மோடி கண்டிப்பாக தமிழர் தான்.. மோடி தான் உண்மையான டெல்டாக்காரர்.. அண்ணாமலை சொன்ன காரணம்!
மதுரை: பிரதமர் மோடி தமிழ்நாட்டில் பிறக்காவிட்டாலும் தமிழ் மீது ஆர்வம் காட்டுவதால் நிச்சயமாக அவரும் தமிழர்தான் என பாஜக மாநிலத் தலைவர் அண்ணாமலை கூறியுள்ளார்.
மதுரையில் செய்தியாளர்களைச் சந்தித்துப் பேசிய பாஜக மாநிலத் தலைவர் அண்ணாமலை, “மதுரையில் ஜல்லிக்கட்டு நடைபெறும் அலங்காநல்லூர், பாலமேட்டுக்கு பதிலாக கீழக்கரையில் ஜல்லிக்கட்டு மைதானம் கட்டப்பட்டுள்ளது. இந்த மைதானத்துக்கு காளை வளர்ப்பவர்ர்கள், மாடுபிடி வீரர்கள், பொதுமக்கள் என யாருமே செல்ல தயாராக இல்லை. இந்த மைதானத்தை வேறு விதத்தில் பயன்படுத்த அரசு யோசிக்க வேண்டும். மைதானத்துக்கு கருணாநிதியின் பெயரைச் சூட்டுவதை பாஜக கண்டிக்கிறது.
தமிழகத்தில் எந்த திட்டமாக இருந்தாலும் பெரியார், அண்ணா, கருணாநிதி பெயர்களை சூட்டுகின்றனர். இதை அனுமதித்தால் தமிழகத்தில் பிறக்கும் அனைத்து குழந்தைகளுக்கும் இந்த 3 பெயர்களை மட்டும் தான் சூட்ட வேண்டும் என சட்டம் நிறைவேற்றினாலும் நிறைவேற்றுவார்கள். ஜல்லிக்கட்டுக்கு தடை விதித்தது திமுக, காங்கிரஸ். ஜல்லிக்கட்டை மீட்டெடுத்தவர் பிரதமர் மோடி. அந்த மைதானத்துக்கு ஜல்லிக்கட்டுக்கு பாடுபட்டவர்களின் பெயரை சூட்ட வேண்டும்.
பிரதமர் மோடி என்ற மனிதருக்குத்தான் ஓட்டு. 2024 மக்களவைத் தேர்தல் மோடிக்கான தேர்தல். தேர்தல் கூட்டணி பற்றி இப்போது பேச வேண்டியதில்லை. தேர்தல் நேரத்தில் முடிவு செய்யப்படும். மோடியை ஏற்றுக்கொள்பவர்கள் பாஜக கூட்டணிக்கு வரலாம். பாஜக கூட்டணியை தேசிய தலைமை முடிவு செய்யும்.
கூட்டணி பெரிதாக இருந்தால் தான் தேர்தலில் ஜெயிக்க முடியும் என்பது சரியல்ல. திமுக கூட்டணி பெரிதாக இருந்தாலும், நாடாளுமன்றத் தேர்தலில் மிகப்பெரிய தோல்வியைச் சந்திக்கும். நாடாளுமன்ற தேர்தலுடன் பல கட்சிகளின் அரசியல் காலம் முடியப்போகிறது. தமிழகத்தில் பாஜக பலமாக உள்ளது.
தற்போது திமுகவில் உள்ள 35 அமைச்சர்களில் எத்தனை பேர் தமிழர்கள்? ஓங்கோலில் இருந்து வந்தவர்கள் இங்கு தமிழர் என்கிறார்கள். பிரதமர் நரேந்திர மோடி தமிழகத்தில் பிறக்காவிட்டாலும் தமிழ் மீது ஆர்வம் காட்டுவதால் அவரும் தமிழர்தான்.
குஜராத்தில் பிறந்து தமிழ் மீதான ஆர்வத்தை காட்டும் மோடி கண்டிப்பாக தமிழன் தான். அவரை ஏன் தமிழன் என்று சொல்லக்கூடாது? டெல்டா பகுதிக்கு பல்வேறு திட்டங்களைச் செயல்படுத்தி வரும் மோடி தான் உண்மையான டெல்டாகாரர். அவர் தமிழகத்தில் எங்கு போட்டியிட்டாலும் அதிக வாக்குகள் பெற்று சாதனை படைப்பார்” என்று அண்ணாமலை கூறினார்.
Click it and Unblock the Notifications
Sign in with Google