மீண்டும் களமிறங்கும் திருமாவளவன், ரவிக்குமார்! சிதம்பரம், விழுப்புரத்தில் பானை சின்னத்தில் போட்டி!

சென்னை: மக்களவை தேர்தலில் விடுதலைச் சிறுத்தைகள் கட்சி போட்டியிடும் சிதம்பரம், விழுப்புரம் ஆகிய தொகுதிகளில் போட்டியிடும் வேட்பாளர்கள் அறிவிக்கப்பட்டனர்.

சிதம்பரம் தொகுதியில் திருமாவளவனும் விழுப்புரம் தொகுதியில் ரவிக்குமாரும் போட்டியிடுகிறார்கள். இரு தொகுதிகளிலும் பானை சின்னத்தில் போட்டியிடுகிறார்கள்.

சிதம்பரம் தொகுதியில் திருமாவளவன் 6ஆவது முறையாக போட்டியிடுகிறார். அது போல் விழுப்புரம் தொகுதியில் ரவிக்குமார் 2ஆவது முறையாக போட்டியிடுகிறார். திமுக கூட்டணியில் இந்த முறை 4 தொகுதியை அல்லது குறைந்தபட்சம் 3 தொகுதிகளையாவது பெற்றுவிட விசிக முயற்சித்தது.

ஆனால் அக்கட்சிக்கு 2 இடங்கள் மட்டுமே கிடைத்தன. கடந்த 2019ஆம் ஆண்டு நடந்த மக்களவைத் தேர்தலிலும் விசிக, சிதம்பரம், விழுப்புரம் ஆகிய இரு தொகுதிகளில் போட்டியிட்டது. அதில் சிதம்பரம் தொகுதியில் தொல் திருமாவளவன் பானை சின்னத்திலும் விழுப்புரத்தில் ரவிக்குமார் உதயசூரியன் சின்னத்திலும் போட்டியிட்டிருந்தனர்.

வரும் நாடாளுமன்றத் தேர்தலில் திமுக கூட்டணியில் காங்கிரஸ், விசிக, மதிமுக, கம்யூனிஸ்ட், மார்க்சிஸ்ட், மனிதநேய மக்கள் கட்சி, கொங்குமக்கள் தேசிய கட்சி, மக்கள் நீதி மய்யம் உள்ளிட்டவை உள்ளன. இவற்றில் மனிதநேய மக்கள் கட்சிக்கு எந்த தொகுதியும் கொடுக்கப்படவில்லை. ஆயினும் திமுக கூட்டணி வெற்றிக்கு பாடுபடுவோம் என கட்சித் தலைவர் ஜவாஹிருல்லா தெரிவித்துள்ளார்.

இதைத் தொடர்ந்து திமுக, தன்னுடைய கூட்டணி கட்சிக்கு 19 தொகுதிகளை விட்டுக் கொடுத்துள்ளது. மீதமுள்ள 21 தொகுதிகளில் திமுக நேரடியாக போட்டியிடுகிறது. கடந்த 2019ஆம் ஆண்டு கூட்டணி கட்சிகளுக்கு 20 இடங்களை ஒதுக்கிய நிலையில் இந்த முறை ஒரு இடம் குறைத்து ஒதுக்கீடு செய்துள்ளது.

திமுக கூட்டணியில் கட்சி வாரியாக தொகுதிகள்:

திமுக- 21
காங்கிரஸ்- 10
விசிக- 2
இந்திய கம்யூனிஸ்ட் கட்சி- 2
மார்க்சிஸ்ட் கம்யூனிஸ்ட் கட்சி- 2
மதிமுக-1
கொங்குநாடு மக்கள் தேசிய கட்சி- 1
இந்திய யூனியன் முஸ்லீம் லீக்- 1
மக்கள் நீதி மய்யம்- 1 மாநிலங்களவை சீட்

திமுக கூட்டணியில் யார் யார் எந்தெந்த தொகுதிகளில் போட்டியிடுகிறார்கள்:

இந்திய யூனியன் முஸ்லீம் லீக் - ராமநாதபுரம்
கொங்குநாடு மக்கள் தேசிய கட்சி- நாமக்கல்
கம்யூனிஸ்ட் கட்சி- நாகை, திருப்பூர்
மார்க்சிஸ்ட் கட்சி- மதுரை, திண்டுக்கல்
விடுதலை சிறுத்தைகள் கட்சி- சிதம்பரம், விழுப்புரம்
ஆகியவை ஆகும்.

காங்கிரஸ் போட்டியிடும் தொகுதிகள் யாவை:

திருவள்ளூர் (தனி)
கிருஷ்ணகிரி
சிவகங்கை
விருதுநகர்
கரூர்
கடலூர்
நெல்லை
மயிலாடுதுறை
கன்னியாகுமரி
புதுவை

மதிமுக போட்டியிடும் தொகுதி

திருச்சி

அது போல் திமுக போட்டியிடும் தொகுதிகள் யாவை:

சேலம்
தருமபுரி
கோவை
பொள்ளாச்சி
நீலகிரி
ஈரோடு
பெரம்பலூர்
தஞ்சை
தென்காசி
தூத்துக்குடி
வடசென்னை
மத்திய சென்னை
தென் சென்னை
ஸ்ரீபெரும்புதூர்
காஞ்சிபுரம்
வேலூர்
அரக்கோணம்
திருவண்ணாமலை
கள்ளக்குறிச்சி
ஆரணி
தேனி

English summary

Lok Sabha Election 2024: Thirumavalavan and Ravikumar contest again in Chidambaram and Villupuram respectively.