பாம்பின் தலையை வெட்டுகிறோம்.. மலிவான கூலிகள்! இந்திய ஐடி ஊழியர்களை அசிங்கப்படுத்திய அமெரிக்க அரசு
நியூயார்க்: அமெரிக்காவின் சிலிக்கான் வேலி முதல் வால் ஸ்ட்ரீட் வரை, கடந்த முப்பது ஆண்டுகளாக உலகின் மிகப்பெரிய கார்ப்பரேட் நிறுவனங்களின் டிஜிட்டல் கட்டமைப்பைத் தூக்கி நிறுத்தியவர்கள் இந்திய மென்பொருள் பொறியாளர்கள். ஆனால், அதே அமெரிக்காவின் வெள்ளை மாளிகை மேடையில் நின்று, தங்களின் அதிகாரப்பூர்வ பத்திரிகையாளர் சந்திப்பில் அமெரிக்க அரசுப் பிரதிநிதிகள் வீசிய வார்த்தைகள், உலகளவில் உழைக்கும் ஒட்டுமொத்த இந்திய தொழில்நுட்ப சமூகத்தையும் அதிர்ச்சியிலும் அவமானத்திலும் ஆழ்த்தியுள்ளது.
அமெரிக்க தொழிலாளர் துறை அமைச்சர் கீத் சாண்டர்லிங் மற்றும் துணை அதிபர் ஜே.டி. வேன்ஸ் ஆகியோர் டாடா கன்சல்டன்சி சர்வீசஸ் (TCS), இன்போசிஸ், விப்ரோ, எச்.சி.எல், காக்னிசன்ட் உள்ளிட்ட முன்னணி நிறுவனங்களுக்கு கிரீன் கார்டுக்கான PERM ஒப்புதலைத் தற்காலிகமாக ரத்து செய்வதாக அறிவித்தனர்.
வெறுமனே ஒரு சட்டரீதியான உத்தரவை மட்டும் அவர்கள் பிறப்பிக்கவில்லை.. அதற்குப் பின்னால் அவர்கள் பயன்படுத்திய கடுமையான அரசியல் வார்த்தைகள், இந்திய ஐடி உலகை ஒரு குற்றவாளிக் கூண்டில் ஏற்றி அவமதிப்பது போல அமைந்துள்ளது.
"பாம்பின் தலையை வெட்டுகிறோம்": வெள்ளை மாளிகையின் அதிர்ச்சிப் பேச்சு
பத்திரிகையாளர் சந்திப்பில் பேசிய தொழிலாளர் துறை அமைச்சர் கீத் சாண்டர்லிங், *"பல ஆண்டுகளாக இந்த முறைகேடுகளைத் தொடர்ந்து செயல்படுத்தி வந்த பாம்பின் தலையை நாங்கள் இன்று துண்டிக்கிறோம். வெளிநாட்டுத் தொழிலாளர்கள் மீதான அதீத சார்பை உருவாக்கி வந்த இந்த மோசடிகளுக்கு முற்றுப்புள்ளி வைக்கிறோம்"* என்று வெளிப்படையாகப் பேசினார்.
இந்தியாவின் மிகப்பெரிய, பல லட்சம் குடும்பங்களுக்கு வாழ்வாதாரம் அளிக்கும் சர்வதேச நிறுவனங்களை 'விஷப் பாம்பு' போல உருவகப்படுத்திப் பேசியது சர்வதேச அரங்கில் பெரும் சலசலப்பை ஏற்படுத்தியுள்ளது. இதோடு நிற்காமல், துணை அதிபர் ஜே.டி. வேன்ஸ், அமெரிக்க நிறுவனங்கள் உள்ளூர் அமெரிக்கர்களுக்கு நல்ல சம்பளம் கொடுத்து வேலைக்கு வைக்காமல், இந்தியாவிலிருந்து வரும் பணியாளர்களை மலிவான வெளிநாட்டுக் கூலிகளாக மாற்றிவிட்டதாகக் குற்றம் சாட்டினார்.
'மலிவான கூலிகள்' என்ற முத்திரை நியாயமானதா?
இந்திய மென்பொருள் பொறியாளர்கள் தங்களின் சொந்த அறிவாற்றல், கடுமையான நுழைவுத் தேர்வுகள், வாரத்திற்கு 60-70 மணி நேர உழைப்பு ஆகியவற்றால் தான் அமெரிக்க நிறுவனங்களில் தங்களை நிலைநிறுத்திக் கொண்டனர். அமெரிக்காவின் முன்னணி நிறுவனங்களான கூகுள், மைக்ரோசாப்ட் ஆகியவற்றின் தலைமைப் பொறுப்பில் இந்தியர்கள் அமர்ந்திருப்பது தற்செயலானது அல்ல.
ஆனால், உள்நாட்டு அரசியல் லாபத்திற்காகவும் வாக்கு வங்கிக்காகவும், பல்லாயிரக்கணக்கான இந்தியப் பொறியாளர்களை வெறும் "குறைந்த கூலிக்கு வேலை செய்யும் அடிமைகள்" என்பது போலச் சித்தரிப்பது அவர்களின் திறமைக்கு இழைக்கப்படும் அநீதி.
