சென்னை வந்து புதுச்சேரி செல்லும் அமித்ஷா.. வழக்கம்போல் ட்விட்டரில் டிரெண்டாகும் #Go_Back_Amitshah

சென்னை: மத்திய உள்துறை அமைச்சர் அமித்ஷா புதுச்சேரி வர உள்ள நிலையில் ட்விட்டரில் #Go_Back_Amitshah என்ற ஹேஷ்டேக் டிரெண்டாக தொடங்கி இருக்கிறது.

நாளை புதுச்சேரியில் பல்வேறு நிகழ்வுகளில் கலந்துகொள்வதற்காக மத்திய உள்துறை அமைச்சர் அமித்ஷா ஒருநாள் சுற்றுப்பயணம் வருகிறார்.

இதற்கான பயண திட்டத்தில் கர்நாடக தலைநகர் பெங்களூரு விமான நிலையம் வந்து, அங்கிருந்து புதுச்சேரி செல்ல முடிவெடுக்கப்பட்டு இருந்த நிலையில், தற்போது அதற்கு பதிலாக சென்னை மாற்றப்பட்டுள்ளது.

சென்னையில் தங்கும் அமித்ஷா

இன்று மாலை டெல்லியிலிருந்து எல்லை பாதுகாப்பு படையின் தனி விமானத்தில் புறப்படும் அமித்ஷா இரவு 7:30 மணிக்கு சென்னை பழைய விமான நிலையம் வருகிறார். அங்கிருந்து காரில் புறப்பட்டு ஆவடியில் இருக்கும் சி.ஆர்.பி.எஃப்-இன் முகாம் அலுவலகத்தின் விருந்தினர் மாளிகையில் இரவு தங்க உள்ளார். நாளை காலை 8:40 மணிக்கு சென்னையிலிருந்து புதுச்சேரிக்கு ஹெலிகாப்டரில் அவர் புறப்பட இருக்கிறார்.

புதுச்சேரியில் ஒருநாள்

காலை 9:30 மணியளவில் புதுச்சேரிக்கு சென்றடையும் அமித்ஷா அங்கு நடைபெறும் நிகழ்ச்சிகளில் பங்கேற்றுவிட்டு, மாலை 5:30 மணியளவில் தனி ஹெலிகாப்டரில் புறப்படுகிறார். 6:15 மணியளவில் சென்னை பழைய விமான நிலையம் வந்தடையும் அமித்ஷா, அங்கிருந்து எல்லை பாதுகாப்புப் படையின் தனி விமானத்தில் டெல்லிக்கு திரும்பிச் செல்கிறார்.

டிரெண்டாகும் #Go_Back_Amitshah

பிரதமர் நரேந்திர மோடி, உள்துறை அமைச்சர் அமித்ஷா ஆகியோர் தமிழ்நாடு வரும் நேரத்தில் எல்லாம் அவர்களுக்கு எதிர்ப்பு தெரிவிக்கும் விதமாக #GobackModi, #GobackAmitsha போன்ற ஹேஷ்டேக்குகள் ட்விட்டரில் டிரெண்ட் செய்யப்படுவது வழக்கம். அந்த வகையில் தற்போது அமித்ஷாவின் வருகையை எதிர்த்து #Go_Back_Amitshah என்ற ஹேஷ்டேக்கை ட்விட்டரில் தமிழர்கள் டிரெண்ட் செய்து வருகின்றனர்.

Recite Tamil anthem or #Go_Back_Amitshah pic.twitter.com/D8EIYMXrzO

— Nitin Chavan (@a20nitin) April 23, 2022

இந்தி திணிப்புக்கு எதிர்ப்பு

குறிப்பாக டெல்லி ஜஹாங்கிர்புரியில் இஸ்லாமியர் வீடுகள் இடிப்பு, ராம நவமி கலவரங்கள், கர்நாடக மத பிரச்சனைகள் போன்றவற்றை குறிப்பிட்டு இந்த ஹேஷ்டேக்கை நெட்டிசன்கள் டிரெண்ட் செய்து வருகின்றனர். ஆங்கிலத்துக்கு மாற்றாக இந்தியை இணைப்பு மொழியாக்க வேண்டும் என அமித்ஷாவின் கருத்தை இந்த ஹேஷ்டேக்கை பகிர்ந்து விமர்சித்துள்ள தமிழர்கள் அவருக்கு எதிர்ப்பு தெரிவிக்கும் விதமாக ஏ.ஆர்.ரஹ்மான் வெளியிட்ட தமிழணங்கு படத்தை பகிர்ந்துள்ளனர். -

English summary

Amid Amitsha tour to Puducherry tommorrow #Go_Back_Amitshah hashtag trending in twitter