இனி லோன் வாங்க வேண்டாம்! அரசு செலவிலேயே வெளிநாடு போகலாம் - 12 லட்சம் வருமான வரம்பில் வந்த ஜாக்பாட்
சென்னை: வெளிநாடுகளில் உயர்கல்வி பயில விரும்பும் ஆதிதிராவிடர் மற்றும் பழங்குடியின மாணவர்களுக்குத் தமிழக அரசு முக்கிய அறிவிப்பு ஒன்றை வெளியிட்டுள்ளது. இதன்படி, 2026-27 கல்வியாண்டிற்கான "அண்ணல் அம்பேத்கர் அயலக கல்வி உதவித்தொகை" திட்டத்திற்கு ஜூன் 5ம் தேதிக்குள் இணைய வழியில் விண்ணப்பிக்கலாம் எனத் தெரிவிக்கப்பட்டுள்ளது. உலகத் தரம் வாய்ந்த முதல் 1000 பல்கலைக்கழகங்களில் சேரும் மாணவர்களுக்கு இந்த நிதி உதவி வழங்கப்பட உள்ளது.
தமிழ்நாடு அரசின் ஆதிதிராவிடர் மற்றும் பழங்குடியினர் நலத்துறை மூலம் செயல்படுத்தப்படும் அண்ணல் அம்பேத்கர் அயலக உயர்கல்வி உதவித்தொகைத் திட்டத்தின் கீழ், 2026-2027 ஆம் கல்வியாண்டிற்கான விண்ணப்பங்கள் தற்போது வரவேற்கப்படுகின்றன.
ஆதிதிராவிடர், மதம் மாறிய கிறிஸ்துவ ஆதிதிராவிடர் மற்றும் பழங்குடியினர் சமூகத்தைச் சேர்ந்த மாணவர்கள் வெளிநாடுகளில் உள்ள சிறந்த பல்கலைக்கழகங்களில் முதுகலை மற்றும் ஆராய்ச்சிப் படிப்புகளைத் தொடர நிதி உதவி வழங்குவதே இத்திட்டத்தின் முக்கிய நோக்கமாகும்.
1000 இடங்கள் - முன்னுரிமை
இந்த திட்டத்தின் கீழ் பயன்பெற விரும்பும் மாணவர்கள் சில குறிப்பிட்ட தகுதி நிபந்தனைகளைப் பூர்த்தி செய்திருக்க வேண்டும். குறிப்பாக, மாணவர்கள் தாங்கள் சேர விரும்பும் வெளிநாட்டுப் பல்கலைக்கழகமானது QS World University Ranking பட்டியலில் முதல் 1000 இடங்களுக்குள் இருப்பதை உறுதி செய்ய வேண்டும். இந்தத் தரவரிசையின் அடிப்படையிலேயே மாணவர்களின் விண்ணப்பங்கள் முன்னுரிமை அளிக்கப்பட்டு பரிசீலனை செய்யப்படும்.
வயது வரம்பைப் பொறுத்தவரை, முதுகலைப் பட்டம் பயில விரும்பும் மாணவர்கள் 2026 ஏப்ரல் 1-ம் தேதியன்று 35 வயதிற்கு உட்பட்டவர்களாக இருக்க வேண்டும். முனைவர் பட்டப் படிப்பு அல்லது பி.எச்.டி ஆராய்ச்சிப் படிப்புகளில் சேர விரும்புவோர் அதே தேதியில் 40 வயதைத் தாண்டியிருக்கக் கூடாது.
மேலும், விண்ணப்பதாரரின் குடும்ப ஆண்டு வருமானம் 12 லட்சம் ரூபாய்க்கு மிகாமல் இருக்க வேண்டும் என்பது கட்டாயமாக்கப்பட்டுள்ளது. இந்த உதவித்தொகைத் திட்டத்திற்கு விண்ணப்பிக்கும் முறை முற்றிலும் இணையதளம் வாயிலாக மட்டுமே அமையும் எனத் தெரிவிக்கப்பட்டுள்ளது.
