தமிழக நிதித்துறை எங்களுக்கு வேண்டும்? விஜய்யிடம் கேட்ட ராகுல் காந்தி.. அதிகரிக்கும் நெருக்கடி!
சென்னை: டெல்லி அரசியல் வட்டாரங்களில் இப்போது தமிழ்நாடு கூட்டணி ஆட்சி பற்றிய பேச்சுதான் அதிகமாக எதிரொலித்துக் கொண்டிருக்கிறது. தமிழகத்தில் தவெக - காங்கிரஸ் கூட்டணி ஆட்சி அமைந்திருக்கும் நிலையில், அதிகாரப் பகிர்வு குறித்து ஒரு அமைதியான கயிறிழுப்புப் போட்டி தொடங்கியுள்ளது.
இந்த விவகாரத்தின் மையப்புள்ளியாக இருப்பவர் மக்களவை எதிர்க்கட்சித் தலைவர் ராகுல் காந்தி. தமிழக வெற்றிக் கழகத்தின் தலைவரும் தமிழக முதல்வருமான விஜய்யிடம் ராகுல் காந்தி ஒரு முக்கியமான கோரிக்கையை நேரடியாக முன்வைத்ததாகக் கூறப்படுகிறது.
கூட்டணி அரசில் முக்கிய பங்கு வகிக்கும் காங்கிரஸுக்கு, அதிகாரமிக்க 'நிதித்துறை' அமைச்சர் பதவியை ஒதுக்க வேண்டும் என்பதே ராகுல் காந்தியின் முக்கிய விருப்பம். இதன்மூலம் இரண்டு பெரிய நன்மைகள் கிடைக்கும் என டெல்லி தலைமை கணக்கு போடுகிறது. ஒன்று, திராவிட கட்சிகள் ஆதிக்கம் செலுத்தும் தமிழகத்தில் காங்கிரஸின் செல்வாக்கை அடிமட்டத்தில் மீண்டும் வளர்க்க முடியும். இரண்டாவது, புதிய அரசான தவெகவின் தேர்தல் வாக்குறுதிகளை நிறைவேற்ற டெல்லியின் அனுபவமிக்க பொருளாதார வழிகாட்டல் உதவும் என்பது அவர்களின் வாதம்.
ஆனால், இந்த அதிரடி கோரிக்கையை கேட்ட முதல்வர் விஜய், மிக அமைதியாக, "பார்க்கலாம்" என்று மட்டுமே ஒற்றை வரியில் நாசூக்காகப் பதிலளித்ததாகத் தகவல்கள் தெரிவிக்கின்றன.
புனித ஜார்ஜ் கோட்டையில் பதவி யாருக்கு?
விஜய் விட்டுக் கொடுக்காமல் மௌனமாக இருந்தாலும், டெல்லி காங்கிரஸ் முகாமில் ஆர்வம் குறையவில்லை. டெல்லியைச் சேர்ந்த ஒரு முன்னணி காங்கிரஸ் நாடாளுமன்ற உறுப்பினர் (MP), தனக்குத்தான் தமிழகத்தின் அடுத்த நிதியமைச்சர் பதவி கிடைக்கப்போகிறது என்று தனது ஆதரவாளர்களிடம் மிகவும் நம்பிக்கையுடன் பேசி வருவதாகத் தெரிகிறது.
இந்த எம்.பி. சமீபத்தில் தமிழக அரசியலில் பெரும் சலசலப்பை ஏற்படுத்தியவர். முந்தைய திமுக அரசை மிகக் கடுமையாக விமர்சித்து, "கடன் சுமையில் தத்தளித்த ஆட்சி" என்று பகிரங்கமாகப் பேசியிருந்தார். அப்போது காங்கிரஸ் தலைமையோ அல்லது தோழமைக் கட்சிகளோ அவரைத் கண்டிக்காமல் அமைதி காத்தன. இப்போது அதே எம்.பி.யை ஒரு "பொருளாதார நிபுணர்" என்றும், தமிழகத்தின் நிதி நிலைமையைச் சரிசெய்ய அவரே சரியான தேர்வு என்றும் டெல்லி வட்டாரங்கள் முன்னிறுத்துகின்றன.
