எடப்பாடி பழனிசாமி அதிமுக ஆபீஸில் அதிரடி.. மா.செ.க்களுடன் அவசர ஆலோசனை? அப்ப அந்த 25 எம்எல்ஏக்கள் பதவி
சென்னை: எடப்பாடி பழனிசாமி மற்றும் எஸ்.பி.வேலுமணி தரப்புக்கு இடையே அதிமுகவில் உட்கட்சி மோதல் உச்சக்கட்டத்தை எட்டியுள்ளது.. சட்டமன்ற நம்பிக்கை வாக்கெடுப்பில் தவெக அரசுக்கு ஆதரவாக 25 எம்எல்ஏக்கள் வாக்களித்ததால், அவர்களின் மாவட்டச் செயலாளர் பதவிகளை எடப்பாடி பழனிசாமி அதிரடியாகப் பறித்துள்ளார்.. இதற்கு பதிலாக எடப்பாடியின் பொதுச்செயலாளர் பதவியைப் பறிக்க வேலுமணி தரப்பு பொதுக்குழுவை கூட்ட முயலுகிறது.. இந்நிலையில், அதை முறியடிக்க இன்று சென்னை பசுமை வழிச்சாலையில் அதிமுக மாவட்டச் செயலாளர்களின் அவசரக் கூட்டத்தை கூட்டி ஆலோசனை மேற்கொண்டு வருகிறார் எடப்பாடி பழனிசாமி.
தமிழக அரசியல் களத்தில் பிரதான எதிர்க்கட்சியாக விளங்கும் அதிமுகவுக்குள் தற்பொழுது ஏற்பட்டுள்ள உச்சக்கட்ட உட்கட்சி மோதல், ஒட்டுமொத்த மாநில அரசியலையும் உற்று நோக்க வைத்திருக்கிறது. நடந்து முடிந்த சட்டமன்றத் தேர்தலில் அதிமுக வெறும் 47 இடங்களில் மட்டுமே வெற்றி பெற்று, மூன்றாவது இடத்திற்குத் தள்ளப்பட்டதில் இருந்தே கட்சிக்குள் புகைச்சல் ஆரம்பமாகிவிட்டது.
பொதுச்செயலாளர் எடப்பாடி பழனிசாமி
பொதுச்செயலாளர் எடப்பாடி பழனிசாமிக்கு எதிராக கட்சிக்குள்ளேயே எதிர்ப்பு அலைகள் மிகத் தீவிரமாக வலுத்து வந்த சூழலில், தமிழகத்தில் புதிதாக உருவான தவெக அரசோடு இணைந்து ஆட்சி அமைப்பது தொடர்பாக ஏற்பட்ட கருத்து வேறுபாடு கட்சியை அதிகாரப்பூர்வமாக இரண்டு துண்டுகளாக உடைக்கும் நிலைக்குக் கொண்டு சென்று நிறுத்தியுள்ளது.
தவெக அரசுடன் கைகோர்க்கலாம் என்று முன்னாள் அமைச்சர்கள் எஸ்.பி.வேலுமணி மற்றும் சி.வி.சண்முகம் தரப்பு ஆதரவு தெரிவித்த நிலையில், எடப்பாடி பழனிசாமி தரப்பு இதற்கு மிகக் கடுமையான எதிர்ப்பைப் பதிவு செய்தது. இதன் விளைவாக, சட்டமன்றத்தில் தவெக அரசுக்கு எதிராக நடைபெற்ற நம்பிக்கை வாக்கெடுப்பில் அதிமுகவின் உட்கட்சிப் பூசல் அப்பட்டமாக வீதிக்கு வந்தது.
கட்சியின் கொறடா அக்ரி கிருஷ்ணமூர்த்தி
கட்சியின் கொறடா அக்ரி கிருஷ்ணமூர்த்தியின் உத்தரவை முற்றிலுமாக மீறி, எஸ்.பி.வேலுமணி மற்றும் சி.வி.சண்முகம் ஆகியோரின் ஆதரவு பெற்ற 25 எம்எல்ஏக்கள் தவெக அரசுக்கு ஆதரவாக தங்களின் வாக்குகளை செலுத்தினார்கள்.. மறுபுறம் எடப்பாடி பழனிசாமியின் தீவிர ஆதரவாளர்களான 22 எம்எல்ஏக்கள் தவெக அரசுக்கு எதிராக வாக்களித்தனர்.
சட்டமன்றத்தில் அரங்கேறிய இந்த அதிரடியான வாக்கெடுப்பு தமிழக அரசியல் வட்டாரத்தில் பெரும் அதிர்வலைகளை ஏற்படுத்திய நிலையில், எடப்பாடி பழனிசாமி உடனடியாகத் தனது அதிகாரத்தைப் பயன்படுத்தி அடுத்தகட்ட நடவடிக்கைகளில் இறங்கி உள்ளார்..
