அங்குட்டு போய் விளையாடுங்கப்பா.. அண்ணாமலை இயக்கம் ஆரம்பித்த அதே நாள்! குறுக்கே வந்த லதா ரஜினிகாந்த்

Published: Saturday, June 6, 2026, 11:19 [IST]

Subscribe to Oneindia Tamil

சென்னை: தமிழக அரசியலில் புதிய மாற்றங்கள் வேகமாக அரங்கேறி வரும் நிலையில், முன்னாள் தமிழக பாஜக தலைவர் அண்ணாமலை தனது புதிய அரசியல் இயக்கத்தை அறிவித்த சில மணி நேரங்களிலேயே, நடிகர் ரஜினிகாந்தின் மனைவி லதா ரஜினிகாந்தும் புதிய மக்கள் இயக்கம் ஒன்றை தொடங்கியிருப்பது அரசியல் வட்டாரங்களில் பரபரப்பை ஏற்படுத்தியுள்ளது. இதனால், அண்ணாமலைக்கு போட்டியாக லதா ரஜினிகாந்த் புதிய இயக்கத்தை ஆரம்பித்தாரா? அல்லது ஆதரவு தெரிவித்து ஒன்றாக பயணிக்கப் போகிறாரா? என்ற கேள்வி எழுந்துள்ளது.

சமீபத்தில் நடைபெற்ற தமிழக சட்டப்பேரவைத் தேர்தல் தமிழக அரசியலில் மிகப்பெரிய மாற்றத்தை ஏற்படுத்தியது. தமிழக வெற்றிக் கழகத்தின் தலைவர் விஜய் தலைமையில் புதிய ஆட்சி அமைந்த நிலையில், பல ஆண்டுகளாக தமிழக அரசியலில் ஆதிக்கம் செலுத்தி வந்த திராவிட கட்சிகள் பின்னடைவை சந்தித்தன.

இந்த மாற்றத்திற்குப் பிறகு புதிய அரசியல் முயற்சிகள் குறித்து பல்வேறு தரப்பினரும் சிந்திக்கத் தொடங்கியதாக கூறப்படுகிறது. இந்தச் சூழலில்தான், பாஜகவில் இருந்து விலகிய அண்ணாமலை தனது புதிய அரசியல் பயணத்தை அதிகாரப்பூர்வமாக அறிவித்தார்.

அண்ணாமலை

"இது நம்ம இயக்கம்" என்ற பெயரில் தொடங்கப்பட்டுள்ள இந்த அமைப்பு, எதிர்காலத்தில் அரசியல் கட்சியாக உருவெடுத்து தேர்தல் களத்திலும் குதிக்கும் என்று அவர் தெரிவித்துள்ளார். புதிய தலைமுறையினரை அரசியலுக்கு கொண்டு வருவது, சாமானிய மக்களின் அரசியலை முன்னிறுத்துவது, அறம் சார்ந்த அரசியல் கலாச்சாரத்தை உருவாக்குவது போன்ற நோக்கங்களுடன் இந்த இயக்கம் செயல்படும் என்று அண்ணாமலை கூறியுள்ளார். மேலும், உள்ளாட்சித் தேர்தல்கள் முதல் பொதுத் தேர்தல்கள் வரை தீவிரமாக செயல்படும் திட்டமும் இருப்பதாக தகவல்கள் வெளியாகியுள்ளன.

புதிய இயக்கம்

அண்ணாமலையின் இந்த அறிவிப்புக்கு அவரது ஆதரவாளர்கள் மத்தியில் நல்ல வரவேற்பு கிடைத்ததாக கூறப்படுகிறது. இயக்கத்தில் இணைவதற்கான இணையதளம் அறிமுகப்படுத்தப்பட்டதைத் தொடர்ந்து, குறுகிய நேரத்திலேயே லட்சக்கணக்கானோர் பதிவு செய்ததாக அவரது ஆதரவாளர்கள் தெரிவித்து வருகின்றனர். இதனால், பாஜகவில் இருந்து விலகிய பிறகும் அண்ணாமலைக்கு தனிப்பட்ட ஆதரவு இருப்பதாக அரசியல் நோக்கர்கள் மதிப்பிடுகின்றனர்.

