'டைட்டானிக் பட ஸ்டைல்' நடுக்கடலில் புரபோஸ்.. அப்புறம் நடந்ததுதான் ட்விஸ்ட்.. ஒரே காமெடிதான் போங்க

Updated: Monday, November 28, 2022, 17:49 [IST]

Subscribe to Oneindia Tamil

வாஷிங்டன்: கடலில் வைத்து காதலை சொல்ல திட்டமிட்ட இளைஞருக்கு, தனது காதலியிடம் காதலை வெளிப்படுத்தும் போது நடந்த சம்பவம் வாழ்நாளிலேயே மறக்க முடியாத அளவுக்கு சுவாரசியமானதாக மாறியுள்ளது.

காதல் கைகூடும் போது ஏற்படும் மகிழ்ச்சிக்கு அளவே இருக்காது. அத்தகைய தருணத்தை மறக்க முடியாத நிகழ்வாக அமைக்க வேண்டும் என்பது பல காதலர்களின் திட்டமாக இருக்கும்.

இதற்காக புரபோஸ் செய்வதை வித்தியாசமாக செய்து தங்கள் மனதில் நீங்கா நினைவுகளாக இடம் பெற செய்ய வேண்டும் என்று வித விதமாக காதலர்கள் திட்டமிடுவர்.

காதலை வித்தியாசமாக வெளிப்படுத்த

கிரிக்கெட் போட்டிகளின் மைதானத்தில் காதலை சொல்வது.... பொது இடங்களில் காதலை வெளிப்படுத்துவது... என இன்றைய தலைமுறையினர் வித்தியாசமாக காதலை வெளிப்படுத்தி வருகின்றனர். இதேபோலத்தான் அமெரிக்காவின் புளோரிடா மாகாணத்தை சேர்ந்த இளைஞரான ஸ்காட் கிளைன் என்பவர் தனது காதலை வித்தியாசமாக வெளிப்படுத்த வேண்டும் என்று திட்டமிட்டார்.

டைட்டானிக் பட ரேஞ்சுக்கு

தனது வாழ்நாளில் மறக்க முடியாத அளவுக்கு தனது காதலியிடம் காதலை வெளிப்படுத்தும் நிகழ்வு அமைய வேண்டும் என்று திட்டமிட்ட ஸ்காட்ச் கிளைன்னுக்கு ஒரு ஐடியா தோன்றியது. டைட்டானிக் பட ரேஞ்சுக்கு யோசித்த ஸ்காட் கிளைன், தனது காதலை கடல் பயணத்தின் போது வெளிப்படுத்த திட்டமிட்டார். இதற்காக கடலில் சொகுசு படகில் ஒன்றில் தனது நண்பர்கள் சிலருடன் ஸ்காட் கிளைன் பயணித்தார்.

லவ் புரோபசல்

இதே படகில் தான் அவருடைய கேர்ள் பிரண்ட் சுசி டக்கரும் இருந்தார். இருவரும் கடல் அழகை சிறிது நேரம் ரசித்த பிறகு காதலை புரோபஸ் செய்ய கிளைன் தயாரானார். தான் ஏற்கனவே வாங்கி வைத்திருந்த ரிங் (மோதிரம்)-கை கையில் வைத்துக்கொண்டு முழங்கால் இட்டு லவ் புரோபசலுக்கு தயரானார். அப்போது பின்புறமாக கையில் வைத்திருந்த ரிங், கடலில் தவறி விழுந்தது. இதனால், அதிர்ச்சி அடைந்த கிளைன் ஒரு நொடி கூட தாமதிக்காமல் கடலில் குதித்தார்.

மறக்க முடியாத அனுபவமாக

அவரது அதிர்ஷ்டம் படகின் அடுக்கு ஒன்றில் மோதிரம் இருந்த பாக்ஸ் தட்டி வேகமாக கீழே செல்லாமல் இருந்தது. இதனால், எளிதாக மோதிரம் இருந்த பாக்ஸை மீட்டு விட்டார். படகில் இருந்த சக நண்பர்களும் அவருக்கு கை கொடுத்து தூக்கிவிட்டனர். மறக்க முடியாத படி காதலை சொல்ல நினைத்த கிளைனுக்கு கடைசியில் அவர் நினைத்தாலும் மறக்க முடியாத அளவுக்கான ஒரு சம்பவம் நடைபெற்று விட்டதாக அங்கிருந்த நண்பர்கள் கலாய்த்துள்ளனர்.

100 சதவீதம் எனது அதிர்ஷ்டம்

இது குறித்த வீடியோவை தனது பேஸ்புக்கில் கிளைன் பகிர்ந்து இருக்கிறார். 1.5 நிமிடங்கள் ஓடும் இந்த வீடியோவிற்கு 'இது 100 சதவீதம் உண்மை, 100 சதவீதம் எனது அதிர்ஷ்டம், 100 சதவீதம் ஒருபோதும் மறக்கப்போவது இல்லை' என்ற கேப்ஷனுடன் பகிர்ந்து இருக்கிறார். இவரது பதிவினை பார்வையிட்ட பலரும் அவர்களுக்கு வாழ்த்து சொல்லி பதிவிட்டு வருகின்றனர்.