டெல்லியில் கொடூரம்.. மாணவர்களை தாக்கிய ரவுடிகள்! மாணவிகள் மீது கொடூரத் தாக்குதல்.. போலீஸ் வேடிக்கை
டெல்லி: டெல்லியில் ஜனநாயகப் போராட்டம் என்ற பெயரில் ஒன்று கூடும் மாணவர்கள் மற்றும் இளைஞர்கள் மீது ஏவப்படும் வன்முறை ஒட்டுமொத்த தேசத்தையும் அதிர வைத்துள்ளது. தேர்தல் ஆணையத்தின் முறைகேடுகளை எதிர்த்தும், தலைமைத் தேர்தல் ஆணையர் ஞானேஷ் குமார் பதவி விலகக் கோரியும் 'காக்ரோச் ஜனதா கட்சி' (CJP) நடத்திய போராட்டத்தின் போது, வலதுசாரி குண்டர்களும் வன்முறைக் கும்பல்களும் களமிறக்கப்பட்டு போராட்டத்தில் ஈடுபட்ட இளைஞர்கள் மீது கொடூரத் தாக்குதல் நடத்தப்பட்டுள்ளது.
மிகவும் அதிர்ச்சியளிக்கும் வகையில், கல்லூரி மாணவிகள், பெண் பத்திரிகையாளர்கள் கூட இந்தத் தாக்குதலில் இருந்து தப்ப முடியவில்லை. ஆயிரக்கணக்கான காவல் துறையினர் கண்முன்னே நின்றுகொண்டிருந்த போதே இந்த அராஜகம் அரங்கேறியுள்ளது.
பட்டப்பகலில் வெறிச்செயல்: என்ன நடந்தது?
தலைநகர் டெல்லியில் கன்னாட் பிளேஸ், பாலிகா பஜார் மற்றும் சிவிக் சென்டர் பகுதிகளில் நேற்று முதல் தொடர்ச்சியாக அமைதிப் போராட்டத்தில் ஈடுபட முயன்ற மாணவர்களை ஒரு கும்பல் குறிவைத்தது. பஜ்ரங் தளம் உள்ளிட்ட வலதுசாரி அமைப்புகளைச் சேர்ந்த 30-க்கும் மேற்பட்ட நபர்கள் திரண்டு வந்து, கைகளில் கொடிகளுடனும் தடிகளுடனும் மாணவர்களை விரட்டி விரட்டித் தாக்கினர்.
போராட்டங்களை ஆவணப்படுத்த வீடியோ எடுத்த ஊடகப் பிரிவு மாணவர்கள், பத்திரிகையாளர்கள் மீது கொலைவெறித் தாக்குதல் நடத்தப்பட்டது. ஒரு மாணவரின் தலையில் பலத்த காயம் ஏற்பட்டு ரத்தம் சொட்டச் சொட்ட அவர் தப்பியோடியுள்ளார். "CJP-க்கு ஆதரவாக பொய் செய்தி பரப்பினால் விடமாட்டோம்; போலீசாரால் துப்பாக்கியைப் பயன்படுத்த முடியாது என்பதால் நாங்கள் அவர்களைப் பாதுகாக்கிறோம்" என்று அந்த வன்முறைக் கும்பல் கூச்சலிட்டபடி பொதுமக்களை மிரட்டியுள்ளது.
மாணவிகள் மீது கொடூரத் தாக்குதல்
ஜனநாயக ரீதியாக தங்கள் உரிமையைக் கேட்க வந்த கல்லூரி மாணவிகள் மிகக் கேவலமான முறையில் தாக்கப்பட்டுள்ளனர்.
சமூக வலைதளங்களில் வைரலாகி வரும் வீடியோ ஒன்றில், ஒரு மாணவி கதறி அழுதபடி பேசியுள்ளார்: "எங்களை ஒரு கும்பல் சுற்றி வளைத்துத் தாக்கியது. உதவிக்கு யாரும் வரவில்லை. என் கண் முன்னால் நின்ற டெல்லி போலீஸ் எல்லாவற்றையும் வேடிக்கை மட்டுமே பார்த்துக் கொண்டிருந்தது".
மாணவிகளின் ஆடைகளைக் கிழித்தும், அத்துமீறியும் அந்த ரவுடிகள் வெறியாட்டம் ஆடியதாக போராட்டக் குழுவினர் கண்ணீருடன் தெரிவித்துள்ளனர். பெண் பத்திரிகையாளர்களும் assaulted செய்யப்பட்டு அச்சுறுத்தலுக்கு ஆளாகினர்.
போலீஸ் பாதுகாப்பு யாருக்கு? ரவுடிகளுக்கா அல்லது மக்களுக்கா?
டெல்லி எல்லைகளிலும் முக்கிய இடங்களிலும் 25,000-க்கும் மேற்பட்ட துணை ராணுவப் படையினரும் டெல்லி போலீசாரும் பாதுகாப்பு பணியில் இருப்பதாகக் கூறப்பட்டது. ஆனால், இவ்வளவு பெரிய படை பலம் இருந்தும், வன்முறைக் கும்பல் எப்படி சுதந்திரமாகச் சுற்றித் திரிந்து மாணவர்களைத் தாக்க முடிந்தது?
வன்முறையில் ஈடுபட்ட குண்டர்கள் மீது உடனடியாக முதல் தகவல் அறிக்கை (FIR) பதிவு செய்யப்படவில்லை. மாறாக, அடிவாங்கிய மாணவர்களையே குண்டுக்கட்டாகத் தூக்கிச் சென்று தற்காலிக முகாம்களில் அடைத்துள்ளது காவல்துறை.
அரசாங்கம் தனது சொந்தக் காவல்துறையைக் கொண்டு அடக்குவதோடு மட்டுமல்லாமல், தெரு ரவுடிகளையும் ஏவி விட்டு மாணவர்களை அச்சுறுத்துகிறதா? என எதிர்க்கட்சிகள் ஆவேசமாகக் கேள்வி எழுப்பியுள்ளன.
ஜனநாயகத்தின் குரல்வளை நெரிக்கப்படுகிறதா?
வாக்குரிமை பறிபோனதை எதிர்த்துக் கேட்ட இளைஞர்கள், இன்று தெருக்களில் ரத்தம் சிந்தும் நிலைக்குத் தள்ளப்பட்டுள்ளனர். ஒரு தவறைச் சுட்டிக்காட்டும் சொந்த நாட்டுப் பிள்ளைகளை, ஆயுதம் ஏந்திய குண்டர்களைக் கொண்டு ஒடுக்குவது காட்டுமிராண்டித்தனத்தின் உச்சம்.
பெண்களுக்குப் பாதுகாப்பு இல்லாத சூழலை தலைநகரின் இதயப் பகுதியிலேயே உருவாக்கிவிட்டு, சட்டத்தின் ஆட்சி நடப்பதாகக் கூறுவது அப்பட்டமான பொய். தடியடிகளும், குண்டர்களின் வெறியாட்டங்களும் இளைஞர்களின் எழுச்சியை ஒருபோதும் அடக்கிவிடாது; மாறாக அதிகார வர்க்கத்தின் முகமூடியைத்தான் உலகிற்குத் தோலுரித்துக் காட்டியுள்ளது.
Click it and Unblock the Notifications
Sign in with Google
