அண்ணாமலை பற்றி பேசாதீங்க.. விடுங்க.. திடீரென மீட்டிங்கில் சொன்ன பி.எல் சந்தோஷ்.. என்ன காரணம்?

Published: Monday, February 9, 2026, 19:02 [IST]

Subscribe to Oneindia Tamil

சென்னை: தமிழக பாஜகவில் நிலவும் உட்கட்சி பூசல்களுக்கு முற்றுப்புள்ளி வைக்கும் விதமாக, அக்கட்சியின் தேசிய அமைப்பு பொதுச்செயலாளர் பி.எல். சந்தோஷ் இன்று சென்னையில் முக்கிய ஆலோசனைக் கூட்டத்தை நடத்தினார். 2026 சட்டப்பேரவைத் தேர்தலை எதிர்கொள்வது குறித்து நிர்வாகிகளுக்கு அவர் பல்வேறு அதிரடி உத்தரவுகளைப் பிறப்பித்துள்ளார்.

அண்ணாமலைக்கு ஆதரவாக பி.எல். சந்தோஷ்:

சமீபகாலமாக, அண்ணாமலை தேர்தல் பணிகளில் இருந்து ஒதுங்கியிருப்பது குறித்து கட்சிக்குள் எழுந்துள்ள விமர்சனங்களுக்கு பி.எல். சந்தோஷ் முற்றுப்புள்ளி வைத்தார். கூட்டத்தில் அவர் பேசியதாவது:

"அண்ணாமலை தேர்தல் பொறுப்புகளில் இருந்து தற்காலிகமாக விலகியிருப்பது முழுக்க முழுக்க அவரது பெற்றோரின் உடல்நலக் காரணங்களுக்காக மட்டுமே. இது ஒரு தனிப்பட்ட மற்றும் மனிதாபிமான அடிப்படையிலான முடிவு. எனவே, அண்ணாமலைக்கு எதிராகவோ அல்லது அவரது முடிவுகள் குறித்தோ எவரும் தவறாகப் பேசக்கூடாது.", என்று கூறி உள்ளார்..

கட்சியின் வளர்ச்சிக்கு அண்ணாமலை ஆற்றிய பங்களிப்பை நினைவு கூர்ந்த அவர், இக்கட்டான சூழலில் அவருக்கு உறுதுணையாக இருக்க வேண்டுமே தவிர, உள்நோக்கத்தோடு விமர்சிக்கக் கூடாது என நிர்வாகிகளை எச்சரித்தார்.

2026 தேர்தல் வியூகம் மற்றும் கூட்டணிக் கட்டுப்பாடு:

அண்ணாமலைக்குப் பிறகு கட்சியின் பொறுப்புகளை கவனித்து வரும் நயினார் நாகேந்திரன் மற்றும் மாநில நிர்வாகிகள் முன்னிலையில் நடைபெற்ற இக்கூட்டத்தில் பி.எல். சந்தோஷ் வழங்கிய பிற அறிவுரைகள்,

கூட்டணி குறித்து நிதானம்: கூட்டணி கட்சிகளுடனான உறவில் விரிசல் ஏற்படும் வகையில் பொதுவெளியிலோ அல்லது ஊடகங்களிலோ கருத்து தெரிவிக்கக் கூடாது. "எதிரிக்கு (திமுக) சாதகமாக அமையும் எந்தவொரு செயலையும் செய்யாதீர்கள்" என்று அவர் வலியுறுத்தினார்.

பூத் கமிட்டி வலுப்படுத்துதல்: நம்மிடம் பேச்சு அதிகம் உள்ளது. செயல் குறைவாக உள்ளது. வெறும் மேடைப் பேச்சோடு நின்றுவிடாமல், அடிமட்ட அளவில் பூத் கமிட்டிகளை வலுப்படுத்துவதில் கவனம் செலுத்த வேண்டும். தேர்தல் வெற்றி என்பது வாக்குச்சாவடிகளில் தான் தீர்மானிக்கப்படுகிறது என்பதை நினைவில் கொள்ளுங்கள்.

உட்கட்சி பூசல் வேண்டாம்: கட்சிக்குள் இருக்கும் கருத்து வேறுபாடுகளைக் கட்சியின் உட் கூட்டங்களில் மட்டுமே விவாதிக்க வேண்டும். சமூக வலைதளங்களில் ஒருவருக்கொருவர் மோதிக்கொள்வதை ஒருபோதும் அனுமதிக்க முடியாது என அவர் கறாராகத் தெரிவித்தார்.

கூட்டணி இடங்கள்: தமிழகத்தில் பாஜக ஒரு வலுவான சக்தியாக உருவெடுத்துள்ளதைக் காட்டும் வகையில், 60 தொகுதிகள் வரையிலான பட்டியலைத் தயார் செய்ய அவர் உத்தரவிட்டுள்ளார். அதிமுகவிடம் பேச்சுவார்த்தை நடத்தும்போது, குறைந்தபட்சம் 40 முதல் 50 தொகுதிகளையாவது இறுதி செய்ய வேண்டும் என்ற நோக்கத்தில் இந்த 60 தொகுதிகள் பட்டியல் தயாரிக்கப்பட உள்ளது.

'ஏ' பிரிவு (Category A) தொகுதிகள்: எந்தெந்த தொகுதிகளில் பாஜகவிற்கு வெற்றி வாய்ப்பு அதிகம் உள்ளது அல்லது கணிசமான வாக்கு வங்கி உள்ளது என்பதை ஆராய்ந்து, சுமார் 25 முதல் 30 தொகுதிகளை "வெற்றி பெறக்கூடிய தொகுதிகள்" என அடையாளம் காணச் சொல்லியுள்ளார். இந்தத் தொகுதிகளை அதிமுகவிடமிருந்து கட்டாயமாகப் பெற வேண்டும் என்றும் அவர் அறிவுரை வழங்கி உள்ளதாக கூறப்படுகிறது.

"வெறுமனே அதிக இடங்களைப் பெற்றுத் தோற்பதை விட, போட்டியிடும் இடங்களில் அதிகப்படியானவற்றை வெற்றியாக மாற்ற வேண்டும்" என்பதே அவரது முக்கிய செய்தியாக இருந்தது. கடந்த காலங்களில் கிடைத்த குறைவான இடங்களை விட, இந்த முறை அதிமுக கூட்டணியில் பாஜகவின் பலத்தை நிரூபிக்கும் வகையில் இரட்டை இலக்க எண்ணிக்கையில் (Double Digits) எம்.எல்.ஏ-க்கள் சட்டசபைக்குச் செல்வதை உறுதி செய்ய வேண்டும் என்று அவர் இலக்கு நிர்ணயித்துள்ளார்.

தமிழக பாஜகவின் உள்கட்டமைப்பைச் சீரமைக்கவும், 2026 தேர்தலுக்குத் தொண்டர்களைத் தயார்படுத்தவும் இந்த வருகை மிகவும் முக்கியத்துவம் வாய்ந்ததாகக் கருதப்படுகிறது. அண்ணாமலையைச் சுற்றி எழுந்த சர்ச்சைகளுக்கு பி.எல். சந்தோஷ் முற்றுப்புள்ளி வைத்திருப்பது, கட்சிக்குள் நிலவிய சலசலப்பை ஓரளவுக்குக் குறைத்துள்ளதாகத் தெரிகிறது.

Published On February 9, 2026