நாட்டில் முதன்முறையாக.. உச்சநீதிமன்ற முதல் பெண் தலைமை நீதிபதியாக நாகரத்னா தேர்வு செய்ய வாய்ப்பு!

Updated: Wednesday, August 18, 2021, 19:07 [IST]

Subscribe to Oneindia Tamil

டெல்லி: உச்சநீதிமன்றத்தில் நீதிபதிகளாக நியமிக்க மத்திய அரசுக்கு உச்சநீதிமன்ற கொலிஜியம் ஒன்பது பெயர்களை பரிந்துரை செய்துள்ளது. இதில் மூன்று பெண் நீதிபதிகள் அடங்குவார்கள்.

உச்ச நீதிமன்றத்தின் தலைமை நீதிபதி என்.வி. ரமணா, மூத்த நீதிபதிகள் யு.யு.லலித், ஏஎம்கான்வில்கர், டிஒய் சுந்திரசூட், எல் நாகேஸ்வரராவ் ஆகியோர் அடங்கிய கொலிஜியம் இந்த 9 நீதிபதிகள் அடங்கிய பரிந்துரையை மத்திய அரசுக்கு அனுப்பியுள்ளது.

பெண் தலைமை நீதிபதி

கடந்த 2 ஆண்டுகளாக உச்ச நீதிமன்ற நீதிபதிகளை நியமிப்பதில் பல்வேறு தாமதங்கள் ஏற்பட்டு வந்த நிலையில் இதற்கு விடை கிடைக்கும் வகையில் கொலிஜியம் பரிந்துரை அமைந்துள்ளது. கொலிஜியம் பரிந்துரை செய்த 3 பெண் நீதிபதிகளில் கர்நாடக மாநில உயர் நீதிமன்ற நீதிபதி நாகரத்னாவும் ஒருவர். இந்த பரிந்துரை வரிசையின்படி பெண் நீதிபதி நாகரத்னா 2027-ம் ஆண்டில் உச்ச நீதிமன்றத்தில் தலைமை நீதிபதியாக வருவதற்கான வாய்ப்புகள் அதிகம் இருக்கின்றன.

நேரடியாக தேர்வு

அப்படி 2027-ம் ஆண்டு நாகரத்னா உச்ச நீதிமன்ற தலைமை நீதிபதியாக பொறுப்பேற்றால் இந்தியாவின் முதல் பெண் தலைமை நீதிபதி என்ற மிகப்பெருமையை நாகரத்னா பெறுவார். இதேபோல் இந்த 9 பேரில் நீதிபதிகள் அல்லாத ஒருவர் மூத்த வழக்கறிஞர், கூடுதல் சொலிசிட்டர் ஜெனரல், பிஎஸ் நரசிம்மா உச்ச நீதிமன்ற நீதிபதியாகத் நேரடியாக தேர்ந்தெடுக்கப்பட்டுள்ளார்.

நீதிபதிகள் எண்ணிக்கை?

உச்சநீதிமன்றத்தில் 34 நீதிபதிகள் இருக்க வேண்டிய இடத்தில் 26 பேரே இருந்து வந்தனர். ஆகஸ்ட் 12-ம் தேதி அன்று உச்சநீதிமன்ற நீதிபதி ஆர்எஃப் நாரிமன் ஓய்வு பெற்ற பிறகு உச்சநீதிமன்றத்தில் நீதிபதிகளின் எண்ணிக்கை 25 ஆகக் குறைந்துள்ளது. கொலிஜியம் அனுப்பிய நீதிபதிகள் பரிந்துரையை மத்திய அரசு ஏற்றுக்கொள்ளும் பட்சத்தில் நீதிபதிகள் எண்ணிக்கை 34 ஆக உயரும். அடுத்தவாரம் புதன்கிழமை நீதிபதி நவின் சின்ஹா ஓய்வு பெற்றால், கூடுதலாக இடம் காலியாகும் என்பது குறிப்பிடதக்கது.