அமெரிக்க அரசு முன்வைக்கும் குற்றச்சாட்டு இதுதான்:
அமெரிக்க நிறுவனங்கள் தகுதியான அமெரிக்க குடிமக்களை வேலைக்கு எடுக்காமல் திட்டமிட்டுப் புறக்கணிக்கின்றன. ஹெச்-1பி மற்றும் கிரீன் கார்டு நடைமுறைகளை முறைகேடாகப் பயன்படுத்தி, இந்திய அவுட்சோர்சிங் நிறுவனங்கள் மூலம் குறைந்த சம்பளத்திற்கு ஊழியர்களை உள்ளே கொண்டு வருகின்றன. 2009 முதல் இந்த நிறுவனங்கள் மட்டுமே சுமார் 2.3 லட்சம் ஹெச்-1பி விசாக்களையும், 1 லட்சத்திற்கும் அதிகமான நிரந்தர குடியுரிமை அனுமதிகளையும் பெற்று அமெரிக்கர்களின் வாய்ப்புகளைப் பறித்துவிட்டன.
உள்நாட்டு அரசியலும், பலிகடாவாக்கப்படும் இந்தியர்களும்
அமெரிக்காவில் தற்போது வேலையில்லாத் திண்டாட்டம், பொருளாதார மந்தநிலை, நிறுவனங்களின் தொடர் ஆட்குறைப்பு ஆகியவை தலைதூக்கியுள்ளன. மைக்ரோசாப்ட் போன்ற நிறுவனங்கள் ஒரே ஆண்டில் 6,000 அமெரிக்க ஊழியர்களை வேலையை விட்டு நீக்கிவிட்டு, அதே நேரத்தில் வெளிநாட்டு ஊழியர்களுக்கு விசா கோருவதை உள்ளூர் மக்கள் கடுமையாக எதிர்க்கின்றனர்.
இந்த உள்நாட்டு மக்கள் கோபத்தைத் தணிக்க, தற்போதைய அமெரிக்க நிர்வாகம் எளிதான ஒரு வழியைத் தேர்ந்தெடுத்துள்ளது: "அமெரிக்கர்களின் வேலைகளைப் பறிப்பது வெளிநாட்டினர் தான்" என்ற பிம்பத்தை உருவாக்குவது.
இந்த உள்நாட்டு அரசியலுக்குப் பலிகடாவாக்கப்படுவது யார் என்றால், சட்டப்படி வரி செலுத்தி, எந்தவித குற்றப் பின்னணியும் இல்லாமல், பல ஆண்டுகள் காத்திருந்து கிரீன் கார்டு பெற முயற்சிக்கும் இந்தியக் குடும்பங்கள் தான்.
இந்திய ஐடி குடும்பங்களுக்கு ஏற்படும் நேரடித் தாக்கம்
அமெரிக்க அரசின் இந்த அவமதிப்பு வார்த்தைகளை விட, இதனால் நடைமுறையில் வரப்போகும் பாதிப்பு மிகக் கொடுமையானது:
டிசிஎஸ், இன்போசிஸ் போன்ற நிறுவனங்கள் மூலம் அமெரிக்காவில் பணிபுரிந்து, PERM அனுமதி பெற்று கிரீன் கார்டை நோக்கி நகர்ந்து கொண்டிருந்த லட்சக்கணக்கான ஊழியர்களின் விண்ணப்பங்கள் காலவரையின்றி முடக்கப்பட்டுள்ளன. 6 ஆண்டுகள் ஹெச்-1பி காலம் முடிந்த பிறகு, கிரீன் கார்டு நடைமுறைகள் தொடங்கப்படாவிட்டால் அவர்கள் நாட்டை விட்டு வெளியேற வேண்டிய கட்டாயம் ஏற்படலாம்.
அங்குள்ள இந்தியக் குடும்பங்கள் தங்கள் குழந்தைகளின் கல்வி, வாங்கிய வீடுகளுக்கான கடன் ஆகியவற்றை எப்படி எதிர்கொள்வது என்ற தெரியாத அச்சத்துடனேயே வாழ வேண்டிய நிலை உருவாகியுள்ளது.
உழைப்பைச் சுரண்டிவிட்டு வீசியெறியும் அணுகுமுறை
அமெரிக்க நிறுவனங்களுக்குத் தங்கள் தொழில்நுட்பத் திட்டங்களை மலிவாகவும் வேகமாகவும் முடிக்க இந்திய நிறுவனங்கள் தேவைப்பட்டன; பல பில்லியன் டாலர் லாபம் ஈட்ட இந்திய இளைஞர்களின் இரவு-பகல் பாராத உழைப்பு தேவைப்பட்டது. ஆனால், இப்போது பொருளாதார நெருக்கடி வந்தவுடன், அதே இந்திய இளைஞர்களை "மோசடிக்காரர்கள்" என்றும் "பாம்பின் தலை" என்றும் முத்திரை குத்துவது ஒரு மிகப்பெரிய அரசியல் இரட்டை வேடம்.
இந்திய நிறுவனங்கள் இந்தத் தடைக்கு எதிராக நீதிமன்றங்களை நாடலாம். ஆனால், வாஷிங்டன் மேடையில் அமெரிக்காவின் உயர்மட்ட தலைவர்கள் உதிர்த்த இந்த நச்சு வார்த்தைகள் ஏற்படுத்திய காயம், இந்திய ஐடி ஊழியர்களின் சுயமரியாதையை ஆழமாகக் கீறியுள்ளது.
Click it and Unblock the Notifications
Sign in with Google
