“இல்ல இல்ல.. எடப்பாடி பழனிசாமிக்கு அதீத துணிச்சல்.. அதனால் இந்த கூட்டணி” கலாய்த்த சீமான்!
திருச்சி: மத்தியில் ஆட்சியில் இருக்கும் கட்சியுடன் இணங்கிச் செல்ல வேண்டும் என்பதற்காக பாஜக கருத்துகளை எடப்பாடி பழனிசாமி பேசி வருகிறார். அதீத துணிச்சல் காரணமாக அவ்வாறு பேசுகிறார் என கிண்டலாக கூறியுள்ளார் நாதக தலைமை ஒருங்கிணைப்பாளர் சீமான்.
நாம் தமிழர் கட்சியின் தலைமை ஒருங்கிணைப்பாளர் சீமான் திருச்சியில் இன்று செய்தியாளர்களைச் சந்தித்துப் பேசினார். அப்போது, அதிமுக தொடர்பான கேள்விகளுக்கும் பதில் அளித்தார்.
அதிமுக - பாஜக கூட்டணி குறித்து கேட்டதற்கு, "திராவிடக் கட்சிகள் வாக்காளர்களுக்கு பணம் கொடுத்து ஓட்டு வாங்கக்கூடிய நிலையில்தான் இருக்கிறார்கள். 2026க்கு பிறகும் பாஜக இரண்டு ஆண்டுகள் மத்தியில் ஆட்சியில் இருக்கும் என்பதால், அந்தக் கட்சியுடன் இணங்கிச் செல்ல வேண்டும் என்பதற்காக பாஜக கருத்துகளை எடப்பாடி பழனிசாமி பேசி வருகிறார்" என்றார்.
அப்படி என்றால் பயத்தின் காரணமாக எடப்பாடி பழனிசாமி அப்படி பேசுகிறாரா? என்று செய்தியாளர்கள் கேட்டதற்கு, அதீத துணிச்சல் காரணமாக அவ்வாறு பேசுகிறார் என கிண்டலாக பதிலளித்தார். 2026இல் அதிமுக ஆட்சிக்கு வரும் என எடுத்துக் கொள்ளலாமா? என்கிற கேள்விக்கு, "நான் அப்படி கூறவில்லை. என்னுடைய பேச்சுக்கு நீங்கள் பொழிப்புரை எழுத வேண்டாம்" எனத் தெரிவித்தார்.
ஆட்சியில் பங்கு என கட்சிகள் கோரிக்கை விடுப்பது பற்றிய கேள்விக்கு பதில் அளித்த சீமான், "தனிப் பெரும்பான்மையுடன் ஆட்சி அமைப்போம் எனப் பேசிக் கொண்டிருக்கிறார்கள். இந்தியா கூட்டணி ஆட்சியில் பங்குபெறும் திமுக, மாநிலத்தில் அதன் கூட்டணிக் கட்சிகளுக்கு ஆட்சியில் பங்கு தருவதில்லை.
'மத்தியில் கூட்டாட்சி மாநிலத்தில் தன்னாட்சி' எனக் கூறியவர்கள், தற்போது 'மத்தியில் கூட்டாட்சி மாநிலத்தில் குடும்ப ஆட்சி' என்கிற நிலையில் இருக்கிறார்கள். 2006ல் வலிமை குறைந்து இருந்தது திமுக. அப்போதும் கூட்டணி கட்சிகளுக்கு அமைச்சர் பதவி தரவில்லை. ஒரு கோடி நபர்களை உறுப்பினர்களாக இணைத்துள்ளதாக கூறும் திமுக, வாக்குக்கு காசு கொடுக்காமல் இருக்குமா?" என்று கேள்வி எழுப்பினார்.
'பசு பாதுகாப்பு' என பாஜக கூறுவதும், 'மாடுகளை பாதுகாக்கிறேன்' என நீங்கள் கூறுவதும் ஒன்றாக இருப்பதாக விமர்சனம் வைக்கப்படுகிறதே என்கிற கேள்விக்கு, "விமர்சனம் வைப்பவர்கள் பால், தயிர் சாப்பிட மாட்டார்களா?" என பதில் கேள்வி எழுப்பினார்.
Click it and Unblock the Notifications
Sign in with Google