குடுங்க ஹெல்மெட்ட.. உங்காருங்க வண்டியில! டவாலியுடன் ஸ்கூட்டரில் பறந்த சேலம் கலெக்டர்! காரணம் என்ன?

Updated: Thursday, September 8, 2022, 1:09 [IST]

Subscribe to Oneindia Tamil

சேலம் : சேலம் மாவட்டத்தில் மண்சரிவு ஏற்பட்ட இடத்தை சேலம் மாவட்ட ஆட்சியர் கார்மேகம் நேரில் பார்வையிட்டு ஆய்வு செய்த நிலையில், தொடர்ந்து கார் மலைப்பாதையில் செல்லாததால் இருசக்கர வாகனத்தில் டவாலியுடன் சென்று மலையில் உள்ள பாதிப்புகளை ஆய்வு மேற்கொண்ட புகைப்படங்கள் சமூக வலைதளங்களில் வேகமாக பரவி வருகிறது.

வட தமிழக பகுதிகளை ஒட்டி நிலவும் வளிமண்டல கீழடுக்கு சுழற்சி காரணமாக தமிழகத்தில் வழக்கத்திற்கு முன்னதாகவே கனமழை வெளுத்து வாங்கி வருகிறது. தெற்கு வடக்கு என பாகுபாடில்லாமல் தமிழகம் முழுவதும் மழை பெய்து வருகிறது.

மேலும் இன்னும் 3 நாளைக்கு தமிழ்நாடு, புதுவை மற்றும் காரைக்கால் பகுதிகளில் ஒருசில இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும் என சென்னை வானிலை ஆய்வு மையம் கூறியுள்ளது.

சேலம் மழை

இந்நிலையில் சேலம் மாவட்டத்தில் உள்ள புகழ்பெற்ற சுற்றுலாத் தலமான ஏற்காட்டில் கனமழை காரணமாக மலைச் சாலையில் வெகுவாகப் பாதிக்கப்பட்டுள்ளது. சேலம் மாவட்டத்தில் நேற்று இரவு கனமழை கொட்டி தீர்த்தது. இதனால் ஏற்காடு மலைப்பாதையில் பல்வேறு இடங்களில் மண் சரிவு ஏற்பட்டுள்ளதால் சேலம் ஏற்காடு சாலை துண்டிக்கப்பட்டுள்ளது

சாலை துண்டிப்பு

ஏற்காடு மலை அடிவார பகுதியில் இருந்து நான்கு கிலோ மீட்டர் தொலைவில் உள்ள பாலம் அருகே பெரும் அளவில் மண் சரிவு ஏற்பட்டுள்ளதால் சாலை துண்டிக்கப்பட்டுள்ளது. சாலையில் அடித்து வரப்பட்ட பாறைகளை நெடுஞ்சாலைத்துறை பணியாளர்கள் ஜேசிபி இயந்திரங்களைக் கொண்டு அகற்றி வருகின்றனர்.

ஆட்சியர் ஆய்வு

அடுத்த மூன்று நாட்களுக்கு மேலாக சாலை சீரமைக்கும் பணி நடைபெறும் என அதிகாரிகள் தெரிவித்துள்ளனர். இந்நிலையில் மலைப் பகுதிகளில் நடைபெற்று வரும் பணிகள் குறித்து சேலம் மாவட்ட ஆட்சியர் கார்மேகம் நேரில் பார்வையிட்டு ஆய்வு செய்தார். வழக்கமாக ஆய்வு பணிகளுக்கு காரில் செல்வது தான் வழக்கம்.

ஸ்கூட்டரில் சென்றார்

ஆனால் தற்போது ஆய்வுக்குச் சென்ற மாவட்ட ஆட்சியர் காரை எதிர்பார்க்காமல் ஸ்கூட்டரிலேயே சென்றார். ஹெல்மெட் அணிந்து இருசக்கர வாகனத்தில் டவாலியுடன் சென்று மலையில் உள்ள பாதிப்புகளை ஆய்வு மேற்கொண்ட புகைப்படங்கள் சமூக வலைதளங்களில் வேகமாக பரவி வருகிறது. இதனை கண்டு பலரும் ஆட்சியரை வாழ்த்தி வருகின்றனர்.