வெற்றிக்கழகம் மாநாட்டு திடலிலேயே அமர்ந்து மது அருந்திய தொண்டர்கள்! என்னமா இப்படி பண்றீங்களேமா!
விழுப்புரம்: விஜய்யின் தமிழக வெற்றிக்கழகம் மாநாட்டு திடலில் அமர்ந்து தொண்டர்கள் மது அருந்திய சம்பவம் சலசலப்பை ஏற்படுத்தியுள்ளது. மாநாட்டுக்கு வரும் நண்பர்கள் கண்ணியமாக நடந்துக்கொள்ள வேண்டும் என்று விஜய் கூறியிருந்த நிலையில், தொண்டர்கள் நடவடிக்கை முக சுழிப்பை ஏற்படுத்தியுள்ளது.
தமிழ்நாட்டில் நடிகர்கள் அரசியலுக்கு வருவது என்பது புதியது அல்ல. அந்த வரிசையில், தற்போது நடிகர் விஜய்யும் புதியதாக இணைந்திருக்கிறார். தமிழக வெற்றிக்கழகம் என்கிற பெயரில் புதிய அரசியல் கட்சியை தொடங்கிய விஜய், விழுப்புரம் விக்கிரவாண்டியில் தனது முதல் மாநாட்டை நடத்துகிறார். இன்று நடக்கும் முதல் மாநாட்டில், விஜய்யின் முதல் அரசியல் உரையை அவரது லட்கக்கணக்கான ரசிகர்களும், தொண்டர்களும் எதிர்பார்த்து கார்த்திருக்கின்றனர்.
மாநாட்டு ஏற்பாட்டை பொறுத்தவரை, சுமார் 5 லட்சம் பேர் பங்கேற்பார்கள் என்று எதிர்பார்க்கப்படுகிறது. சுமார் 50,000 சேர்கள் போடப்பட்டிருக்கிறது. மாநாட்டுக்கு வரும் தொண்டர்கள் பொறுப்புடன் நடந்துக்கொள்ள வேண்டும் என்று விஜய் ஏற்கெனவே வலியுறுத்தியிருந்தார்.
இது குறித்து தொண்டர்களுக்கு அவர் எழுதியிருந்த கடிதத்தில், “என் நெஞ்சில் குடியிருக்கும் தோழர்களே, வணக்கம். மாநாடு குறித்த இரண்டாவது கடிதம் இது. மாநாட்டுப் பணிகளுக்கான குழுக்களும் தொகுதிப் பொறுப்பாளர்கள் பட்டியலும் அறிவிக்கப்பட்டுள்ள நிலையில், நம் முதல் மாநில மாநாடான வெற்றிக் கொள்கைத் திருவிழாவின் ஏற்பாடுகளில் நீங்கள் தீவிரமாக இருப்பதும் எனக்குத் தெரியும். அரசியலை, வெற்றி-தோல்விகளை மட்டுமே அடிப்படையாகக் கொண்டு அளவிடாமல்.
ஆழமான அக உணர்வாகவும், கொள்கைக் கொண்டாட்டமாகவும் அணுகப் போகும் நம்முடைய அந்தத் தருணங்கள், மாநாட்டில் மேலும் அழகுற அமையட்டும். அரசியல் களத்தில், வாய்மொழியில் வித்தை காட்டுவது நம் வேலை அன்று. நம்மைப் பொறுத்தவரை, செயல்மொழிதான் நமது அரசியலுக்கான தாய்மொழி.
மாநாட்டுக் களப்பணிகளில் மட்டுமல்லாமல், நம் ஒட்டுமொத்த அரசியல் களப்பணிகளிலும் நாம் அரசியல்மயப்படுத்தப்பட்டவர்கள் என்ற ஆழமான எண்ணத்தை மக்கள் மத்தியில் நீங்கள் உண்டாக்குவீர்கள் என்ற நம்பிக்கை எனக்கு இருக்கிறது. உற்சாகமும் உண்மையான உணர்வும் தவழும் உங்கள் முகங்களை மாநாட்டில் காணப் போகும் அந்தத் தருணங்களுக்காகவே, என் மனம் தவம் செய்து காத்துக் கிடக்கிறது. இதை நீங்களும் அறிவீர்கள் என்று எனக்குத் தெரியும்.
