வருவாய்த்துறை அமைச்சர் ராமச்சந்திரனுக்கு கொரோனா உறுதி.. வீட்டுத் தனிமையில் இருப்பதாக தகவல்!
விருதுநகர்: தமிழக வருவாய்த்துறை அமைச்சர் கேகேஎஸ்எஸ்ஆர் ராமச்சந்திரனுக்கு கொரோனா வைரஸ் உறுதி செய்யப்பட்டுள்ளது.
இந்தியாவில் கொரோனா வைரஸ் பாதிப்பு கடந்த ஜூன் மாதம் முதல் மீண்டும் அதிகரிக்க தொடங்கியது. அதேபோல் தமிழ்நாட்டில் கொரோனா பாதிப்பு நாளுக்கு நாள் அதிகரித்து வருகிறது. இதனால் கொரோனா தடுப்பு நடவடிக்கைகளை தமிழக அரசு தீவிரப்படுத்தியுள்ளது. பொது இடங்களில் முகக்கவசம் அணியாதவர்களுக்கு ரூ.500 வரை அபராதம் விதிக்கப்படுகிறது. அதேபோல் தனி மனித இடைவெளி, சுகாதாரம், தடுப்பூசி உள்ளிட்ட நடவடிக்கைகளையும் பின்பற்ற தமிழக அரசு அறிவுறுத்தி வருகிறது.
இருந்தும் தினசரி கொரோனா பாதிப்பானது 2 ஆயிரத்திற்கும் அதிகமாக பதிவாகி வருகிறது. அதேபோல் இந்தியாவில் தினசரி பாதிப்பு 20 ஆயிரத்தைக் கடந்து பதிவாகி வருகிறது. இருந்தும், உயிரிழப்புகள் குறைவாக இருப்பதால், ஊரடங்கு உள்ளிட்ட உத்தரவுகள் அமல்படுத்தப்படாமல் இருக்கிறது.
இதனிடையே அண்மையில் தமிழக முதலமைச்சர் மு.க.ஸ்டாலினுக்கு கொரோனா வைரஸ் பாதிப்பு உறுதி செய்யப்பட்டு மருத்துவமனையில் சிகிச்சையளிக்கப்பட்டது. இதனைத்தொடர்ந்து கடந்த 18ம் தேதி முதலமைச்சர் மு.க.ஸ்டாலின் டிஸ்சார்ஜ் செய்யப்பட்டு, இன்று முதல் அலுவல் பணிகளை மேற்கொண்டு வருகிறார்.
இதேபோல் பால்வளத்துறை அமைச்சர் நாசருக்கும் கொரோனா பாதிப்பு உறுதி செய்யப்பட்டது. இதனைத்தொடர்ந்து அவர் வீட்டில் தனிமைப்படுத்திக் கொண்டு மருத்துவர்களின் அறிவுறுத்தலின் பேரில் சிகிச்சைப் பெற்று வருகிறார். இந்த நிலையில் வருவாய்த்துறை அமைச்சர் கேகேஎஸ்எஸ்ஆர் ராமச்சந்திரனுக்கு கொரோனா வைரஸ் பாதிப்பு உறுதி செய்யப்பட்டுள்ளது.
இதனைத்தொடர்ந்து விருதுநகரில் உள்ள அவரது வீட்டில் தனிமைப்படுத்திக் கொண்டுள்ளதாக தகவல் வெளியாகியுள்ளது. தமிழக அமைச்சர்கள் அடுத்தடுத்து கொரோனா வைரஸால் பாதிக்கப்பட்டு வருவது மக்கள் மத்தியில் அதிர்ச்சியை ஏற்படுத்தியுள்ளது. இதனால் பொதுமக்கள் தடுப்பூசி செலுத்திக் கொள்ளவும், பொது இடங்களில் முகக்கவசம் அணியவும் அறிவுறுத்தப்பட்டுள்ளது.
குறிப்பாக இரண்டு டோஸ் தடுப்பூசிகளும் செலுத்திக் கொண்ட மக்கள் பூஸ்டர் டோஸ் தடுப்பூசியை செலுத்திக் கொள்ளவும் அறிவுறுத்தப்பட்டுள்ளது. இதற்கு ஏற்றாற்போல், மத்திய அரசு பூஸ்டர் டோஸ் தடுப்பூசி இலவசமாக செலுத்தப்படும் என்று அறிவித்துள்ளது.
Click it and Unblock the Notifications
Sign in with Google