அதிமுகவுக்கு தாவினார் செங்கோட்டையன் அண்ணன் மகன் கே.கே.செல்வன்.. திமுக + தவெகவுக்கு ஷாக்!

Updated: Tuesday, December 9, 2025, 13:22 [IST]

Subscribe to Oneindia Tamil

சென்னை: முன்னாள் அமைச்சர் கே.ஏ.செங்கோட்டையன் அண்ணன் மகன் குள்ளம்பாளையம் கே.கே.செல்வன் அதிமுகவில் இணைந்துள்ளார். கே.கே. செல்வன் திமுகவில் ஈரோடு வடக்கு மாவட்ட சுற்றுச்சூழல் அணி அமைப்பாளராகப் பொறுப்பு வகித்து வந்தார். அண்மையில் அவர் கட்சியில் இருந்து சஸ்பெண்ட் செய்யப்பட்டார்.

ஈரோடு மாவட்டம் கோபிசெட்டிபாளையம் அடுத்த குள்ளம்பாளையம் பகுதியைச் சேர்ந்தவர் கே.கே. செல்வன். இவர் முன்னாள் அமைச்சர் செங்கோட்டையனின் சொந்த அண்ணன் மகன் ஆவார். இவர் தமிழ்நாடு மருந்து வணிகர் சங்க செயலாளர் - அகில இந்திய மருந்து வணிகர் சங்க பொருளாளர் ஆகிய பொறுப்புகளை வகித்துள்ளார். கே.கே. செல்வன் முதலில் அ.தி.மு.கவில் இருந்தார். கடந்த 2020 ஆம் ஆண்டு அ.தி.மு.க.வில் இருந்து விலகி தி.மு.கவில் இணைந்தார்.

Former Minister Sengottaiyan s Nephew KK Selvan to Join AIADMK

தி.மு.கவில் கே.கே. செல்வனுக்கு ஈரோடு வடக்கு மாவட்ட சுற்றுச்சூழல் அணி அமைப்பாளர் பதவி வழங்கப்பட்டது. இந்நிலையில் கே.கே.செல்வன் கட்சியின் கட்டுப்பாட்டை மீறியும், கழகத்திற்கு அவப்பெயர் ஏற்படும் வகையில் செயல்பட்டு வந்ததால் அடிப்படை உறுப்பினர் உள்பட அனைத்து பொறுப்புகளில் இருந்தும் தற்காலிகமாக நீக்கப்படுவதாக தி.மு.க பொதுச்செயலாளர் துரைமுருகன் வெளியிட்டுள்ள அறிக்கையில் கூறியுள்ளார். இது ஈரோடு மாவட்ட திமுகவில் பெரும் பரபரப்பை ஏற்படுத்தியது.

இந்நிலையில், கே.கே.செல்வன், இன்று அதிமுக பொதுச் செயலாளர் எடப்பாடி பழனிசாமி முன்னிலையில் அதிமுகவில் இணைந்துள்ளார். ஆளுங்கட்சியான திமுகவில் இருந்து, முன்னாள் அமைச்சரின் அண்ணன் மகன் விலகி, எதிர்க்கட்சியான அதிமுகவில் சேர உள்ளது சலசலப்பை ஏற்படுத்தி உள்ளது.

இது குறித்து தி.மு.க.வில் இருந்து நீக்கப்பட்டிருக்கும் கே.கே. செல்வன் கூறுகையில், தி.மு.க.வில் நியாயமான கோரிக்கைகள் நிறைவேற்றப்படுவதில்லை. அதிகாரிகளின் ராஜ்ஜியம் தான் நடக்கிறது. முதலமைச்சர் பெயரைச் சொல்லி பல்வேறு தவறுகள் நடக்கிறது. இது போன்ற காரணங்களால் நான் மீண்டும் அதிமுகவில் இணைகிறேன் எனக் கூறியுள்ளார்.

கோபி சட்டமன்ற தொகுதியின் முக்கிய அரசியல் முகமான செங்கோட்டையன், சமீபத்தில் விஜய் தலைமையிலான தவெகவில் இணைந்தார். வரும் சட்டசபை தேர்தலில் கோபிசெட்டிப்பாளையம் தொகுதியில் தவெக சார்பில் செங்கோட்டையன் களமிறங்குவார் எனக் கூறப்படுகிறது.

இந்நிலையில் கோபி சட்டமன்ற தொகுதியில் செங்கோட்டையனுக்கு எதிராக அவரது அண்ணன் மகன் செல்வன் அதிமுக சார்பில் களமிறக்கப்படலாம் என எதிர்பார்க்கப்படுகிறது. செங்கோட்டையனின் அண்ணன் மகன் மீண்டும் அதிமுகவுக்கு சென்றது திமுக, தவெகவுக்கு அதிர்ச்சி கொடுத்துள்ளது.