தங்கத்தை வைத்து அதிபதி ஆகலாம்.. 312% ரிட்டர்ன்.. ஆர்பிஐ-யின் அதிரடி அறிவிப்பு.. யூஸ் பண்ணுங்க!

Updated: Thursday, March 19, 2026, 16:58 [IST]

Subscribe to Oneindia Tamil

சென்னை: பெரும் எதிர்பார்ப்பிற்கு இடையே தங்கப் பத்திரத் திட்டத்தில் (SGB) முதலீடு செய்தவர்களுக்கு அடித்திருக்கிறது ஜாக்பாட்! 2019-20 காலக்கட்டத்தில் வெளியிடப்பட்ட நான்காம் கட்ட தங்கப் பத்திரங்களின் முன்கூட்டிய முதிர்வு விலை (Premature Redemption Price) குறித்த முக்கிய அறிவிப்பை இந்திய ரிசர்வ் வங்கி (RBI) தற்போது வெளியிட்டுள்ளது.

முதலீடு ரூ.3,840... லாபம் ரூ.11,974!

கடந்த 2019-ம் ஆண்டு அக்டோபர் மாதம் இந்த 'SGB 2019-20 Series-IV' வெளியிடப்பட்டபோது, ஒரு கிராம் தங்கத்தின் விலை வெறும் ரூ.3,890 மட்டுமே. ஆன்லைன் மூலம் விண்ணப்பித்தவர்களுக்கு 50 ரூபாய் சலுகை போக ரூ.3,840-க்கு வழங்கப்பட்டது.

தற்போது, மார்ச் 17, 2026 அன்று முன்கூட்டியே வெளியேற விரும்புபவர்களுக்கு, ஒரு யூனிட் விலை ரூ.15,814 என நிர்ணயிக்கப்பட்டுள்ளது. அதாவது, கடந்த 2019-ல் ஆன்லைனில் ஒரு லட்சம் ரூபாய் முதலீடு செய்திருந்தால், இன்று அதன் மதிப்பு சுமார் 4.12 லட்சமாக உயர்ந்துள்ளது. இது வெறும் ஆறே ஆண்டுகளில் கிடைத்த 312% அசாத்தியமான லாபம்!

விலை எப்படி கணக்கிடப்படுகிறது?

இந்த மீட்பு விலையானது, இந்திய புல்லியன் மற்றும் ஜூவல்லர்ஸ் அசோசியேஷன் (IBJA) வெளியிடும் 999 தூய்மை கொண்ட தங்கத்தின் கடந்த மூன்று வேலை நாட்களின் (மார்ச் 12, 13 மற்றும் 16) சராசரி விலையை அடிப்படையாகக் கொண்டு கணக்கிடப்பட்டுள்ளது.

வட்டி தனி... லாபம் தனி!

இந்த 312% லாபம் என்பது தங்கத்தின் விலை உயர்வால் கிடைத்தது மட்டுமே. இது தவிர, முதலீட்டாளர்களுக்கு ஆண்டுக்கு 2.5% வட்டி (ஆரம்ப முதலீட்டுத் தொகையில்) அரையாண்டுக்கு ஒருமுறை வழங்கப்பட்டு வருவது கூடுதல் போனஸ்.

முதலீட்டாளர்களின் கவனத்திற்கு: சில முக்கியத் தகவல்கள்

புதிய சீரிஸ் எப்போது வரும்?

தங்கப் பத்திர முதலீட்டாளர்களுக்கு ஒரு சிறிய ஏமாற்றம் என்னவென்றால், 2024 பிப்ரவரிக்குப் பிறகு (SGB 2023-24 Series IV) மத்திய அரசு புதிய சீரிஸ் எதையும் இதுவரை அறிவிக்கவில்லை. 2025 மற்றும் 2026-ன் தொடக்கம் வரை புதிய வெளியீடு குறித்த தகவல் ஏதுமில்லை.

முன்கூட்டியே வெளியேறுவது எப்படி?

இந்திய அரசின் தங்கப் பத்திரத் திட்டத்தில் (SGB) முதலீடு செய்யும் போது, அதன் முழுமையான முதிர்வு காலம் (Maturity Period) என்பது 8 ஆண்டுகள் ஆகும். ஆனால், முதலீட்டாளர்கள் தங்களின் அவசரத் தேவைக்காகவோ அல்லது லாபத்தைப் பார்த்துவிட்டு வெளியேறவோ விரும்பினால், ரிசர்வ் வங்கி ஒரு குறிப்பிட்ட சலுகையை வழங்குகிறது. அதன்படி, பத்திரம் வழங்கப்பட்ட தேதியிலிருந்து 5 ஆண்டுகள் நிறைவடைந்த பிறகு, முதலீட்டாளர்கள் தங்களின் முதலீட்டை முன்கூட்டியே திரும்பப் பெற்றுக்கொள்ள (Premature Redemption) அனுமதிக்கப்படுவார்கள்.

இந்த வசதி எப்போது வேண்டுமானாலும் கிடைக்காது; அந்தப் பத்திரத்திற்கான அரையாண்டு வட்டி (Semi-annual Interest) எந்தத் தேதிகளில் வழங்கப்படுகிறதோ, அந்தத் தேதிகளில் மட்டுமே முன்கூட்டியே பணத்தை எடுக்க முடியும். உதாரணமாக, ஒரு முதலீட்டாளர் 5 ஆண்டுகள் முடிந்து 6-வது ஆண்டில் பணத்தைத் திரும்பப் பெற விரும்பினால், அடுத்த வட்டி வரும் தேதியை எதிர்நோக்க வேண்டும்.

அவ்வாறு முன்கூட்டியே வெளியேறும் போது, அப்போதைய சந்தை நிலவரப்படி (IBJA வெளியிடும் முந்தைய 3 நாட்களின் சராசரி விலை) தங்கம் என்ன விலையில் இருக்கிறதோ, அந்த விலைக்கு இணையான பணம் நேரடியாக முதலீட்டாளரின் வங்கித் கணக்கில் வரவு வைக்கப்படும். இது முதலீட்டாளர்களுக்கு ஒரு நெகிழ்வுத்தன்மையை (Flexibility) வழங்குவதுடன், நீண்ட காலம் காத்திருக்க முடியாமல் பணத் தேவை ஏற்படும் சூழலில் பெரும் உதவியாக அமைகிறது.

சான்றிதழ் பெறுவது எப்படி?

தங்கப் பத்திரங்களை வாங்கிய வங்கிகள், தபால் நிலையங்கள் அல்லது பங்குச் சந்தை முகவர்களிடம் இருந்து உங்கள் 'Certificate of Holding'-ஐப் பெற்றுக் கொள்ளலாம். விண்ணப்பத்தில் மின்னஞ்சல் முகவரி கொடுத்திருந்தால், நேரடியாக ரிசர்வ் வங்கியிடமிருந்தும் மின்னஞ்சல் மூலம் பெற முடியும்.

தங்கத்தை நகையாக வாங்கி லாக்கரில் வைப்பதை விட, இது போன்ற காகித வடிவிலான தங்கத்தில் முதலீடு செய்வது பாதுகாப்பானது மட்டுமல்ல, வரிச் சலுகை மற்றும் கூடுதல் வட்டியுடன் கூடிய லாபகரமான ஒன்று என்பதை இந்த 312% ரிட்டர்ன் மீண்டும் ஒருமுறை நிரூபித்துள்ளது.