யு.எஸ்.: ராட்சத கிரேன் விழுந்து 4 பேர் பலி

நியூயார்க்: அமெரிக்காவில் ராட்சத கிரேன் உடைந்து விழுந்த விபத்தில் 4 தொழிலாளர்கள் பரிதாபமாக இறந்தனர்.

அமெரிக்காவின் மன்ஹாட்டன் பகுதியில் 44 மாடிகளைக் கொண்ட பிரமாண்டக் கட்டடம் கட்டப்பட்டு வருகிறது. இதில் முதல் 19 மாடிகளைக் கட்டி முடித்துள்ளனர். கட்டுமானப் பணியில் ராட்சத கிரேன் ஒன்று பயன்படுத்தப்பட்டு வந்தது.

இந்த கிரேன் 15 மாடி கட்டடம் அளவுக்கு உயரம் கொண்டது. நேற்று மதியம் திடீரென அந்த ராட்சத கிரேன் உடைந்து கட்டடத்தின் மீது விழுந்தது. இதில் கட்டடம் நொறுங்கியது.

பயங்கர சப்தத்துடன் நொறுங்கி விழுந்த கிரேனின் இடிபாடுகளில் சிக்கி அங்கு வேலை செய்து கொண்டிருந்த 4 தொழிலாளர்கள் பரிதாபமாக இறந்தனர். 10 பேர் படுகாயமடைந்தனர்.

கிரேன் விழுந்ததில் அந்தக் கட்டடம் தவிர அருகில் இருந்த வேறு சில கட்டடங்களும் சேதமடைந்தன.

கிரேனின் இணைப்புக் கம்பி ஒன்று துண்டிக்கப்பட்டதால்தான் கிரேன் உடைந்து விழுந்ததாக கட்டுமானப் பணியை மேற்கொண்டுள்ள நிறுவனம் தெரிவித்துள்ளது.