கல்யாண தேதியை அறிவித்த பிக் பாஸ் ஜூலி.. பட்டபாடுக்கு நிம்மதி கிடைத்து விட்டது.. குவியும் பாராட்டு

Updated: Wednesday, December 31, 2025, 17:26 [IST]

Subscribe to Oneindia Tamil

சென்னை: 2017 ஆம் ஆண்டு, தமிழகத்தின் கவனத்தை திரும்பிப் பார்க்க வைத்த ஒரு மிகப்பெரிய மக்கள் எழுச்சி என்றால் அது ஜல்லிக்கட்டு போராட்டம். சென்னை மெரினா கடற்கரையில் நடைபெற்ற அந்த வரலாற்றுச் சிறப்புமிக்க போராட்டத்தில், ஒரு இளம் பெண்ணின் குரலும் முகமும் நாடு முழுவதும் கவனம் பெற்றது. அந்தப் பெண் தான் இன்று அனைவரும் அறிந்த ஜூலி.

ஜல்லிக்கட்டு நடத்தக்கோரி நடைபெற்ற போராட்டத்தில், மேடையில் துணிச்சலாக பேசிய ஜூலி, இளைஞர்களின் பிரதிநிதியாக பார்க்கப்பட்டார். சமூக வலைதளங்களில் அவரது பேச்சுகள் வைரலானதைத் தொடர்ந்து, "மெரினா ஜூலி" என்ற பெயரே அவரின் அடையாளமாக மாறியது. அந்த புகழ், அவரை அடுத்த கட்டத்திற்கு கொண்டு சென்றது.

அதன் தொடர்ச்சியாக, விஜய் டிவியில் ஒளிபரப்பான பிக் பாஸ் தமிழ் முதல் சீசனில் போட்டியாளராக கலந்து கொண்டார் ஜூலி. பிக் பாஸ் வீட்டுக்குள் நுழைந்த பிறகு, அவரின் வாழ்க்கை முற்றிலும் மாறியது. ஆரம்பத்தில் ஆதரவு பெற்ற ஜூலி, பின்னர் சில சர்ச்சைகள், ஓவியாவுடன் மோதல்கள், வாக்குவாதங்கள் காரணமாக விமர்சனங்களுக்கும் ஆளானார்.

ஓவியா உடன் அவர் சண்டை போட்டது எல்லாம் அப்போது பெரிதாக பேசப்பட்டது. அந்த நேரத்தில் அதிகமாக சோசியல் மீடியா இல்லை என்றாலும் அதற்கு பிறகு ஜூலி சோசியல் மீடியாவில் பதிவுகள் போட தொடங்கிய பிறகு அதிகமான விமர்சனங்களையும் சந்தித்து வந்தார். ஆனால் பிக் பாஸ் முதல் சீசனில் தன்னுடைய பெயரை கெடுத்துக் கொண்டாலும் பிக் பாஸ் அல்டிமேட் நிகழ்ச்சியில் போட்டியாளராக கலந்து கொண்டு தன்னுடைய நெகடிவ் எல்லாம் அழித்துவிட்டார்.

பிக் பாஸ் நிகழ்ச்சிக்கு பிறகு, ஜூலி குறித்து பல வதந்திகளும் பரவின. "புகழ் கிடைத்ததும் மாறிவிட்டார்", "அரசியல் பின்னணி", "பணம், விளம்பரம்" போன்ற பல குற்றச்சாட்டுகள் அவர் மீது முன்வைக்கப்பட்டன. ஆனால், அவற்றை எல்லாம் நேரடியாக எதிர்கொண்டு, தன்னுடைய பாதையில் தொடர்ந்து பயணித்தார் ஜூலி.

பிக் பாஸ் நிகழ்ச்சிக்குப் பிறகு, ஜூலி சில தமிழ் திரைப்படங்களிலும் நடித்தார். அதோடு மட்டுமல்லாமல், சில தொலைக்காட்சி சீரியல்களிலும் நடித்ததன் மூலம் நடிகையாக தன்னை நிலைநிறுத்த முயற்சி செய்தார். நடிப்பில் பெரிதாக வாய்ப்புகள் கிடைக்காவிட்டாலும், சமூக ஊடகங்களில் தனது இருப்பை தொடர்ந்து வைத்திருந்தார்.

இந்நிலையில், தனது தனிப்பட்ட வாழ்க்கை குறித்தும் ஜூலி வெளிப்படையாக பேசினார். முகமது ஜக்ரீம் என்பவரை நீண்ட காலமாக காதலித்து வருவதாகவும், இருவரும் புரிதலுடன் வாழ்க்கையை தொடங்க முடிவு செய்துள்ளதாகவும் அறிவித்தார். இதனை தொடர்ந்து தற்போது, தனது திருமண தேதியையும் அதிகாரப்பூர்வமாக அறிவித்துள்ளார்.

அதன்படி, வரும் ஜனவரி 16, வெள்ளிக்கிழமை மாலை, சென்னை பரங்கிமலையில் அமைந்துள்ள செயின்ட் பேட்ரிக் சர்ச்சில் ஜூலி - ஜக்ரீம் திருமணம் நடைபெறவுள்ளது. இந்த அறிவிப்பு வெளியாகியதும், சமூக வலைதளங்களில் ஜூலிக்கு வாழ்த்துகள் குவிய தொடங்கி இருக்கிறது.