கலர்ஃபுல்லா இருக்கீங்க.. உங்கள் இளமையின் ரகசியம் என்ன? துரைமுருகனை கலாய்த்த ஓபிஎஸ்

சட்டசபையில் எதிர்க்கட்சித் துணை தலைவர் துரைமுருகனை உங்கள் இளமையின் ரகசியம் என்ன என துணை முதல்வர் ஓ.பன்னீர்செல்வம் கேட்டதால் சிரிப்பலை உருவானது.

Updated: Thursday, June 7, 2018, 14:54 [IST]

சென்னை: சட்டசபையில் எதிர்க்கட்சித் துணை தலைவர் துரைமுருகனை உங்கள் இளமையின் ரகசியம் என்ன என துணை முதல்வர் ஓ.பன்னீர்செல்வம் கேட்டதால் சிரிப்பலை உருவானது.

தமிழக சட்டசபை கூட்டம் நடைபெற்று வருகிறது. இதில் மானிய கோரிக்கை மீதான விவாதங்கள் நடைபெற்று வருகின்றன.

சட்டசபையில் காரசார விவாதங்கள் நடைபெறும் நிலையில் இடையிடையே நகைச்சுவை சம்பவங்களும் அரங்கேறுவதுண்டு.

புதிய வட்டங்கள்

இந்நிலையில் இன்றைய சட்டசபை கூட்டத்தின் போது, கேவி குப்பம் அதிமுக எம்எல்ஏ லோகநாதன் புதிய வட்டங்களை உருவாக்க வேண்டும் என்று வருவாய்த்துறை அமைச்சரிடம் கேட்டார்.

குறுக்கிட்ட துரைமுருகன்

அதற்கு பதிலளித்த அமைச்சர் உதயகுமார் அம்மாவின் அரசு ஏற்கனவே 72 வட்டத்தை உருவாக்கி உள்ளது என்றார். அப்போது குறுக்கிட்ட எதிர்க்கட்சித் துணை தலைவர் துரைமுருகன் 73வது வட்டத்தை அம்மாவின் அரசு ஏற்படுத்த வேண்டும் என கோரிக்கை விடுத்தார்.

ஓபிஎஸ் நன்றி

உடனடியாக இருக்கையில் இருந்து எழுந்த துணை முதல்வர் அம்மாவின் அரசு என்று கூறியதற்கு நன்றி என்றார். அதற்கு பதிலளித்த துரைமுருகன், கூடுதல் வட்டத்தை ஏற்படுத்தினால் எவ்வளவு வேண்டுமானாலும் புகழ்கிறேன் என்று கூறினார்.

இளமையின் ரகசியம் என்ன?

இதைத்தொடர்ந்து பேசிய ஓபிஎஸ், இன்று துரைமுருகன் கலர்ஃபுல்லாக இருக்கிறார். என்றும் 16 ஆக துரைமுருகன் உள்ளார். உங்கள் இளமையின் ரகசியம் என்ன? என துரைமுருகனிடம் கேட்டார்.