ஒசாமா பின் லேடன் இறந்துவிட்டார்-சர்தாரி தகவல்

இஸ்லாமாபாத்: அல் கொய்தா தலைவர் ஒசாமா பின் லேடன் உயிருடன் இல்லை என்பது உளவுப் பிரிவு தகவல்களை வைத்து அனுமானிக்க முடிகிறது. லேடன் உயிருடன் இருக்கிறார் என்பதற்கு எந்த ஆதாரமும் இல்லை என்று கூறியுள்ளார் அதிபர் ஆசிப் அலி சர்தாரி.

இதுகுறித்து சர்தாரி ஒரு பத்திரிகைக்கு அளித்துள்ள பேட்டியில், பின் லேடன் குறித்து எங்களுக்குத் தெரியாது என அமெரிக்கா கூறலாம். எங்களை விட பின் லேடனை கண்டுபிடிக்கத் தேவையான வசதிகள் அவர்களிடம் உள்ளன.

எங்களது உளவு அமைப்புகளின் தகவலின்படி பின் லேடன் உயிருடன் இல்லை. இருக்கிறார் என்பதற்கு எந்தவித ஆதாரமும் இல்லை. உயிருடன் இல்லை என்பதற்கும் ஆதாரம் இல்லை. கற்பனைக்கும், உண்மைக்கும் நடுவில் நாங்கள் இருக்கிறோம்.

லேடனின் நடமாட்டம் எங்கும் இல்லை என்பதை என்னால் உறுதியாக சொல்ல முடியும். அவர் உயிருடன் இருக்கிறாரா, இல்லையா என்பதிலும் தெளிவான தகவல் இல்லை. ஆனால் அவர் இல்லை என்பது உளவு அமைப்புகளின் அனுமானம்.

பின்லேடன் குறித்த ஒரு தடயமும் இல்லை என்பதே இப்போதைக்கு உள்ள நிலவரம் என்று கூறியுள்ளார் சர்தாரி.