காதலி ப்ரூனியை மணந்தார் பிரெஞ்சு அதிபர் சர்கோஸி

பாரீஸ்: பிரான்ஸ் அதிபர் நிக்கோலஸ் சர்கோஸி, தனது காதலி கார்லா ப்ரூனியை திருமணம் செய்து கொண்டார்.

கடந்த ஆண்டு பிரான்ஸ் அதிபரானவர் சர்கோஸி. 53 வயதாகும் சர்கோஸி, தனது மனைவியுடன் கருத்து வேறுபாடு ஏற்பட்டதால் விவாகரத்து செய்து விட்டார். ஆனால் அவருக்கும், முன்னாள் மாடல் அழகி கார்லோ ப்ரூனிக்கும் (40) இடையே ஏற்பட்ட காதலால்தான் சர்கோஸிக்கும், அவரது மனைவிக்கும் இடையே பிரச்சினை உருவானதாக கூறப்பட்டது.

பல்வேறு சர்ச்சைகள், விமர்சனங்கள் எழுந்தபோதிலும், சர்கோஸி தனது காதலைக் கைவிடவில்லை. படு தீவிரமாக ப்ரூனியை காதலித்து வந்தார் சர்கோஸி.

இந்த நிலையில் சர்கோஸிக்கும், ப்ரூனிக்கும் சனிக்கிழமை திடீர் திருமணம் நடந்தது. எல்சி அரண்மனையில் நடந்த இந்த திருமணத்தில் இருவருக்கும் நெருக்கமானவர்கள் மட்டுமே கலந்து கொண்டனர்.

இத்திருமணத்தை பாரீஸ் மேயர் பிரான்காய் லிபெல் நடத்தி வைத்தார். மணப்பெண் ப்ரூனி, வெள்ளை நிற உடையில் தேவதை போல காணப்பட்டதாக லிபெல் தெரிவித்தார்.