Neeya Naana: நாயும் குழந்தையும் ஒன்னுன்னு சொல்லல! கோபிநாத் தான் அப்படி செய்ய சொன்னாரு! பகீர் கிளப்பிய பெண்

Updated: Tuesday, September 2, 2025, 18:39 [IST]

Subscribe to Oneindia Tamil

சென்னை: விஜய் டிவியில் ஒளிபரப்பான 'நீயா நானா' நிகழ்ச்சியில் தெரு நாய்கள் குறித்து நடந்த விவாதம், எதிர்பாராதவிதமாக ஒரு பெரிய சர்ச்சையாக உருவெடுத்துள்ளது. நிகழ்ச்சியில் பேசிய பெண் ஒருவர், தனது மகன் விபத்தில் இறந்ததற்கு நாய் ஒரு காரணம் என்று பேசிய நபரிடம், தானும் விபத்தில் சிக்கியதாகக் கூறி, ஒரு குழந்தையையும் அதற்குக் காரணமாகக் குறிப்பிட்டது, பெரும் பரபரப்பை ஏற்படுத்தியது. இதனால், சமூக வலைத்தளங்களில் பலரும் அந்தப் பெண்ணை மனநல பாதிப்பு உள்ளவர் என்றும், அவருக்கு மனிதாபிமானம் இல்லை என்றும் கடுமையாக விமர்சித்தனர். இந்தச் சூழலில், அந்தப் பெண் சுசி வெங்கட் என்ற இன்ஸ்டாகிராம் பக்கத்தில் ஒரு வீடியோ வெளியிட்டு, நடந்த சம்பவங்கள் குறித்து உருக்கமான விளக்கம் அளித்துள்ளார்.

கண்ணீருடன் பேசிய தாயின் வலி

நிகழ்ச்சியில், ஒரு தந்தை தனது ஆறு வயது மகனைப் பள்ளியில் விடுவதற்காக கூட்டி வரும்போது, குறுக்கே வந்த நாய் மீது மோதாமல் இருக்க ஆட்டோவைத் திருப்பியபோது விபத்து ஏற்பட்டு, தன் கண் முன்பே மகன் இறந்ததாகக் கண்ணீருடன் பேசியது, ஒட்டுமொத்த பார்வையாளர்களையும் உலுக்கியது. அந்தத் தந்தையின் துயரம், அனைவரின் மனதையும் கனக்கச் செய்தது. ஆனால், இந்த வேதனையான தருணத்தில், நாய்களுக்கு ஆதரவாகப் பேசிய அணியில் இருந்த சுசி வெங்கட், தானும் ஒரு விபத்தில் சிக்கியதாகக் கூறி, அதை ஒரு குழந்தையுடன் ஒப்பிட்டுப் பேசியது, பார்வையாளர்களிடையே பெரும் கோபத்தை ஏற்படுத்தியது.

சுசி வெங்கட்டின் உருக்கமான விளக்கம்

சமூக வலைத்தளங்களில் தான் கடுமையாக ட்ரோல் செய்யப்படுவதால், சுசி வெங்கட் ஒரு வீடியோ வெளியிட்டுள்ளார். அதில், "வணக்கம். நான் யார் என்று இப்போது சமூக வலைத்தளங்களில் இருக்கும் அனைவருக்கும் தெரிந்திருக்கும். எனக்கு மென்டல் என்று சொல்கிறீர்கள், நான் ஒரு அம்மாவா என்று கேள்வி கேட்கிறீர்கள். உள்ளே என்ன நடந்தது என்று உங்களுக்குத் தெரியாது. உங்களுக்குத் தெரிந்தது எல்லாம் 'குழந்தையும், நாயும் ஒண்ணா?' என்று நான் கேட்டது மட்டும்தான்."