தேவைப்படும் ஆவணங்கள் - சான்றிதழ்
தகுதியுடைய மாணவர்கள் www.tnadw.tn.gov.in அல்லது tnadwscholarship.in ஆகிய அதிகாரப்பூர்வ இணையதள முகவரிகளின் மூலம் ஆன்லைனில் விண்ணப்பிக்கலாம். விண்ணப்பங்களைச் சமர்ப்பிக்க 2026 மே 5-ம் தேதி முதல் ஜூன் 5-ம் தேதி வரை கால அவகாசம் வழங்கப்பட்டுள்ளது. எக்காரணம் கொண்டும் நேரடியாகவோ அல்லது தபால் மூலமாகவோ அளிக்கப்படும் விண்ணப்பங்கள் ஏற்றுக்கொள்ளப்படமாட்டாது என அரசு தெளிவுபடுத்தியுள்ளது.
விண்ணப்பிக்கும் போது மாணவர்கள் சில முக்கியமான ஆவணங்களைச் சமர்ப்பிக்க வேண்டியது அவசியமாகும். வெளிநாட்டுப் பல்கலைக்கழகத்திலிருந்து பெறப்பட்ட சேர்க்கை கடிதம் (University Offer/Admission Letter), ஆன்லைன் மூலம் பெறப்பட்ட சாதிச் சான்றிதழ் மற்றும் சமீபத்திய குடும்ப வருமானச் சான்றிதழ் ஆகியவை முதன்மையானவை. மேலும், 10-ம் வகுப்பு, 12-ம் வகுப்பு மற்றும் இளநிலை அல்லது முதுநிலை பட்டப்படிப்புகளின் மதிப்பெண் சான்றிதழ்கள், பட்டச் சான்றிதழ் அல்லது தற்காலிகச் சான்றிதழ் ஆகியவற்றைப் பதிவேற்றம் செய்ய வேண்டும்.
அடையாளச் சான்றாக ஆதார் அட்டை, குடும்ப அட்டை மற்றும் வெளிநாடு செல்வதற்கான கடவுச்சீட்டு (Passport) நகல்களை இணைக்க வேண்டும். பெற்றோரின் அல்லது விண்ணப்பதாரரின் சமீபத்திய 3 மாத சம்பளச் சீட்டு மற்றும் வருமான வரி தாக்கல் செய்த ஆவணங்கள் இருந்தால், அவற்றையும் சமர்ப்பிக்க வேண்டும். மாற்றுத்திறனாளி மாணவர்களாக இருந்தால் அதற்கான UDID அடையாள அட்டையைப் பதிவேற்ற வேண்டும்.
விண்ணப்பங்கள் - ஸ்கேன்
நிர்ணயிக்கப்பட்ட கால அவகாசத்திற்குப் பிறகு பெறப்படும் விண்ணப்பங்கள் கண்டிப்பாக நிராகரிக்கப்படும் என்பதால், மாணவர்கள் கடைசி நேரம் வரை காத்திருக்காமல் முன்கூட்டியே தேவையான அனைத்து ஆவணங்களுடன் விண்ணப்பிக்குமாறு கேட்டுக்கொள்ளப்படுகிறார்கள். விண்ணப்ப படிவத்தில் கேட்கப்பட்டுள்ள அனைத்து விபரங்களையும் சரியாகப் பூர்த்தி செய்து, ஸ்கேன் செய்யப்பட்ட ஆவணங்களைத் தெளிவாகப் பதிவேற்றம் செய்ய வேண்டும்.
இது தொடர்பான அரசாணைகள் மற்றும் விரிவான வழிகாட்டுதல்களைத் துறையின் இணையதளத்தில் விரிவாகக் காணலாம். விண்ணப்பிக்கும் நடைமுறையில் ஏதேனும் சந்தேகங்கள் அல்லது தொழில்நுட்பக் கோளாறுகள் ஏற்பட்டால், மாணவர்கள் 1800-599-7638 என்ற கட்டணமில்லா தொலைபேசி எண்ணைத் தொடர்புகொண்டு உரிய விளக்கங்களைப் பெறலாம் என ஆதிதிராவிடர் மற்றும் பழங்குடியினர் நலத்துறை அறிவித்துள்ளது.
Click it and Unblock the Notifications
Sign in with Google