மதுரவாயல் டூ சென்னை ஓஆர்ஆர் சாலையில் 1228 கோடியில் டபுள் டக்கர் மேம்பாலம்.. பிரம்மாண்டத்தின் விவரம்
சென்னை: ரூ. 1,228.87 கோடி மதிப்பிலான மதுரவாயல் - சென்னை அவுட்டர் ரிங் ரோடு வரை உயர்மட்டச் சாலைத் திட்டத்திற்கான டெண்டர் அறிவிப்பு வெளியிடப்பட்டு ஓராண்டுக்கு மேலாகியும் இன்னும் ஒப்பந்தப்புள்ளிகள் திறக்கப்படவில்லை. இதற்கான தேதி இதுவரை 15 முறை மாற்றியமைக்கப்பட்ட நிலையில், தற்போது மீண்டும் தள்ளிப்போய் 2026 அக்டோபர் 16-ஆம் தேதிக்கு நிர்ணயிக்கப்பட்டுள்ளது.
முன்னதாக 'ஹைப்ரிட் அன்யூட்டி மோட்' (HAM) எனப்படும் கலப்பு வருடாந்திர முறைப்படி, மதுரவாயல் சந்திப்பிலிருந்து சென்னை அவுட்டர் ரிங் ரோடு வரை 8.14 கி.மீ நீளமுள்ள ஆறு வழித்தட உயர்மட்டச் சாலையை அமைப்பதற்கான ஒப்பந்தப்புள்ளியை தேசிய நெடுஞ்சாலை ஆணையம் கடந்த 2025 ஆகஸ்ட் 18 அன்று வெளியிட்டது. இத்திட்டத்திற்கான நிதி ஒப்புதலுக்கு நீண்ட காலம் காத்திருக்க வேண்டியிருந்ததே இந்தத் தொடர் தாமதத்திற்குக் காரணம் என அதிகாரி ஒருவர் விளக்கம் அளித்துள்ளார்.
பெங்களூரு - சென்னை விரைவுச் சாலையின் ஒரு பகுதியாகச் ஸ்ரீபெரும்புதூர் வரை 23.2 கி.மீ நீளத்திற்கு உயர்மட்டச் சாலை அமைக்கத் திட்டமிடப்பட்டது. அதன் முதற்கட்டமாகவே இந்த மதுரவாயல் - சென்னை வெளிவட்டச் சாலை திட்டம் அமைகிறது. சென்னை மெட்ரோ ரயில் நிறுவனத்தின் 27.9 கி.மீ நீள பூந்தமல்லி - சுங்குவார்சத்திரம் வழித்தடத் திட்டத்திற்கு இடமளிக்கும் வகையில், வெளிவட்டச் சாலை முதல் ஸ்ரீபெரும்புதூர் வரையிலான இரண்டாம் கட்டப் பணிகள் ஒத்திவைக்கப்பட்டுள்ளன.
பலகட்ட ஆய்வுகளுக்குப் பின்னர் இது 'டபுள் டக்கர்' உயர்மட்டச் சாலையாக அமைகிறது; இதில் முதல் அடுக்கில் சாலைப் போக்குவரத்தும், அதற்கு மேலே மெட்ரோ ரயில் வழித்தடமும் இடம்பெறும். அரசு நடத்திய போக்குவரத்து ஆய்வுகள் இந்த வழித்தடத்தில் உள்ள அதிகப்படியான நெரிசலைச் சுட்டிக்காட்டியுள்ளன. சென்னை - பூந்தமல்லி திசையில், மதுரவாயல் அருகே நாளொன்றுக்கு 97,304 வாகனங்களும், பூந்தமல்லி அருகே 69,536 வாகனங்களும் செல்கின்றன. அதேபோல் எதிர் திசையில், முறையே 94,747 மற்றும் 62,655 வாகனங்கள் பயணிக்கின்றன.
