில் ஜனாதிபதி பிரணாப் முகர்ஜி நடைபயிற்சி மேற்கொள்வார். இந்த தோட்டம் ஆண்டு தோறும் பிப்ரவரி, மார்ச் மாதத்தில் பொதுமக்கள் பார்வைக்காக திறக்கப்படும். இந்த ஆண்டு பிப்ரவரி 16ம் தேதி முதல் மார்ச் 17-ம் தேதி வரை பார்வையாளர்கள் அனுமதிக்கப்பட உள்ளனர்.

மனம் மயக்கும் மலர்கள்

ஜனாதிபதி மாளிகை வளாகத்தில் 15 ஏக்கர் பரப்பளவில் அமைந்துள்ள இந்த தோட்டத்தில் ரோஸ், தலியா, காலண்டுலா, ஜெர்டிநரா, லினாரியா, லார்க்ஸ்புர், கஸ்னியா, வெர்பெனா, வியோலா, பான்சி கார்னேசன், கிரிசாந்தேமம், மேரிகோல்டு, சால்வியா போன்ற மலர்கள் பார்வையாளர்களின் கவனத்தை ஈர்க்கும். மொகல் கார்டனில் காலை 10 மணி முதல் மாலை 4 மணி வரை பொதுமக்கள் பார்வையிட அனுமதிக்கப்படுவார்கள். உணவுப் பொருட்களோ, தண்ணீரோ எதுவும் எடுத்துச் செல்ல அனுமதி இல்லை.

பிரணாப் முகர்ஜி அழைப்பு

இந்த தோட்டத்தில் தினமும் காலையில் மிகவும் மகிழ்ச்சியுடன் வாக்கிங் செல்வேன். இந்த மலர்களை பார்வையிட மக்களை வரவேற்கிறேன். பூத்துக்குலுங்கும் மலர்களை போன்று எதிர்காலத்தில் நமது நாடும் பிரகாசிக்கும் என பிரணாப் கூறியுள்ளதாக ராஷ்டிரபதி பவன் செய்தி வெளியிட்டுள்ளது.

கடந்த வருடம் 6.5 லட்சம் மக்கள் இந்த கார்டனை பார்த்து ரசித்தனர் இந்த ஆண்டு அதிக அளவில் பொதுமக்கள் வருவார்கள் என்று எதிர்பார்க்கப்படுகிறது.

English summary

President Pranab Mukherjee today opened for the general public the Mughal Gardens which will display some of the chosen best flowers and shrubs for visitors till March 17. Mukherjee took a stroll for about 30 minutes in the gardens going through minute details of the facilities and the flower carpets created in neat order in a 15-acre area of Rashtrapati Bhavan.