அரசமைத்ததும் மோடி, ராமர் கோவிலை கட்ட வேண்டும்- ஆர்எஸ்எஸ் மூத்த தலைவர்

டெல்லி: நரேந்திர மோடி தலைமையில் பாஜக ஆட்சி அமைந்ததும், மூன்று முக்கியப் பணிகளுக்கு மோடி முக்கியத்துவம் தர வேண்டும். ராமர் கோவிலை அயோத்தியில் கட்ட வேண்டும், அரசியல் சாசனச் சட்டத்தின் 370வது பிரிவை நீக்க வேண்டும், நாடு முழுவதும் பொது சிவில் சட்டத்தை அமல்படுத்த வேண்டும் என்று மூத்த ஆர்.எஸ்.எஸ். தலைவர் எம்.ஜி.வைத்யா கூறியுள்ளார்.

இவை அனைத்தையும் அரசியலமைப்புச் சட்டத்திற்கு உட்பட்டு மோடி செய்ய வேண்டும் என்றும் வைத்யா தெரிவித்துள்ளார்.

இதுகுரித்து அவர் கூறுகையில், இந்த மூன்று முக்கிய விஷயங்களிலும் மோடி அரசு ஆக்கப்பூர்வமான, வேகமான நடவடிக்கையை எடுக்க வேண்டும் என்று நான் எதிர்பார்க்கிறேன்.

இந்த பிரச்சினைகளில் அரசின் சார்பில் முதல் நடவடிக்கை இருக்க வேண்டும் என்றும் நான் விரும்புகிறேன். இருப்பினும் இவை அனைத்தும் எனது சொந்த கருத்துத்தான். ஆர்எஸ்எஸ்ஸின் கருத்து அல்ல.

ஆனால் இந்த மூன்று பிரச்சினைகளிலும் தனது கவனத்தையும், முக்கியத்துவத்தையும் பாஜக குறைத்துக் கொண்டதால்தான் 2004 தேர்தலில் அது தோல்வியடைய காரணம் என்பதை மறந்து விடக் கூடாது.

வரும் லோக்சபா தேர்தலில் பாஜகவுக்கு மட்டும் 230 முதல் 240 சீட்கள் கிடைக்கும் என்பது எனது கணிப்பு. மேலும், மத்தியில் நிலையான தேசிய ஜனநாயகக் கூட்டணி ஆட்சி அமையும் என்றும் நான் உறுதியாக நம்புகிறேன் என்றார் வைத்யா.

இதற்கிடையே, ஆர்.எஸ்.எஸ்ஸின் தினசரியான தருண் பாரத்தின் முன்னாள் ஆசிரியர் சுதிர் பாதக் இதுகுறித்துக் கூறுகையில், இப்படிப்பட்ட கோரிக்கைகள் நியாயமானவையே. இதனால் பாஜக அரசின் சுமூகமான செயல்பாட்டுக்கு எந்தப் பாதிப்பும் வராது.

தற்போது உள்ள ஆர்.எஸ்.எஸ், தலைமையும், பாஜக தலைமையும் ஒத்த வயது கொண்டவர்களையே கொண்டுள்ளன. எனவே இவற்றை மிகவும் திறமையாக இரு தரப்பும் இணைந்து செயல்படுத்த முடியும், அமல்படுத்த முடியும். மேலும் கடந்த பாஜக அரசுகளை விட தற்போது அமையப் போகும் பாஜக அரசு இவற்றை திறமையாக கையாளும் என்பதும் எனது கணிப்பாகும் என்றார்.

மேலும் அவர் கூறுகையில் ஆர்.எஸ்.எஸ். அமைப்பின் சில முக்கியக் கவலைகளை மோடி புறக்கணிக்க மாட்டார் என்றே நான் கருதுகிறேன். இருப்பினும் பிராந்தியக் கட்சிகளின் ஆதரவையும் மோடி பெறுவார் என்பதால் அவர்களின் கட்டாயங்களும், நெருக்கடிகளும் கண்டிப்பாக வரும். ஆனால் இதை மோடி திறமையாக சமாளிப்பார் என்று நான் எதிர்பார்க்கிறேன் என்றார் அவர்.

English summary

RSS ideologue M.G. Vaidya has said that the issues of repealing Article 370, building a Ram temple in Ayodhya and introducing a Uniform Civil Code could be resolved within the parameters of the Constitution. A senior ideologue of the Rashtriya Swayamsevak Sangh (RSS) says he expects a government headed by Narendra Modi to make some forward movement on the three issues of concern to it — repealing Article 370, building a Ram temple in Ayodhya and introducing a Uniform Civil Code