மரிய வில்சன் என்ற முக்கிய காரணி
ஒருவேளை டெல்லியின் இந்த ஆசைக்கு முதல்வர் விஜய் சம்மதித்தால், அது சென்னையில் தவெகவுக்குள் பெரிய அரசியல் குழப்பத்தை ஏற்படுத்தும். ஏனென்றால், தற்போதைய நிதி அமைச்சராக இருப்பவர் நா. மரிய வில்சன்.
விஜய்யின் தீவிர நம்பிக்கைக்குரியவரான மரிய வில்சன் வசம் கஜானாவின் சாவி ஒப்படைக்கப்பட்டதன் முக்கிய நோக்கமே, அரசின் நிதி விவகாரங்கள் தவெகவின் முழுக் கட்டுப்பாட்டில்தான் இருக்க வேண்டும் என்பதுதான். இப்போது ஆட்சியைப் பிடித்த சில மாதங்களிலேயே, முக்கியமான நிதித்துறையைத் தேசியக் கட்சியான காங்கிரஸிடம் விட்டுக் கொடுத்தால், அது ஆரம்பத்திலேயே ஆட்சிக்கு பலவீனமாகப் பார்க்கப்படும்.
மேலும், மரிய வில்சனிடமிருந்து அந்தப் பதவியைப் பறிப்பது தவெகவின் முக்கியத் தலைவர்களிடையே பெரும் அதிருப்தியை ஏற்படுத்தும். மாநில சுயாட்சியைத் தனது முக்கியக் கொள்கையாகப் பேசும் கட்சிக்கு இது பின்னடைவாகவும் அமையலாம்.
தமிழகத்தைப் பொறுத்தவரை நிதித்துறை என்பது வெறும் அலுவலகப் பணி அல்ல; மக்களின் நலத்திட்டங்கள், டாஸ்மாக் கொள்கைகள் மற்றும் கடன் வாங்கும் வரம்புகள் என அனைத்தையும் தீர்மானிக்கும் அதிகார மையம். அதை மற்றொரு கட்சிக்கு விட்டுக்கொடுப்பது ஆட்சியின் கடிவாளத்தை மற்றவர் கையில் கொடுப்பது போன்றது.
தவெகவுக்கு முன் இருக்கும் சவால்கள்
காங்கிரஸின் இந்த நிபந்தனையை ஏற்பது தவெகவுக்கு எளிதான முடிவு அல்ல:
காங்கிரஸ் சொல்வதைக் கேட்டு நடக்கும் அரசு என்ற விமர்சனம் எழுந்து, எதிர்க்கட்சிகளுக்குப் பெரிய ஆயுதமாக மாறும். நம்பிக்கைக்குரிய மரிய வில்சனை ஓரங்கட்டுவது தவெகவின் நிர்வாகத்தில் பிளவை உண்டாக்கும். அதே சமயம் ஏற்றுக்கொள்ளவில்லை என்றால் காங்கிரஸ் இல்லாமல் தவெக ஆட்சியை தொடர முடியாத நிலை ஏற்படும்.
தவெகவின் தேர்தல் திட்டங்களுக்கும், காங்கிரஸின் பொருளாதாரப் பார்வைக்கும் இடையே முரண்பாடுகள் வந்தால், மக்கள் நலத்திட்டங்கள் முடங்கும் அபாயம் உண்டு.
முதல்வர் விஜய் சொன்ன "பார்க்கலாம்" என்ற வார்த்தை வெறும் தவிர்ப்பா, அல்லது பேரம் பேசுவதற்கான தொடக்கப் புள்ளியா என்பது இனிவரும் நாட்களில்தான் தெரியவரும். டெல்லி எம்.பி. ஒருபுறம் தீவிர முயற்சி எடுத்து வர, புனித ஜார்ஜ் கோட்டையோ தனது முடிவை வெளிக்காட்டாமல் மிகவும் கவனமாகப் பார்த்துக் கொண்டிருக்கிறது.
Click it and Unblock the Notifications
Sign in with Google