"விபத்தில் மகனை இழந்த அந்தத் தந்தை பேசிய வலியை நான் உணர்ந்தேன். ஏனென்றால் எனக்கும் விபத்து நடந்திருக்கிறது. நான் பைக் ஓட்டி வரும்போது ஒரு குழந்தை குறுக்கே ஓடி வந்து என்னுடைய கைப் பகுதியில் முட்டிவிட்டது. அப்போது, நிலை தடுமாறி நானும், என் பின்னால் இருந்த என்னுடைய மகளும் கீழே விழுந்துவிட்டோம். அந்த நேரத்தில், யார் என்று தெரியாத அந்தக் குழந்தையை காப்பாற்றுவதா அல்லது என் சொந்த குழந்தையைப் பாதுகாப்பதா என்று எனக்குத் தெரியவில்லை. அந்தப் பரிதவிப்பை நான் உணர்ந்தேன். அந்த வலியைப் பற்றித்தான் நான் பேச வந்தேன்."

"ஆனால், நான் பேசிக்கொண்டிருக்கும்போதே, 'உன் பேச்சை நிறுத்துங்கள்!' என்று கோபிநாத் கத்திவிட்டார். அதனால், நான் பேசாமல் அமைதியாகிவிட்டேன். இடைவேளையின்போது, கோபிநாத் என்னிடம், 'உங்களை நிறுத்தாமல் இருந்திருந்தால், இது ஒளிபரப்பாகும்போது ஒரு பெரிய பிரச்சனையாகிவிடும். இது பரபரப்பை ஏற்படுத்தும் என்பதால்தான் உங்களை நிறுத்தினேன்' என்று சொன்னார். அந்த காட்சி ஒளிபரப்பாகாது என்று நினைத்தோம், ஆனால் அதைத்தான் ப்ரோமோவாக வெளியிட்டுள்ளார்கள்."

நாய் போல சத்தம்

மற்றொரு ப்ரோமோவில், நாய்கள் போல ஊளையிட்டுச் சத்தம் போடுவதாகக் காட்டப்படுகிறது. அதுவும் சர்ச்சையாகியுள்ளது. அதுபற்றிப் பேசிய சுசி வெங்கட், "நாய்கள் சாதாரண மனிதர்களைப் போல அல்லாமல், அதன் குரலை வைத்தே அடையாளம் காணப்படும். அதை உணர்த்துவதற்காக 'கோபிநாத் தான் நாய் மாதிரி ஊளையிடுங்கள்' என்று சொன்னார். அதனால்தான் நாங்கள் கத்தினோம். ஆனால், நாங்கள் சத்தம் போடும்போது, எதிர் அணியினர் சிரித்துக்கொண்டிருந்தார்கள். அதை கோபிநாத் தடுக்கவோ, தவறு என்று சொல்லவோ இல்லை."

அந்த நிகழ்ச்சியில், குழந்தையை இழந்த அந்தத் தந்தை என்னைப் பார்த்து 'நீங்கள் ஏதோ சொல்ல வந்தீர்கள், ஆனால் உங்களை பேச விடாமல் தடுத்துவிட்டார்கள். உங்களிடம் ஏதோ ஒரு வலி இருந்தது' என்று கேட்டார். அவர் என்னைப் புரிந்து கொண்டார், அது போதும். வேறு யாரும் என்னைப் புரிந்து கொள்ளாவிட்டாலும் எனக்குக் கவலை இல்லை" என்று அவர் உருக்கத்துடன் பேசியிருக்கிறார்.

சுசி வெங்கட்டின் இந்தப் பேட்டி, 'நீயா நானா' நிகழ்ச்சியில் நடந்த உண்மைகளையும், அதன் பின்னால் இருந்த உணர்வுகளையும் வெளிச்சம் போட்டுக் காட்டியுள்ளது. இது, சமூக வலைத்தளங்களில் நடக்கும் அவசரமான கருத்துப் பரிமாற்றங்கள், ஒருவரின் வாழ்க்கையை எப்படிப் பாதிக்கிறது என்பதைப் பற்றிய ஒரு முக்கியப் பாடத்தைக் கற்றுக் கொடுக்கிறது.