வாஷிங்டனில் ரயில்கள் மோதல்-6 பேர் பலி

வாஷிங்டன்: வாஷிங்டன் நகரில் இரு புறநகர் மெட்ரோ ரயில்கள் மோதிக் கொண்டதில் 6 பேர் உயிரிழந்தனர்.

இந்த கோர விபத்தில் பலர் காயமடைந்தனர். வாஷிங்டன் ரயில் போக்குவரத்து வரலாற்றில் இதுவரை இப்படி ஒரு பெரும் விபத்து நடந்ததில்லையாம்.

வடகிழக்கு வாஷிங்டனில் உள்ள ரயில் நிலையத்தில் ஒரு மெட்ரோ ரயில் பயணிகளை இறக்கி விட்டுக் கொண்டிருந்தபோது இன்னொரு ரயில் வேகமாக வந்து நின்ற ரயில் மீது பின்னாலிருந்து மோதியதில் விபத்து ஏற்பட்டது.

மோதிக் கொண்ட வேகத்தில் ரயில் பெட்டிகள் நசுங்கிப் போய் விட்டன. அவற்றில் சிக்கியவர்களையும், உடல்களையும் கேஸ் கட்டர் வைத்து பெட்டிகளை உடைத்து மீட்டனர்.

இதுவரை 6 பேர் உயிரிழந்திருப்பது உறுதி செய்யப்பட்டுள்ளது. 100க்கும் மேற்பட்டோர் காயமடைந்துள்ளனர். அவர்களில் பலரது நிலை கவலைக்கிடமாக இருப்பதாக தெரிவிக்கப்பட்டுள்ளது.