‛தனி மெஜாரிட்டி’ கர்நாடகாவில் அடித்து ஆடிய காங்கிரஸ்! பாஜக, ஜேடிஎஸ் சறுக்கியது இங்கே தான்! டேட்டா

பெங்களூர்: கர்நாடகா சட்டசபை தேர்தலில் காங்கிரஸ் கட்சி 135 தொகுதிகளில் வெற்றி பெற்று தனி மெஜாரிட்டியுடன் ஆட்சியை பிடித்துள்ளது. மாறாக பாஜக ஆட்சியை இழந்ததோடு, படுதோல்வி அடைந்துள்ளது. அதேபோல் ஜேடிஎஸ் கட்சியும் பெரிய அளவில் சறுக்கலை சந்தித்துள்ளது. இந்நிலையில் தான் காங்கிரஸ் கட்சி ஆட்சியை கைப்பற்றியதற்கும், பாஜக, ஜேடிஎஸ் கட்சிகள் படுதோல்வி அடைந்ததற்கான டேட்டா வெளியாகி உள்ளது.

கர்நாடகாவில் உள்ள 224 சட்டசபை தொகுதிகளுக்கும் ஒரே கட்டமாக கடந்த 10ம் தேதி தேர்தல் நடந்தது. மொத்தம் 73.19 சதவீத ஓட்டுகள் பதிவாகின. இந்த ஓட்டுகள் நேற்று எண்ணப்பட்டு முடிவுகள் அறிவிக்கப்பட்டன.

இதில் காங்கிரஸ் கட்சி அமோக வெற்றி பெற்று ஆட்சியை பிடித்தது. பாஜக படுதோல்வி அடைந்து காங்கிரஸ் கட்சியிடம் ஆட்சியை இழந்தது. இதன்மூலம் தென்மாநிலங்களில் இருந்து பாஜக மொத்தமாக வெளியேற்றப்பட்டுள்ளது.

கர்நாடகாவில் ஆட்சியமைக்க 113 தொகுதிகளில் வெற்றி பெற வேண்டும். ஆனால் காங்கிரஸ் கட்சி மொத்தம் 135 தொகுதிகளில் வெற்றி பெற்று தனி மெஜாரிட்டியுடன் ஆட்சியை பிடித்துள்ளது. பாஜக 66 இடங்களில் மட்டுமே வெற்றி பெற்றுள்ளது. ஜேடிஎஸ் 19 தொகுதிகளிலும் மற்றவர்கள் 4 தொகுதிகளிலும் வெற்றி பெற்றுள்ளனர்.

மேலும் கடந்த 2018 தேர்தலை ஒப்பிடும்போது இது காங்கிரஸ் கட்சிக்கு மிகப்பெரிய வெற்றியாகும். கடந்த முறை காங்கிரஸ் கட்சி 80 இடங்களில் வெற்றி பெற்ற நிலையில் இப்போது 55 இடங்கள் கூடுதலாக பெற்றுள்ளது. மாறாக பாஜக 104 இடங்களில் இருந்து 38யை இழந்து 66 தொகுதிகளில் மட்டும் வெற்றி பெற்றுள்ளது. ஜேடிஎஸ் கட்சி கடந்த முறை 37 தொகுதிகளில் வெற்றி பெற்றது. இந்த முறை 18 தொகுதிகளை இழந்து வெறும் 19 இடங்களில் மட்டுமே வெற்றி பெற்றுள்ளது.

இந்நிலையில் தான் புதிய தகவல் ஒன்று வெளியாகி உள்ளது. அதாவது மொத்தமுள்ள 224 தொகுதிகளில் கடந்த தேர்தலில் பாஜக 104 இடங்களை வென்ற நிலையில் அதில் தற்போது வெறும் 43 தொகுதிகளில் மட்டுமே வெற்றி பெற்றுள்ளது. இதன்மூலம் 2018 தேர்தலில் வென்ற தொகுதிகளை பாஜக தக்கவைத்து கொள்வதில் 59 சதவீதம் தோல்வியடைந்துள்ளது. இதனால் தான் 61 தொகுதிகளை இழந்துள்ளது . இந்த 61 தொகுதிகளில் காங்கிரஸ் கட்சி 53 தொகுதிகளையும் மற்றவர்கள் 8 தொகுதிகளையும் பாஜகவிடம் இருந்து இந்த முறை பறித்துள்ளனர்.

அதேபோல் காங்கிரஸ் கட்சியை எடுத்து கொண்டால் கடந்த முறை வென்ற தொகுதிகளில் 58 இடங்களை இந்த முறையும் தக்கவைத்துள்ளது. இது 73 சதவீத வெற்றியாகும். அதேநேரத்தில் கடந்த முறை வென்ற 22 தொகுதிகளை காங்கிரஸ் கட்சி இழந்துள்ளது. இதில் 17 தொகுதிகளை பாஜக கைப்பற்றிய நிலையில் மற்றவர்கள் 5 தொகுதிகளில் வென்றுள்ளனர்.

ஜேடிஎஸ் கட்சியை எடுத்து கொண்டால் கடந்த முறை வென்ற 37 தொகுதிகளில் இப்போது 8 ல் மட்டுமே வெற்றி பெற்றுள்ளது. 29 தொகுதிகளை பறிகொடுத்துள்ளது. இதில் காங்கிரஸ் கட்சி 22 இடங்களையும், மற்றவர்கள் 7 இடங்களையும் ஜேடிஎஸ் கட்சியிடம் இருந்து பறித்துள்ளனர். ஒருவேளை பாஜக, ஜேடிஎஸ் கட்சிகள் கடந்த முறை வென்ற தொகுதிகளில் நன்கு கவனம் செலுத்தி இருந்தால் கூட காங்கிரசுக்கு ‛டப்பைட்' கொடுத்து இருக்கலாம் என அரசியல் நோக்கர்கள் தெரிவித்துள்ளனர்.

English summary

In the Karnataka assembly elections, the Congress party won 135 seats and came to power with a single majority. On the contrary, BJP has lost power and failed miserably. Similarly, the JDS party has suffered a lot of slippage. In this situation, data has been released that the Congress party has taken over the government and the BJP and JDS parties have suffered a crushing defeat.