"கக்கூஸ்".. இது என்னோட ஸ்டோரி.. உங்களுடையது என்ன? வாங்க பகிருங்கள்.. உதயநிதி போட்ட அவேர்னஸ் வீடியோ!

சென்னை: பொது கக்கூஸ்தானேனு அலட்சியம் செய்தால் சுகாதார மேம்பாட்டில் என்னென்ன நடக்கிறது என்பது குறித்து எம்எல்ஏ உதயநிதி ஸ்டாலின் ஒரு வீடியோ வெளியிட்டுள்ளார்.

கழிப்பறை திருவிழா - தீர்வுக்கான களம் என்ற தலைப்பில் உதயநிதி வெளியிட்ட வீடியோவில் கூறுகையில், டாய்லெட்- பொதுவெளியில் எப்போதும் பேச தயங்குற ஆனால் எப்போதும் பேசும் பொருளாக இருக்கக் கூடிய ஒரு விஷயம். ஆனால் அந்த நேரத்தில் பேசிவிட்டு சாதாரணமாக கடந்து போகும் விஷயம் கிடையாது.

இது நம்முடைய சுகாதாரம், ஆரோக்கியம் சார்ந்தது. சுகாதாரம் மட்டுமல்லாமல், நாம் வசிக்கிற நகரத்தோட, கிராமத்தோட இன்னும் சொல்ல போனால் நம் ஒட்டுமொத்த மாநிலத்தோட சுகாதாரமும் ஆரோக்கியமும் இதில் அடங்கியிருக்கிறது. நம்ம பயன்படுத்த தயங்குற, பயன்படுத்திட்டு சுத்தம் செய்யாமல் போகும் நம் வசிக்கும் பகுதியின் பொது கழிப்பறைகள் அசுத்தமாக இருந்தும் அக்கறையில்லாமல் கடந்து போகும் நம்மோட அலட்சியத்தால் சுகாதார மேம்பாட்டில் நாம் சந்திக்கிற சவால்களை நாம் முதலில் உணர வேண்டும்.

சேப்பாக்கம்

நான் சேப்பாக்கம் திருவல்லிக்கேணி தொகுதியின் சட்டசபை உறுப்பினராக தேர்வான பிறகு அந்த தொகுதியில் உள்ள அத்தனை பொது கழிப்பிடங்களையும் நேரில் போய் ஆய்வு செய்தேன். மாநகராட்சி கழிப்பறை, மருத்துவமனை கழிப்பறை என அனைத்தையும் ஆய்வு செய்து அவற்றை மக்கள் பயன்படுத்தும் வகையில் சீர்படுத்துமாறு அரசு அதிகாரிகளை வலியுறுத்தியுள்ளேன்.

தன்னார்வலர்கள்

இப்படி தீராமல் தொடரும் முக்கியமான பொது பிரச்சினைக்கு நிரந்தர தீர்வை உண்டாக்கி மக்களிடையே விழிப்புணர்வை ஏற்படுத்த வேண்டும் என்பதற்காகத்தான் Recycle Bin, Cheer NGO போன்ற அமைப்புகள் நம் பெருமைமிகு சென்னை மாநகராட்சியில் கழிப்பறை திருவிழா எனும் நிகழ்ச்சியை ஏப்ரல் 2, 3 ஆகிய தேதிகளில் சென்னை சாந்தோம் உயர்நிலைப் பள்ளியில் நடத்துகிறார்கள்.

பொது கழிப்பிடங்கள்

பொது கழிப்பிடங்களில் சுகாதாரத்தை உறுதி செய்வதற்காக பல்வேறு துறைகளை சார்ந்த அறிவியலாளர்கள், இன்னோவேட்டர்ஸ், தன்னார்வலர்கள் என பலரையும் இணைத்துக் கொண்டு விவாதங்கள் நடைபெறுகின்றன. இந்த நிகழ்ச்சியின் ஒரு பகுதியாக டாய்லெட் மேப்பத்தான் எனும் முன்னெடுப்பின் மூலம் கக்கூஸ் எனும் செயலியை நான் அறிமுகப்படுத்த போகிறேன்.

டாய்லெட் செயலி

டாய்லெட்டுக்கு ஒரு செயலியானு நீங்கள் கேட்கலாம். இன்று காய்கறி வாங்குவது முதல் ஆட்டோவில் போறது வரை எல்லாவற்றுக்கும் ஒரு ஆப் வந்துவிட்ட போது நம்முடைய முக்கியமான பிரச்சினையான சுகாதார பிரச்சினையான டாய்லெட்டுகளை மேப் செய்யறதுக்கு ஒரு ஆப் இருக்கக் கூடாதா என்ற கேள்விக்கான பதில்தான் இந்த கக்கூஸ் எனும் செயலி!

15 மண்டலங்கள்

சென்னை மாநகராட்சியில் 15 மண்டலங்களில் 860 பொது கழிப்பிடங்கள், இவை தவிர ஹோட்டல், மால், பெட்ரோல் பங்க் போன்ற பொது இடங்களை சுற்றியுள்ள கழிப்பிடங்களை பற்றிய முழுமையான தகவல் இந்த கக்கூஸ் ஆப்பில் இருக்கும். நீங்கள் அவற்றை பயன்படுத்தும் போது அவை சுகாதாரமாக பயன்படுத்தும் வகையில் இருக்கிறதா, ரேட்டிங் செய்வதாக இருந்தால் எத்தனை பாயிண்ட் தருவீர்கள் போன்ற மதிப்பீடுகளை பதிய முடியும்.

மாநகராட்சி

இந்த கருத்து கேட்பு மூலம் சம்பந்தப்பட்ட டாய்லெட்டுகளை மாநகராட்சி, தனியார் நிறுவனங்கள் சரி செய்து சுகாதார முறையில் பராமரிக்க இது ஒரு வாய்ப்பாக இருக்கும். சுத்தமான டாய்லெட்டை பராமரிப்பவர்களை கண்டறிந்து அவர்களுக்கு பரிசளித்து ஊக்கப்படுத்தவும் முடியும். இந்த நடவடிக்கை பொது கழிப்பிடங்களின் நிலை குறித்து தெரிந்து கொள்ள அரசு அதிகாரிகளுக்கும் பொது மக்களுக்கும் பெரிய உதவியாக இருக்கும். அதனால் சென்னையில் இருப்பவர்கள் இந்த கழிப்பறைத் திருவிழாவில் கண்டிப்பாக கலந்து கொள்ள வேண்டும். நம்ம நகரத்திற்கான சுகாதார பிரச்சினைகளை நாம் சேர்ந்து விவாதிப்போம். 3ஆம் தேதி சந்திப்போம். பொது கழிப்பறை குறித்த உங்கள் அனுபவங்களை #OnceinaLOO என்ற ஹேஷ்டேக் மூலமாக பகிர்ந்து கொள்ளுங்கள். நன்றி வணக்கம்
இவ்வாறு உதயநிதி அந்த வீடியோவில் பேசியுள்ளார்.

English summary

Udhayanidhi Stalin in his twitter says that This is my toilet tale, what’s yours? Share your toilet story and Join the International Toilet Festival Chennai on 2&3rd April 2022 at Santhome School, Mylapore to celebrate toilets through the toilet museum, toilet expo and conclave!