பென்னாகரம் சோதனைச் சாவடிகளில் ஜெ., ஸ்டாலின் வேன்களில் சோதனை

பென்னாகரம்: பென்னாகரம் தொகுதியி்ல் அமைக்கப்பட்டுள்ள சோதனைச் சாவடிகளில் அதிமுக பொதுச் செயலாளர் ஜெயலலிதா, துணை முதல்வர் மு.க.ஸ்டாலின் ஆகியோரது வேன்களை நிறுத்தி போலீஸார் சோதனை போட்டனர்.

சமீபத்தில் பாமக நிறுவனர் டாக்டர் ராமதாஸின் காரும் இதுபோல சோதனையிடப்பட்டது. இதுகுறித்து பாமக தரப்பில் குற்றம் சாட்டப்பட்டது.

இந்த நிலையில் நேற்று மு.க.ஸ்டாலின், ஜெயலலிதா ஆகியோரின் கார்களில் சோதனை நடத்தப்பட்டது.

பென்னாகரம் மலை கிராமங்களில் நேற்று துணை முதல்வர் மு.க.ஸ்டாலின் சுற்றுப்பயணம் செய்து தேர்தல் பிரசாரம் செய்தார். வழியில் நாகர்கூடல் என்ற கிராமத்துக்கு செல்லும்போது அங்கிருந்த வாகன சோதனை சாவடி அருகே ஸ்டாலின் பிரசார வேன் நிறுத்தப்பட்டது.

பென்னாகரம் தொகுதிக்கு வந்து செல்லும் அனைத்து வாகனங்களும் சோதனை செய்யப்பட வேண்டும் என்ற தேர்தல் கமிஷன் உத்தரவின் பேரில் ஸ்டாலின் பிரசார வேனும் நிறுத்தி சோதனை செய்யப்பட்டது.

சேலம் சரக டி.ஐ.ஜி.வெங்கட்ராமன் தலைமையில் போலீசார் துணை முதல்வர் மு.க.ஸ்டாலின் பிரசார வேனுக்குள் சென்று சோதனை நடத்தினர். சோதனை செய்வதற்கு ஸ்டாலின் எதிர்ப்பு தெரிவிக்கவில்லை. தாராளமாக சோதனை செய்து கொள்ளுங்கள் என்று கூறி விட்டார். சுமார் 10 நிமிடம் இந்த சோதனை நீடித்தது.

இதேபோல, அ.தி.மு.க. பொது செயலாளர் ஜெயலலிதா நேற்று பென்னாகரம் தொகுதியில் தனது பிரசாரத்தை தெர்டங்கினார். குரும்பட்டி கூட்டு ரோட்டில் அவர் முதலில் பிரசாரம் செய்து விட்டு இண்டூரில் பிரசாரம் செய்வதற்காக வேனில் சென்றார்.

அவரது வேன் இண்டூர் அருகே பூட்டுகாரன் தோப்பு சோதனை சாவடிக்கு வந்த போது போலீசார் அவரது வேனை தடுத்து நிறுத்தி சோதனை போட வேண்டும் என்று கூறினார்கள்.

இந்த தகவலை கருப்பு பூனை படையினர் ஜெயலலிதாவிடம் கூறினார்கள். ஜெயலலிதாவும் தாராளமாக சோதனை செய்து கொள்ளட்டும் என்று கூறினார். அதனைத் தொடர்ந்து போலீசார் ஜெயலலிதாவின் வேன் கதவை திறந்து சோதனை செய்தனர். அது 5 நிமிட நேரம் நடந்தது. இந்த நிகழ்வை தேர்தல் கமிஷன் நியமித்துள்ள வீடியோ காமிராமேன் வீடியோவில் படம் எடுத்து பதிவு செய்தார். பின்னர் வாகனம் செல்ல அனுமதிக்கப்பட்டது.