இந்த உயர்மட்டச் சாலை, தற்போது கட்டுமானத்தில் உள்ள சென்னை துறைமுகம் - மதுரவாயல் உயர்மட்டச் சாலையிலிருந்து துறைமுகத்திற்குச் செல்லும் வாகனங்களின் தடையற்ற போக்குவரத்தையும் எளிதாக்கும். குறிப்பாக மதுரவாயலில், நாட்டின் முதல் 'கிளோவர்லீஃப்' (Cloverleaf) வகை இரண்டாம் நிலை சந்திப்பு மூலம் இந்த இரண்டு உயர்மட்டப் பாதைகளும் இணைக்கப்படவுள்ளன.
இதற்காக தேசிய நெடுஞ்சாலை ஆணையம் கடந்த 2025 டிசம்பர் மற்றும் 2026 ஜூன் ஆகிய மாதங்களில் திருத்தப்பட்ட அறிவிப்புகளை வெளியிட்டது. ஜூன் மாத அறிவிப்பில், வடிவமைப்பு மற்றும் சாலை உள்கட்டமைப்பு அம்சங்களில் பல மாற்றங்கள் செய்யப்பட்டன.
அதன்படி, திட்டப் பாதையில் தற்போதுள்ள நிலப்பரப்பு அகலம் 54 மீட்டராக இருக்கும். இரு முனைகளிலும் முன்மொழியப்பட்ட அகலம் 65 மீட்டரிலிருந்து 68 மீட்டராக அதிகரிக்கப்பட்டுள்ளது. மணிக்கு 80 கி.மீ வேகக் கட்டுப்பாடு விதிக்கப்பட்டிருந்த இடங்களின் எண்ணிக்கை நான்கிலிருந்து இரண்டாகக் குறைக்கப்பட்டுள்ளது. சென்னை வெளிவட்டச் சாலை - தாம்பரம் சந்திப்பில், குறுக்குச் சாலையின் அகலம் 7 மீட்டரிலிருந்து 7.5 மீட்டராக உயர்த்தப்பட்டுள்ளது.
இத்திட்டத்தில் பழுதடைந்த வாகனங்களை எளிதாக அப்புறப்படுத்த உயர்மட்டப் பாதையில் இரண்டு அவசரக்கால வாகன நிறுத்த இடங்களும் அமைக்கப்படவுள்ளன. உயர்மட்டப் பாதைக்குக் கீழே உள்ள தற்போதைய சர்வீஸ் சாலைகள் மற்றும் சந்திப்புகளை மேம்படுத்துவதும் இத்திட்டத்தின் ஒரு பகுதியாகும்.
இச்சாலை ATMS எனப்படும் மேம்பட்ட போக்குவரத்து மேலாண்மை அமைப்பு மூலம் நிர்வகிக்கப்படும். இதில் அதிநவீன வீடியோ கண்காணிப்பு, போக்குவரத்து கேமராக்கள், விபத்துகளை உடனுக்குடன் கண்டறியும் வசதி, மாறும் செய்திப் பலகைகள் மற்றும் பொதுவான கட்டுப்பாட்டு மையம் ஆகியவை இடம்பெறும். இதை ஒப்பந்தக் காலம் முழுவதும் ஒப்பந்ததாரரே இயக்கிப் பராமரிப்பார்.
இப்பாதையில் மதுரவாயல் மற்றும் சென்னை வெளிவட்டச் சாலை அருகே என இரண்டு சுங்கச்சாவடிகள் அமைக்க முன்மொழியப்பட்டுள்ளது.மின்னணு சுங்கக் கட்டண வசூல் அமைப்புகள், சிசிடிவி, நெடுஞ்சாலை ரோந்து வாகனங்கள் மற்றும் மருத்துவ உதவி மையங்கள் இடம்பெறும்.
மேலும், ஒப்பந்தக் காலம் முழுவதும் ஜிபிஎஸ் மற்றும் ஜிஎஸ்எம் கண்காணிப்பு வசதி கொண்ட ஆம்புலன்ஸ் ஒன்று எப்போதும் தயார் நிலையில் பராமரிக்கப்படும். இந்த ஆம்புலன்ஸ், ATMS-இன் 'அசம்பாவிதங்களைக் கண்டறியும் அமைப்புடன்' நேரடியாக இணைக்கப்பட்டிருக்கும்.
Click it and Unblock the Notifications
Sign in with Google
