விநாயகர் சிலை ஊர்வலம்.. எங்கள் நிலைப்பாட்டில் மாற்றமில்லை.. அண்ணாமலை பரபரப்பு பேட்டி!

Updated: Saturday, September 4, 2021, 11:35 [IST]

Subscribe to Oneindia Tamil

சென்னை: தமிழ்நாடு மருத்துவம் மற்றும் மக்கள் நல்வாழ்வு துறை அமைச்சா் மா.சுப்ரமணியன் நேற்று டெல்லி சென்று மத்திய சுகாதாரத்துறை அமைச்சர் மான்சுக் மாண்டவியாவை சந்தித்தார்.

நீட் தேர்வு விவகாரம், எய்ம்ஸ் மருத்துவமனை, கூடுதல் தடுப்பூசி உள்ளிட்ட 10 கோரிக்கைகள் குறித்து மத்திய அமைச்சரிடம் அவர் வலியுறுத்தினார். தமிழகத்தில் நீட் தேர்வில் இருந்து விலக்கு அளிக்க வேண்டும் என்று அவர் முக்கிய கோரிக்கையாக வைத்தார்.

ஒத்துழைக்க வேண்டும்

இந்த நிலையில் நீட் தேர்வுக்கு விலக்கு கேட்பதை விட்டு விட்டு நீட் தேர்வை நடத்த தமிழக அரசு ஒத்துழைக்க வேண்டும் என்று தமிழக பா.ஜ.க தலைவர் அண்ணாமலை கூறியுள்ளார். இது தொடர்பாக சென்னை விமான நிலையத்தில் அவர் கூறியதாவது:- தமிழக சுகாதாரத்துறை அமைச்சர் மா சுப்பிரமணியன் நீட் தேர்வு விலக்கு உள்பட கோரிக்கைகளை வலியுறுத்தி மத்திய அமைச்சரை சந்தித்துள்ளார்.

தேர்தல் வாக்குறுதி

தி.மு.க ஆட்சிக்கு வந்தவுடன் நீட் தேர்வு நடக்காது என முதலமைச்சர் ஸ்டாலின் கூறி வந்தார். தேர்தல் வாக்குறுதியை அவர்கள் நிறைவேற்றவில்லை. ஆனாலும் ஏழை எளிய மாணவர்களுக்கு நீட் எதிரானது கிடையாது. 10 நாளில் நடக்க உள்ள நீட் தேர்வில் நல்ல முறையில் நடத்தி மாணவர்களுக்கு சோதனை போன்ற பிரச்சனை தராமல் நல்ல சூழ்நிலையை ஏற்படுத்த தமிழக அரசு துணை நிற்க வேண்டும்.

நிலைப்பாட்டில் தெளிவு

விநாயகர் சதுர்த்தி விழாவில் சிலைகள் வைப்பது தொடர்பாக பா.ஜ.க நிலைப்பாடு தெளிவாக உள்ளது கொரோனா சூழல் காரணமாக கட்டுப்பாடுகளை போடுவதற்கு தமிழக அரசுக்கு உரிமை உள்ளது. இதில் எந்த மாற்றுக் கருத்தும் இல்லை. தமிழகத்தில் இரண்டாம் அலை கட்டுக்குள் வந்துள்ளது. மூன்றாவதாக அலைக்கு எந்த சாத்தியக்கூறுகளும் தென்படவில்லை

ஏற்புடையது அல்ல

இப்படி இருக்கும் பட்சத்தில் விநாயகசதுர்த்திக்கு அனுமதிக்க மாட்டேன் எனக் கூறுவது ஏற்புடையது கிடையாது. கட்டுப்பாடுகளை மீறினால் அமைப்பாளர்கள் மீது நடவடிக்கை எடுக்கலாம். மகாராஷ்டிராவில் தமிழகத்தை விட கொரோனா பாதிப்பு அதிகமாக இருந்தாலும் அங்கு கட்டுப்பாட்டை போட்டு அனுமதி அளிக்கின்றனர். ஆனால் தமிழகத்தில் மட்டும் அனுமதி மறுப்பது ஏன் என்று தெரியவில்லை. இன்னும் காலம் இருக்கிறது. இதனை தமிழக அரசு மறுபரிசீலனை செய்யும் என்ற நம்பிக்கை உள்ளது. இவ்வாறு அண்ணாமலை தெரிவித்தார்.