இந்த நெகிழ்வான நேரத்தில், முக்கியமான ஒரு வேண்டுகோளை வைக்க விரும்புகிறேன். கழகத் தோழர்கள் எல்லோரையும் போலவே கர்ப்பிணிப் பெண்கள், பள்ளிச் சிறுவர் சிறுமியர், நீண்ட காலமாக உடல்நலமின்றி இருப்பவர்கள், முதியவர்கள் பலரும் தமிழகத்தின் பல்வேறு ஊர்களில் இருந்து நம் மாநாட்டுக்கு வரத் திட்டமிட்டு இருப்பர்.
அவர்களின் அந்த ஆவலை நான் மிகவும் மதிக்கிறேன். உங்கள் எல்லோருடனும் அவர்களையும் மாநாட்டில் காண வேண்டும் என்ற ஆவல்தான் எனக்கும் இருக்கிறது. ஆனால், எல்லாவற்றையும்விட அவர்களின் நலனே எனக்கு மிக மிக முக்கியம். மாநாட்டிற்காக அவர்கள் மேற்கொள்ளும் நீண்ட தூரப் பயணம், அவர்களுக்கு உடல்ரீதியாகச் சிரமத்தை ஏற்படுத்தக் கூடும்.
அதனால், அவர்கள் இவ்வளவு தூரம் சிரமப்பட்டு வர வேண்டாம் என்றே அவர்களின் குடும்ப உறவாகவும் இருக்கும் உரிமையில் அன்புடன் கேட்டுக்கொள்கிறேன். ஊடக மற்றும் சமூக ஊடகங்கள் வழியாக, தங்கள் வீடுகளில் இருந்தே நமது வெற்றிக் கொள்கைத் திருவிழாவில் கலந்து கொள்ளலாம் என்றும் அவர்களைக் கேட்டுக்கொள்கிறேன். மாநாட்டுக்கு வருகின்ற மற்ற அனைவரும், மாநாட்டுக்கு வந்து செல்லும்போது, பாதுகாப்புடன் பயணிப்பது மிக மிக முக்கியம். அதேபோல, பயண வழிகளில் அரசியல் ஒழுங்கையும் நெறிமுறைகளையும் போக்குவரத்து விதிமுறைகளையும் கட்டாயம் கடைப்பிடிக்க வேண்டும்.
நாம் எதைச் செய்தாலும், அதில் பொறுப்புணர்வுடன் கடமை, கண்ணியம், கட்டுப்பாட்டையும் காப்போம் என்பதை உணர்த்துமாறு செயல்பட்டால் தான் நம் செயல்கள் மிக நேர்த்தியாக அமையும். அரசியலுக்கும் அது பொருந்தும். நாம் எப்போதும் மற்றவர்களுக்கு எடுத்துக்காட்டாகவே இருக்க வேண்டும். எந்நாளும் இதை ஒரு கட்டுப்பாட்டு விதியாகவே கடைப்பிடிக்க வேண்டும் என்று கேட்டுக்கொள்கிறேன். வி.சாலை என்னும் விவேக சாலையில் சந்திப்போம்” என குறிப்பிட்டிருந்தார்.
ஆனால், தொண்டர்கள் சிலர் விஜய் வலியுறுத்திய கண்ணியத்தை மீறியுள்ளனர். அதாவது மாநாட்டு திடலில் வைத்து தொண்டர்கள் மது அருந்தியுள்ளனர். இது பொதுமக்களிடையே முக சுழிப்பை ஏற்படுத்தியுள்ளது. தற்போது சோஷியல் மீடியாவில் தொண்டர்கள் மது அருந்தும் வீடியோ வேகமாக பரவி வருகிறது.
Click it and Unblock the Notifications
Sign in with Google