அடுத்தடுத்து அவமதிக்கப்படும் எம்ஜிஆர் சிலைகள்! நேற்று சாணி.. இன்று காவி! கொந்தளிக்கும் ர.ர.க்கள்!

Updated: Tuesday, December 20, 2022, 20:39 [IST]

Subscribe to Oneindia Tamil

மதுரை : மதுரையில் மாவட்டம் நீதிமன்றம் அருகே உள்ள எம்ஜிஆரின் சிலையில் காவித் துண்டு அணிவிக்கப்பட்டதால் பரபரப்பு ஏற்பட்ட நிலையில், காவி துண்டு அணிவித்த நபர்கள் குறித்து மதுரை அண்ணாநகர் காவல்துறையினர் நேரில் விசாரணை நடத்தினர்.

மதுரை மாநகர் கேகே நகர் மாவட்ட நீதிமன்றத்தின் அருகில் எம்ஜிஆர் மற்றும் ஜெயலலிதா சிலையானது நிறுவப்பட்டுள்ளது.

இங்குள்ள எம்.ஜி.ஆரின் சிலை கடந்த 2001ஆம் ஆண்டு ஏப்ரல் மாதம் மறைந்த முதலமைச்சர் ஜெயலலிதாவால் திறந்துவைக்கப்பட்டது. இந்நிலையில் கடந்த 2019ஆம் ஆண்டு எம்.ஜிஆரின் சிலை அருகிலேயே மறைந்த முதலமைச்சர் ஜெயலலிதாவின் சிலையும் அமைக்கப்பட்டுள்ளது.

எம்ஜிஆர் சிலை

இதில் ஒவ்வொரு ஆண்டும் எம்.ஜி.ஆர், ஜெ., பிறந்தநாள் மற்றும் நினைவுநாட்களில் ஏராளமான தொண்டர்கள் மாலை அணிவித்து மரியாதை செய்வார்கள். இந்த நிலையில் மதுரை கேகே நகர் பகுதியில் உள்ள எம்ஜிஆரின் முழு உருவச்சிலையில் இன்று மதியம் மர்ம நபர்கள் காவித்துண்டை அணிவித்து சென்றுள்ளது பரபரப்பை ஏற்படுத்தியது.

காவி துண்டு

இதனையடுத்து அந்த பகுதிக்கு வந்த அண்ணாநகர் காவல் துறையினர் எம்ஜிஆர் சிலை மீது அணிவிக்கப்பட்டிருந்த காவிதுண்டைய அகற்றினர். இதனையடுத்து காவித்துண்டை அணிவித்தது யார் என்பது குறித்தான விசாரணையை நடத்து வருகின்றனர். முதற்கட்டமாக சிலை அருகே உள்ள கடைகளில் காவல்துறையினர் விசாரணை நடத்தியதோடு அந்த பகுதியில் உள்ள சிசிடிவி காட்சிகளையும் ஆய்வு செய்து வருகின்றனர்

சிலை சேதம்

ஏற்கனவே தமிழகத்தில் திருவள்ளுவர், அண்ணா, பெரியார், அம்பேத்கர் சிலைகளுக்கு காவிச்சாயமும், காவித்துண்டும் அணிவிக்கப்படும் சம்பவங்கள் சர்ச்சையையும், பரபரப்பையும் ஏற்படுத்தும் நிலையில், மதுரை கே.கே.நகர் பகுதியில் உள்ள எம்ஜிஆர் சிலை மீது காவித்துண்டு போடப்பட்டு இருந்தது அதிர்ச்சியை ஏற்படுத்தி உள்ளது. கடந்த சில நாட்களுக்கு முன்னர் எம்ஜிஆர் சிலை சேதப்படுத்தப்பட்டது குறிப்பிடத்தக்கது.

சாணி வீச்சு

நேற்று முன் தினம் சேலம் மாவட்டம் ஆத்தூர் அருகே அம்மம்பாளையம் ஊராட்சி மன்ற அலுவலகம் முன்பு நிறுவப்பட்டிருந்த எம்ஜிஆர் சிலை அவமதிக்கப்பட்டது. மர்ம நபர்கள் சிலர் எம்.ஜி.ஆர் சிலை மீது சாணியை வீசிய நிலையில் ஆத்தூர் சட்டமன்ற உறுப்பினர் ஜெய்சங்கரன் ஒன்றிய செயலாளர் உள்ளிட்டோர் அப்பகுதியில் கூடியதால் பரபரப்பு நிலவியது. இந்நிலையில் இரு நாட்களில் அடுத்தடுத்து எம் ஜி ஆர் சிலை அவமதிக்கப்பட்டது அதிமுகவினிடையே கடும் கொந்தளிப்பை ஏற்படுத்தி இருக்கிறது.