9000 ஊழியர்களை நீக்கிய ஸ்விஸ் வங்கி!

பெர்ன்: ஒருபக்கம் பொருளாதாரம் மீட்சிக்குத் திரும்புவதாகக் கூறிக் கொண்டிருந்தாலும் மறுபக்கம் வேலைக்குறைப்புகள் இன்னும் தீவிரமாகத் தொடர்கின்றன.

இன்று ஒரே நாளில் உலகில் முன்னணி வங்கியான ஸ்விஸ் வங்கி (United Bank Of Swiss - UBS) மற்றும் முன்னணி விமான நிறுவனண் ஏர்பிரான்ஸ் போன்றவை பெருமளவு ஆட்குறைப்பை அறிவித்துள்ளன.

ஸ்விட்சர்லாந்தின் முதல்நிலை வங்கியான ஸ்விஸ் வங்கி மீண்டும் பணியாளர் குறைப்பை அறிவித்துள்ளது. இம்முறை மேலும் 9000 பணியாளர்களை நீக்குகிறது இந்த வங்கி.

இந்த நிதியாண்டின் முதல் காலாண்டில் 1.75 பில்லியன் டாலர் நஷ்டம் ஏற்பட்டுவிட்டதால் வேறு வழியின்றி 9000 பணியாளர்களைக் குறைப்பதாக ஸ்விஸ் வங்கி அறிவித்துள்ளது.

இந்த ஆட்குறைப்பு நடவடிக்கை இத்துடன் நின்றுவிடாது என்றும், 2010க்குள் மேலும் பல ஊழியர் குறைக்கப்படுவார்கள் என்றும் ஸ்விஸ் வங்கி அறிவித்துள்ளது. இப்போது இந்த வங்கியில் 76 ஆயிரம் பேர் பணியில் உள்ளனர்.

ஏர் பிரான்ஸில் 3000 பேர் நீக்கம்!

பிரான்ஸ் நாட்டின் ஏர் பிரான்ஸ் நிறுவனம் 3000 பணியாளர்களை அடுத்த இரு ஆண்டுகளுக்குள் குறைப்பதாக அறிவித்துள்ளது.

இந்த நிறுவனத்தில் ஏற்கெனவே 1000 பணியாளர்கள் வேலைநீக்கம் செய்யப்பட்டுள்ளனர். தொடர் நஷ்டம் மற்றும் நிறுவன முடக்கத்தைத் தவிர்க்கவே இந்த நடவடிக்கை என ஏர் பிரான்ஸ் அறிவித்துள்ளது.