அணு ஒப்பந்தம் ரத்து-அமெரிக்கா அதிரடி, ரஷ்யா கண்டனம்

மாஸ்கோ: அமெரிக்க-ரஷ்ய அணு சக்தி ஒப்பந்தத்தை திரும்பப் பெறுவது என அமெரிக்க அரசு எடுத்துள்ள முடிவு அரசியல் உள்நோக்கம் கொண்டது, மிகப் பெரிய தவறு என்று ரஷ்யா தெரிவித்துள்ளது.

இந்தியாவுடன் செய்து கொண்டுள்ள அணு சக்தி ஒப்பந்தம் போல ரஷ்யாவுடனும் அமெரிக்கா அணு சக்தி ஒப்பந்தம் செய்துள்ளது. இப்போது ஜார்ஜியா விவாகரம் தொடர்பாக அமெரிக்காவுக்கும், ரஷ்யாவுக்கும் இடையே பெரும் முட்டல்- மோதல் வெடித்துள்ளது.

இந் நிலையில், ரஷ்யா மீது கடுப்பாகியுள்ள அமெரிக்கா, இரு நாட்டு அணு சக்தி ஒப்பந்தத்தை ரத்து செய்ய முடிவு செய்து, அமெரிக்க நாடாளுமன்றத்திலிருந்து அதை திரும்பப் பெற்றுள்ளது.

இது மிகப் பெரிய தவறு என்று ரஷ்யா வர்ணித்துள்ளது. இதுகுறித்து ரஷ்ய வெளியுறவுத்துறை வெளியிட்டுள்ள அறிக்கையில், அமெரிக்க அதிபர் ஜார்ஜ் புஷ்ஷின் முடிவு, தவறானது,அரசியல் கலந்தது என்று நாங்கள் கருதுகிறோம்.

இப்போது எதற்காக இந்த முடிவை அமெரிக்கா எடுத்தது என்று எங்களுக்குப் புரியவில்லை. இது மிகவும் வருத்தத்திற்குரியது என்று ரஷ்யா கூறியுள்ளது.

ரஷ்யா- அமெரிக்க அணு சக்தி ஒப்பந்தம் ரத்து என்பது நமக்கும் ஒரு எச்சரிக்கை பாடம் என்பதை இந்தியா கருத்தில் கொள்வது நல்லது.