இந்தியா- இங்கிலாந்து இடையே டி20 கிரிக்கெட் போட்டி! சேப்பாக்கம் மைதானத்திற்கு இலவச ரயில் பயணம்
சென்னை: சென்னை சேப்பாக்கத்தில் இன்று நடைபெறும் கிரிக்கெட் போட்டியை காண வரும் ரசிகர்களுக்கு இலவச புறநகர் ரயில் பயணத்தை தெற்கு ரயில்வே துறையின் சென்னை பிரிவு அறிவித்துள்ளது.
இதுகுறித்து தெற்கு ரெயில்வே தனது எக்ஸ் தள பக்கத்தில் அறிவித்துள்ளதாவது: சென்னை சேப்பாக்கம் கிரிக்கெட் மைதானத்தில் இன்று நடைபெறும் இந்தியா- இங்கிலாந்து இடையேயான சர்வதேச டி20 கிரிக்கெட் போட்டியைக் காண வரும் கிரிக்கெட் ரசிகர்களுக்கு சிறப்பு பயண ஏற்பாட்டை தெற்கு ரெயில்வேயின் சென்னை பிரிவு மகிழ்ச்சியுடன் அறிவித்துள்ளது.
தடையற்ற பயணத்தை உறுதி செய்வதற்கும், பார்வையாளர்களுக்கு ஒட்டுமொத்த அனுபவத்தை மேம்படுத்துவதற்கும், தெற்கு ரயில்வே, தமிழ்நாடு கிரிக்கெட் சங்கத்துடன் (TNCA) இணைந்து, போட்டியின் அனைத்து டிக்கெட் வைத்திருப்பவர்களுக்கும் புறநகர் ரயில்களில் இலவச பயணத்தை வழங்குகிறது.
இலவச பயண வசதியின் முக்கிய விவரங்கள்: இந்தியா-இங்கிலாந்து டி20 கிரிக்கெட் போட்டிக்கான செல்லுபடியாகும் போட்டி டிக்கெட்டுகளை வைத்திருக்க வேண்டும். சென்னை கோட்டம் முழுவதும் இரண்டாம் வகுப்பு புறநகர் ரயில்களுக்கு மட்டுமே இலவச பயணம் பொருந்தும்.
ஜனவரி 25, 2025 அன்று போட்டிகளுக்கு போய்விட்டு வரவும் மீண்டும் திரும்பவும் இந்த இலவச வசதி கிடைக்கும். பயணிகள்/பார்வையாளர்கள் தங்கள் பயணத்தின் போது தங்கள் அசல் கிரிக்கெட் போட்டி டிக்கெட்டுகளை எடுத்துச் செல்ல வேண்டும். டிக்கெட் சரிபார்ப்பு ஊழியர்களின் கோரிக்கையின் பேரில் டிக்கெட்டுகளை சமர்ப்பிக்க வேண்டும். இவ்வாறு அந்த அறிக்கையில் குறிப்பிடப்பட்டுள்ளது.
Click it and Unblock the Notifications
Sign in with Google