பஞ்சாப் தேர்தல்: அடடே! ஓரம்கட்டப்பட்ட காங். சீனியர்களையும் தேர்தல் களத்தில் இறக்கிய டெல்லி மேலிடம்!

Updated: Tuesday, December 7, 2021, 17:26 [IST]

Subscribe to Oneindia Tamil

சண்டிகர்: பஞ்சாப் சட்டசபை தேர்தல் காங்கிரஸ் மேலிடம் செயல்படுத்தி வரும் வியூகங்கள் இப்போது தேர்தல் களத்தில் ஆச்சரியத்தை ஏற்படுத்தி வருகின்றன. இதுவரை ஓரம்கட்டப்பட்ட சீனியர் தலைவர்களை உள்ளடக்கிய தேர்தல் குழுவை அறிவித்துள்ளது காங்கிரஸ் மேலிடம்.

பஞ்சாப் சட்டசபைக்கு அடுத்த ஆண்டு தேர்தல் நடைபெற உள்ளது. பஞ்சாப்பில் ஆளும் காங்கிரஸ் உட்கட்சி பூசல்களால் ஆட்சி அதிகாரத்தை இழக்கும்; அம்மாநிலத்தில் தொங்கு சட்டசபைக்குதான் வாய்ப்புகள் அதிகம் என்றே கருத்து கணிப்புகள் தெரிவிக்கின்றன.

பஞ்சாப் மாநிலத்தில் ஆளும் காங்கிரஸ், சிரோமணி அகாலிதளம்-பகுஜன் சமாஜ் கட்சி, ஆம் ஆத்மி, பாஜக, அமரீந்தர்சிங்கின் பஞ்சாப் லோக் காங்கிரஸ் ஆகியவை களத்தில் நிற்கின்றன. காங்கிரஸைப் பொறுத்தவரை முன்னாள் முதல்வர் அமரீந்தர்சிங்கால் பின்னடைவு ஏற்படும் என தெரிகிறது.

பாஜக நிலவரம்

அமரீந்தர்சிங் கட்சியானது பாஜகவுடன் கை கோர்க்கிறது. பஞ்சாப் மாநிலத்தைப் பொறுத்தவரை நீண்டகாலமாக பாஜக-சிரோமணி அகாலிதள் கூட்டணியே இருந்து வந்தது. மத்திய அரசின் 3 விவசாய சட்டங்கள் விவகாரத்தில் இந்த கூட்டணி முறிந்தது. இப்போது பஞ்சாப்பில் அமரீந்தர்சிங் எனும் குதிரை பாஜகவுக்கு கிடைத்திருக்கிறது. இது எந்த அளவுக்கு அக்கட்சிக்கு கை கொடுக்கும் என்பது உறுதியாக தெரியவில்லை.

காங். கோஷ்டி பூசல்

பஞ்சாப் ஆளும் காங்கிரஸானது தொடர்ந்து கோஷ்டி பூசலில் சிக்கி தவிக்கிறது. முதல்வர் சரண்ஜித்சிங் சன்னிக்கு எதிராக மாநில காங்கிரஸ் தலைவர் நவ்ஜோத்சிங் சித்து தொடர்ந்து குடைச்சல் கொடுத்து வருகிறார். இது நிச்சயம் தேர்தலில் கடுமையான பாதிப்புகளை ஏற்படுத்தக் கூடும் என்றே கூறப்படுகிறது. இந்த நிலையில் பஞ்சாப் மாநில தேர்தல் குழுவை காங்கிரஸ் மேலிடம் அறிவித்துள்ளது.

பஞ்சாப் தேர்தல் குழு

பஞ்சாப் காங்கிரஸ் தேர்தல் குழுவின் ஒருங்கிணைப்பாளராக மூத்த காங்கிரஸ் தலைவர் அம்பிகா சோனி நியமிக்கப்பட்டுள்ளார். வேட்பாளர் தேர்வுக் குழுவின் பொறுப்பாளராக அஜய் மக்கானும் தேர்தல் பிரசார பொறுப்பாளராக மூத்த தலைவர் சுனில் ஜாகரும் நியமிக்கப்பட்டுள்ளனர். அமரீந்தர்சிங் பதவி விலகிய போது முதல்வர் பதவிக்கு அம்பிகா சோனி பெயர் அடிபட்டது. அவரைத் தேடி வந்த முதல்வர் பதவியை வேண்டாம் என மறுத்தார். அத்துடன் பஞ்சாப் மாநிலத்தைப் பொறுத்தவரை சீக்கியர் ஒருவர்தான் முதல்வராக இருக்க வேண்டும் என்றும் அறிவித்தவர் அம்பிகா சோனி.

சீனியர்கள் ஹேப்பி

அமரீந்தர்சிங் குடைச்சல் கொடுத்த போது பஞ்சாப் களத்துக்கு வந்தவர் அஜய் மக்கான். அப்போது முதல்வர் பதவியை ரொம்பவே எதிர்பார்த்தவர் சுனில் ஜாகர். ஆனால் சரண்ஜித்சிங் சன்னி முதல்வராக்கப்பட்டதால் சுனில் ஜாகர் கடும் அதிருப்தி அடைந்தார். கட்சியின் சீனியர்களுக்கு மதிப்பே இல்லையா? எனவும் 2012-ல் கட்சிக்கு வந்த சரண்ஜித்சிங் முதல்வர்; 2017-ல் கட்சிக்கு வந்த சித்து மாநில தலைவர்.. என்ன நடக்கிறது என குமுறினார் சுனில் ஜாகர். இப்போது அவரையும் சமாதானப்படுத்தும் வகையில் தேர்தல் குழுவில் இணைத்திருக்கிறது காங்கிரஸ் மேலிடம்.