சென்னை மெட்ரோ ரயில் பயணிகள் கவனத்துக்கு.. டிச.17ல் ரூ.5 கட்டணத்தில் செல்லலாம்! யாருக்கு பொருந்தும்

சென்னை: சென்னை மெட்ரோ ரயிலில் மீண்டும் வரும் டிசம்பர் 17 ம் தேதி ரூ.5 கட்டணத்தில் மக்கள் பயணிக்கலாம் என தெரிவிக்கப்பட்டுள்ளது. இந்த கட்டண சலுகை என்பது யாருக்கு பொருந்தும் என்பது பற்றியும் சென்னை மெட்ரோ ரயில் நிர்வாகம் தெரிவித்துள்ளது.

சென்னையில் 2 வழித்தடங்களில் மெட்ரோ ரயில் இயங்கி வருகிறது. நீலநிற வழித்தடத்தில் விம்கோ நகர் முதல் சர்வதேச விமான நிலையம் வரை மெட்ரோ ரயில் பயணிக்கிறது. அதேபோல் பச்சை வழித்தடத்தில் சென்னை சென்ட்ரல் முதல் செயின்ட் தாமஸ் மவுண்ட் வரையும் மெட்ரோ ரயில் இயக்கப்பட்டு வருகிறது.

தினமும் இந்த மெட்ரோ ரயிலில் ஏராளமானவர்கள் பயணம் செய்து வருகின்றனர். போக்குவரத்து நெரிசலில் சிக்காமல் மெட்ரோ ரயிலில் வேகமாக செல்ல முடியும் என்பதால் அதிகமான மக்கள் மெட்ரோ ரயில் பயணத்தை தேர்வு செய்து வருகின்றனர்.

இதுதொடர்பாக சென்னை மெட்ரோ ரயில் நிர்வாகம் இன்று வெளியிட்டுள்ள அறிவிப்பில் கூறப்பட்டுள்ளதாவது: சென்னை மெட்ரோ இரயில் நிறுவனத்தின் நிறுவன நாளை முன்னிட்டு 03.12.2023 அன்று க்யூஆர் பயணச்சீட்டுகளை (Static QR; Mobile QR; Paytm; Whatsapp and PhonePe) பயன்படுத்தி பயணித்தபயணிகளுக்கு சென்னை மெட்ரோ இரயில் நிறுவனம் வெறும் ரூ.5 என்ற பிரத்யேகக் கட்டணத்தை வழங்கியது.

​இந்நிலையில் மிக்ஜாம் புயல் மற்றும் கனமழை காரணமாக (03.12.2023) அன்று மெட்ரோ பயணிகள் அதிகளவில் பயணிக்க இயலாத காரணத்தினால் மீண்டும் வரும் 17.12.2023 (ஞாயிற்றுக்கிழமை) அன்றும் மெட்ரோ பயணிகள் இச்சலுகையை பயன்படுத்தி வெறும் ரூ.5 என்ற பிரத்யேகக்கட்டணத்தில் பயணிக்கலாம்.

​இந்த பிரத்யேக கட்டணம் டிசம்பர் 17, 2023 (ஞாயிற்றுக்கிழமை) அன்று மட்டுமே செல்லுபடியாகும். மேலும் இது இ-க்யூஆர் பயணச்சீட்டுகளுக்கு (Static QR; Mobile QR; Paytm; Whatsapp and PhonePe) மட்டுமே பொருந்தும். சென்னை மெட்ரோ இரயில் நிறுவனத்தின் பயண அட்டை, சிங்கார சென்னை அட்டை, மொபைல் ஆப் மூலம் ஸ்டோர் வேல்யூ பாஸ் மற்றும் காகித க்யூஆர் ஆகிய பயணச்சீட்டு முறைக்கு இச்சலுகைக்கு பொருந்தாது.

பந்தாடிருச்சே! மிக்ஜாம் புயல் காரணமாக சென்னை மெட்ரோ ரயில் நிறுவனத்துக்கு ரூ.210 கோடி சேதம்!
​
பயணிகளின் ஒட்டு மொத்த பயண அனுபவத்தை மேம்படுத்தவும், டிஜிட்டல் பயணச்சீட்டுகளை ஊக்குவிக்கவும் இந்த பிரத்யேகக் கட்டண சலுகை வழங்கப்படுகிறது. ​சென்னை மெட்ரோ இரயில் நிறுவனம், மெட்ரோ பயணிகள் மற்றும் பொதுமக்கள் இதனை பயன்படுத்தி கொள்ளுமாறு கேட்டுக்கொள்கிறது'' என தெரிவிக்கப்பட்டுள்ளது.

English summary

It has been informed that people can travel in the Chennai Metro train again on December 17 at a fare of Rs.5. The Chennai Metro Rail Administration has also informed to whom this fare concession is applicable.