25 அதிமுக எம்எல்ஏக்கள்
தவெக அரசுக்கு ஆதரவாகச் செயல்பட்ட அந்த 25 எம்எல்ஏக்களின் மாவட்டச் செயலாளர் பதவிகளையும், சி.வி.சண்முகத்திற்கு ஆதரவாகச் செயல்பட்ட மேலும் 3 மாவட்டச் செயலாளர்களின் பதவிகளையும் எடப்பாடி பழனிசாமி அதிரடியாகப் பறித்து உத்தரவிட்டார். இந்த 28 மாவட்டங்களுக்கும் புதிய மாவட்டச் செயலாளர்களையும் அவர் உடனடியாக நியமித்துத் தனது கட்டுப்பாட்டைத் தக்கவைத்துக் கொள்ளப் போராடி வருகிறார்.
இந்த பதவிப் பறிப்பு நடவடிக்கையால் ஆத்திரமடைந்த எஸ்.பி.வேலுமணி மற்றும் சி.வி.சண்முகம் தரப்பினர் தற்பொழுது எடப்பாடி பழனிசாமிக்கு எதிராக தங்களது ஆட்டத்தை தொடங்கியுள்ளனர். எடப்பாடி பழனிசாமியை அதிமுகவின் பொதுச்செயலாளர் பதவியில் இருந்தே முற்றிலுமாக நீக்குவதே இவர்களின் முதன்மையான இலக்காக மாறியுள்ளதாக தெரிகிறது.
இன்று மாவட்ட செயலாளர்கள் கூட்டம்
இதற்காக அதிமுகவின் விதிகளின்படி, 5 உள்கட்டமைப்பில் ஒரு பங்கு பொதுக்குழு உறுப்பினர்களின் அதிகாரப்பூர்வ கையெழுத்துக்களைப் பெற்று, அவசரமாக பொதுக்குழுவைக் கூட்டுவதற்கான தீவிரமான ஏற்பாடுகளில் அவர்கள் ரகசியமாகவும் வேகமாகவும் இறங்கியுள்ளனர். இந்த தகவல் எடப்பாடி பழனிசாமியின் தரப்பிற்கு எட்டியதையடுத்து, சென்னை பசுமை வழிச்சாலையில் உள்ள அவரது இல்லத்தில் தற்பொழுது பதற்றமான சூழல் நிலவி வருகிறது.
எதிர்த்தரப்பின் இந்த அதிரடி பொதுக்குழு திட்டத்தை முறியடிக்கவும், கட்சித் தாவல் தடைச் சட்டத்தின் கீழ் தவெக அரசுக்கு ஆதரவாக வாக்களித்த 25 எம்எல்ஏக்களின் பதவிகளை நீதிமன்றம் மூலம் பறிக்கவும் எடப்பாடி பழனிசாமி தீவிரமாகத் திட்டமிட்டு வருகிறார்.
இன்று என்ன நடக்கும்?
வேலுமணி தரப்பின் வியூகங்களை முடக்குவதற்கும், கட்சியில் தற்பொழுது எஞ்சியிருக்கும் தற்போதைய புதிய மாவட்டச் செயலாளர்கள் மற்றும் நிர்வாகிகளைத் தன்வசம் தக்கவைத்துக் கொள்வதற்கும் எடப்பாடி பழனிசாமி இன்று காலை 10 மணிக்கு ஒரு அவசர ஆலோசனைக் கூட்டத்தை மேற்கொண்டு வருகிறார்.
சென்னை பசுமை வழிச்சாலையில் உள்ள அவரது இல்லத்தில் நடைபெற்று வரும் இந்த அவசரக் கூட்டத்தில், அதிமுகவின் எதிர்காலத்தையும் எடப்பாடி பழனிசாமியின் பொதுச்செயலாளர் பதவியையும் தீர்மானிக்கக்கூடிய மிக முக்கியமான மற்றும் அதிரடியான முடிவுகள் எடுக்கப்படலாம் என்று எதிர்பார்க்கப்படுகிறது. இந்த உட்கட்சிப் போர் அதிமுகவை எத்தகு அழிவுப் பாதைக்கு அல்லது புதிய திருப்பத்திற்கு அழைத்துச் செல்லப் போகிறது என்பதை ஒட்டுமொத்த தமிழகமும் உற்று நோக்கிக் கொண்டிருக்கிறது.
முன்னதாக, தேர்தல் தோல்விக்கு பிறகு முதன்முறையாக, அதிமுக தலைமை அலுவலகம் வந்த எடப்பாடி, எம்ஜிஆர் மற்றும் ஜெயலலிதா சிலைகளுக்கு மாலை அணிவித்து மரியாதை செலுத்தினார். பிறகு மாவட்ட செயலாளர்களுடன் ஆலோசனை மேற்கொண்டு வருகிறார்.
Click it and Unblock the Notifications
Sign in with Google