கலைஞர் வாட்டர் பாட்டில்... மக்களை தேடி வரப்போகுது.. ஸ்டாலின் அரசு புதிய பிளான்

Updated: Thursday, July 22, 2021, 20:09 [IST]

Subscribe to Oneindia Tamil

சென்னை: கடந்த அதிமுக ஆட்சியில் கொண்டுவரப்பட்ட திட்டம் அம்மா குடிநீர் திட்டம் பெரும் வரவேற்பை பெற்றது. இந்த திட்டம் முன்னாள் முதல்வர் ஜெயலலிதா மறைவுக்கு பின்னர் படிப்படியாக முடங்கிப்போன நிலையில், கலைஞர் குடிநீர் திட்டம் என்ற பெயரில் மீண்டும் அதை கொண்டுவர தமிழ்நாடு அரசு போக்குவரத்து கழகம் திட்டமிட்டுள்ளது.

மறைந்த முன்னாள் முதல்வர் ஜெயலலிதா தலைமையிலான அதிமுக அரசு கடந்த 2013ம் ஆண்டு கொண்டுவந்த திட்டம் அம்மா குடிநீர்.

இதற்காக, கும்மிடிப்பூண்டியில், 2.47 ஏக்கரில், 10.5 கோடி ரூபாயில், குடிநீர் உற்பத்தி நிலையம் அமைக்கப்பட்டது.பேருந்து நிலையங்களில் 10 ரூபாய்க்கு, 1 லிட்டர் சுத்திகரிக்கப்பட்ட குடிநீர் பேருந்து நிலையங்களில் விற்பனை செய்யப்பட்டது.

10 ரூபாய் குடிநீர்

பொது சந்தையில் தனியார் குடிநீர் நிறுவனங்கள் தங்கள் தயாரிப்பான 1 லிட்டர் பாட்டில் நீரை 20 ரூபாய்க்கு விற்று வந்த நிலையில், அம்மா குடிநீர் 10 ரூபாய்க்கு கொடுக்கப்பட்டதால் பொது மக்களிடமும், பயணிகளிடமும் நல்ல வரவேற்பு கிடைத்தது.

நின்று போன திட்டம்

2016ல் ஜெயலலிதா மறைவுக்கு பின்னர் எடப்பாடி அரசிலும் தொடர்ந்தது. இந்த நிலையில், இந்த திட்டத்தை தொடர்ந்து நடைமுறைப்படுத்த கடந்த எடப்பாடி தலைமயிலான அதிமுக அரசு சுனக்கம் காட்டியதால் 2020-ல் இந்த திட்டம் முடங்கியது . அம்மா குடிநீர் எங்குமே கிடைக்காத நிலை ஏற்பட்டது. ஒரு கட்டத்தில் அம்மா குடிநீர் திட்டம் நின்று போனது.

கலைஞர் குடிநீர் திட்டம்

இந்த நிலையில், அந்த திட்டத்தை தற்போது கையிலெடுக்க போக்குவரத்துதுறை முடிவு செய்கிறது. இதற்கான முதல் கட்ட ஆலோசனையும் நடந்துள்ளது. விரைவில் கலைஞர் குடிநீர் திட்டம் கொண்டு வரப்படும் என்று அதிகாரிகள் தரப்பு கூறுகிறது. முதல்வர் ஸ்டாலினின் இதற்கு பச்சை கொடி காட்டிவிட்டதாக கூறப்படுகிறது.

சூப்பர் முடிவு

பொதுவாக ஆட்சியில் உள்ள கட்சிகள் தொடங்கும் திட்டத்தை அடுத்த கட்சிகள் மூடிவிடுவது வழக்கம் ஆனால் தமிழக முதல்வர் ஸ்டாலின் சற்று வித்தியாசமாக கடந்த அதிமுக ஆட்சியில் தொடங்கப்பட்டு, கடந்த ஆட்சியிலேயே மூடப்பட்ட திட்டத்தை மீண்டும் தொடங்கப்போகிறார். வரவேற்பை பெற்ற மலிவு விலை குடிநீர் வழங்கும் திட்டத்தை ஸ்டாலின் துவக்கி வைப்பார் என்று எதிர்பார்க்கலாம். தமிழகத்தில் கலைஞர் குடிநீர் இனி பேருந்துநிலையங்களில் விரைவில் கிடைக்க வாய்ப்பு உள்ளது.