லதா ரஜினிகாந்த்

இந்நிலையில், மற்றொரு முக்கிய திருப்பமாக லதா ரஜினிகாந்தும் புதிய மக்கள் இயக்கம் ஒன்றை அறிவித்துள்ளார். "மக்கள் மேடை" என்ற பெயரில் தொடங்கப்பட்டுள்ள இந்த அமைப்பு, அரசியல் கட்சியாக அல்லாமல் சமூக பங்களிப்பு மற்றும் மக்கள் முன்னேற்றத்தை மையமாகக் கொண்ட இயக்கமாக செயல்படும் என்று தெரிவிக்கப்பட்டுள்ளது. இந்த இயக்கம் குறித்து வெளியிடப்பட்ட அறிவிப்பில், மாற்றத்தை விரும்பும் அனைத்து தரப்பு மக்களும் ஒன்றிணைய வேண்டும் என்றும், பொதுமக்களின் கருத்துகள் மற்றும் பங்களிப்புகளை ஒருங்கிணைத்து சமூக மாற்றத்தை உருவாக்க வேண்டும் என்றும் கூறப்பட்டுள்ளது.

நடிகர் ரஜினிகாந்த்

குறிப்பாக, உள்ளூர் அளவில் புதிய தலைவர்களை உருவாக்கி சமூக வளர்ச்சிக்காக பணியாற்றும் திட்டமும் இதில் இடம்பெற்றுள்ளது. லதா ரஜினிகாந்தின் இந்த அறிவிப்பு பலரது கவனத்தையும் ஈர்த்துள்ளது. ஏனெனில், கடந்த காலத்தில் நடிகர் ரஜினிகாந்த் அரசியலுக்கு வருவதாக அறிவித்திருந்தாலும், உடல்நலக் காரணங்களால் அந்த முயற்சி நிறுத்தப்பட்டது. அதன் பிறகு ரஜினி குடும்பத்தினர் அரசியல் தொடர்பான எந்த முயற்சியிலும் நேரடியாக ஈடுபடவில்லை.

மக்கள் மேடை

ஆனால் தற்போது "மக்கள் மேடை" என்ற புதிய அமைப்பு தொடங்கப்பட்டுள்ளதால், இது எதிர்காலத்தில் அரசியல் வடிவம் எடுக்கும் முயற்சியா அல்லது சமூக சேவையை மட்டுமே நோக்கமாகக் கொண்டதா என்ற கேள்வி எழுந்துள்ளது. அதே நேரத்தில், அண்ணாமலையின் புதிய இயக்கத்துக்கும் லதா ரஜினிகாந்தின் புதிய அமைப்புக்கும் ஏதேனும் தொடர்பு இருக்கிறதா என்ற விவாதமும் அரசியல் வட்டாரங்களில் தொடங்கியுள்ளது.

தமிழக அரசியல்

சிலர் இருவரும் தனித்தனி பாதையில் பயணிக்கிறார்கள் என கூறினாலும், சிலர் எதிர்காலத்தில் புதிய கூட்டணிகள் உருவாகும் வாய்ப்பை நிராகரிக்க முடியாது என கருத்து தெரிவிக்கின்றனர். விஜயின் அரசியல் வெற்றி, அண்ணாமலையின் புதிய அரசியல் முயற்சி, லதா ரஜினிகாந்தின் மக்கள் இயக்கம் என அடுத்தடுத்த நிகழ்வுகள் தமிழக அரசியலை புதிய கட்டத்திற்கு கொண்டு சென்றுள்ளன என்பது மட்டும் மறுக்க முடியாத உண்மை.

Published On June 6, 2026