"நான் தமிழ்ல பேசுனா உங்களுக்கு புரியுமா..." மக்களவையில் கனிமொழி அதிரடி கேள்வி..! வைரலாகும் வீடியோ

Updated: Friday, December 10, 2021, 16:52 [IST]

Subscribe to Oneindia Tamil

டெல்லி: மத்திய அரசு அறிவிக்கும் திட்டங்களின் பெயர்கள் அனைத்து மாநில மக்களுக்கும் புரியும்படி வைப்பதில் என்ன பிரச்சனை என திமுக எம்பி கனிமொழி மக்களவையில் கேள்வி எழுப்பிய வீடியோ வைரல் ஆகி வருகிறது.

"ஆத்ம நிர்பார் பாரத் அபியான்"

ஆத்ம நிர்பார் பாரத் அபியான்" எனப்படும் சுய-சார்பான இந்தியா இயக்கம் கடந்த 2020ம் ஆண்டு மே மாதம் பிரதமர் நரேந்திர மோடியால் கொண்டு வரப்பட்டது. பொருளாதாரம், உள்கட்டமைப்பு, அமைப்பு, துடிப்பான மக்கள் மற்றும் தேவை ஆகியன நாட்டின் 5 தூண்கள் என குறிப்பிட்ட பிரதமர் மோடி, நாட்டின் மொத்த உள்நாட்டு உற்பத்தியில் 10 சதவீதத்துக்கு சமமான 20 லட்சம் கோடி ரூபாய் மதிப்பில் பொருளாதாரத் தொகுப்பினை அறிவித்திருந்தார்.
வேலைவாய்ப்பைப் பெருக்குவதற்காக மகாத்மா காந்தி தேசிய ஊரக வேலை உறுதியளிப்புத் திட்டத்துக்கான நிதி ஒதுக்கீட்டில் ரூ 40,000 கோடி அதிகரிப்பு, எதிர்கால தொற்றுகளை சமாளிக்க பொது சுகாதாரத்தில் முதலீடுகள் அதிகரிப்பு, பெரு நிறுவனங்கள் தொழில் செய்வதை சுலபமாக்குதல், 2020-21க்கு மட்டும் மாநிலங்களின் கடன் வாங்கும் அளவை 3 சதவீதத்தில் இருந்து 5 சதவீதமாக அதிகரித்தல் போன்றன இத் திட்டத்தின் முக்கிய அம்சங்கள் ஆகும்.

பேச்சில் தடுமாறிய கனிமொழி

கிளாஸ்கோ காலநிலை மாநாட்டில் இந்தியா அளித்த நெட் ஜீரோ உள்ளிட்ட உறுதிமொழிகள் குறித்தும், காலநிலை மாற்றத்தை எதிர்கொள்ள மத்திய அரசு மேற்கொள்ள இருக்கும் திட்டங்கள் குறித்தும், இதுகுறித்து மத்திய, மாநில அரசுகள் ஆலோசிப்பதின் முக்கியத்துவம் குறித்தும் மக்களவையில் விவாதம் நடைபெற்றுக் கொண்டிருந்தது. அப்போது எழுந்து பேசிய திமுக எம்பி கனிமொழி, "ஆத்ம நிர்பார் பாரத் அபியான்" என்ற திட்டத்தின் பெயரை உச்சரிக்க மிகவும் சிரமப்பட்டதாக தெரிகிறது. அந்த வார்த்தை இந்தி என்பதால் கனிமொழியால் தெளிவான உச்சரிப்புடன் கூறமுடியவில்லை. அப்போது அதை சரியாக உச்சரிக்க சபாநாயகரும் மற்ற வடமாநில உறுப்பினர்களும் உதவினர்.

திட்டப் பெயர்கள் ஆங்கிலத்தில் வேண்டும்

இதையடுத்து இந்தியில் உள்ள திட்டப் பெயர்கள் புரியும்படி இல்லை என நகைச்சுவையாக மக்களவையில் கூறினார். மேலம் பிரதமர் நரேந்திர மோடியால் அறிவிக்கப்படும் மத்திய அரசின் திட்டங்களின் பெயர்களை உச்சரிப்பதற்கே சிரமமாக இருக்கிறது என குறிப்பிட்டார். பெயரை உச்சரிக்கவே கடினமாக இருக்கும்போது அந்த திட்டதின் பயன்களை மக்கள் எப்படி புரிந்து கொள்வார்கள் என வினவினார். பன்மொழி கொண்ட இந்திய நாட்டில் அனைவருக்கும் இந்தி தெரியாது என்பதால், அனைத்து தரப்பினருக்கும் புரியும் வகையில் அந்தந்த மாநில மொழிகளிலோ அல்லது ஆங்கிலத்திலேயோ திட்டங்களின் பெயர்களை வைப்பதில் என்ன சிக்கல் எனவும் கேள்வி எழுப்பினார் கனிமொழி.

தமிழில் பேசினால் புரியுமா?

அப்போது குறுக்கிட்டு பேசிய ஒரு உறுப்பினர், "உங்களுக்கு புரியாமல் போனால் நாங்கள் என்ன செய்வது?" என கேட்க, அதற்கு சட்டென்று பதிலடி தந்த கனிமொழி "அப்படி என்றால் நான் தமிழில் பேசுகிறேன்... உங்களுக்கு புரியுதா என்று சொல்லுங்கள்" என்றார். இந்தியில் பேச நாடாளுமன்றத்தில் தேடை இல்லை, மற்ற மொழிகள் பேசுவதாக இருந்தால் மொழிபெயர்ப்பாளர்களை முன்கூட்டியே ஏற்பாடு செய்வதற்காக முன் அனுமதி பெறவேண்டும் எனக் கூறிய கனிமொழி, அதேவேளையில் இந்தியில் பேசும்போது அதை மற்றவர்களுக்கு மொழி பெயர்க்க எந்த ஏற்பாடுகளும் நாடாளுமன்றத்தில் இல்லை என குறிப்பிட்டார். மக்களவையில் திமுக எம்பி நகைச்சுவையுடன் பேசிய இந்த வீடியோ தற்போது சமூக வலைதளங்களில் வைரலாகி வருகிறது.