ஆபரேஷன் சிந்தூர் நடவடிக்கையை நேரடியாக கண்காணித்த ராணுவ தளபதி! வெளியானது புதிய புகைப்படங்கள்

டெல்லி: ஆபரேஷன் சிந்தூர் நடவடிக்கையின்போது, ஆபரேஷன்ஸ் ரூமிலிருந்து ராணுவ உயர் அதிகாரிகள் ராணுவத்தின் செயல்பாடுகளை கண்காணித்துக் கொண்டிருந்தனர். இது தொடர்பான புகைப்படங்கள் அடங்கிய புத்தகத்தை ராணுவம் வெளியிட்டிருக்கிறது.

அதில், ராணுவத் தலைமை ஜெனரல் உபேந்திர திவேதி, கடற்படை தளபதி அட்மிரல் தினேஷ் கே திரிபாதி, விமானப்படை தளபதி ஏர் சீஃப் மார்ஷல் ஏபி சிங் ஆகியோர் ராணுவ நடவடிக்கைகளை உண்ணிப்பாக கண்காணித்துக் கொண்டிருந்திருக்கின்றனர்.

பஹல்காம் தாக்குதலை தொடர்ந்து மே.7ம் தேதியன்று இந்திய ராணுவம் ஆபரேஷன் சிந்தூர் நடவடிக்கையை தொடங்கியது. பாகிஸ்தான் ஆக்கிரமிப்பு காஷ்மீர் மற்றும் பாகிஸ்தானில் உள்ள பயங்கரவாத முகாம்கள் இலக்கு வைக்கப்பட்டன. இதனையடுத்து நள்ளிரவு 1.05 மணிக்கு இந்திய விமானப்படை தாக்குதலை தொடங்கியது. மொத்தம் 25 நிமிட தக்குதலில் அனைத்து இலக்குகளும் வெற்றிகரமாக அழிக்கப்பட்டன. இதில் 100க்கும் அதிகமான பயங்கரவாதிகள் கொல்லப்பட்டனர்.

இந்த தாக்குதல் நேரத்தில் முப்படைகளின் தளபதிகளும், ஆபரேஷனல் ரூமில் ராணுவத்தின் நடவடிக்கைகளை நேரடியாக கவனித்துக்கொண்டிருந்தனர். இது தொடர்பான புகைப்படங்கள் அடங்கிய புத்தகங்கள் ராணுவத்தினருக்கு கொடுக்கப்பட்டிருக்கிறது. ஆபரேஷன் சிந்தூர் நடவடிக்கையை ஆவணப்படுத்தும் விதமாக இந்த புத்தகம் விநியோகிக்கப்பட்டிருப்பதாக சொல்லப்படுகிறது.

பயங்கரவாதத்தை நாங்கள் எந்த வகையிலும் கொஞ்சம் கூட ஏற்றுக்கொள்ள மாட்டோம் என்பதை உணர்த்துவதாக ஆபரேஷன் சிந்தூர் நடவடிக்கை இருந்திருக்கிறது.

ஆனால் இந்த தாக்குதலை தவறாக புரிந்துக்கொண்ட பாகிஸ்தான் வேண்டும் என்றே இந்தியா மீது பதில் தாக்குதலை தொடங்கியது. ஆனால் பாகிஸ்தானின் அனைத்து முயற்சிகளும் தோற்கடிக்கப்பட்டன. இந்தியாவின் பலத்தை இந்த தாக்குதல் மூலம் பாகிஸ்தான் நன்கு உணர்ந்துக்கொண்டது. மட்டுமல்லாது பயங்கரவாதத்திற்கு எதிராக இந்தியா எவ்வளவு வீரியமாக இருக்கும் என்பதையும் சர்வதேச நாடுகளுக்கு ஆபரேஷன் சிந்தூர் விளக்கியிருக்கிறது என்பது குறிப்பிடத்தக்கது.

English summary

During Operation Sindhura, senior military officials monitored the army’s operations from the operations room. The army has released a book containing photographs related to this.